38
1 ئەسلىتىش ئۈچۈن داۋۇد يازغان مەدھىيە ناخشىسى. 2 ئەي پەرۋەردىگار، غەزىپىڭدە مېنى ئەيىبلىمىگىن،
قەخرىڭدا مېنى جازالىمىغىن.
3 چۈنكى سېنىڭ ئوقلىرىڭ ماڭا سانجىلدى،
قولۇڭ مېنى بېسىۋالدى.
4 قاتتىق غەزىپىڭدىن بەدىنىمدە ساق يەر قالمىدى،
گۇناھىم تۈپەيلىدىن ئۇستىخانلىرىمنىڭ ھېچ ھالى قالمىدى.
5 چۈنكى گۇناھلىرىم بېشىمدىن ئاشتى،
ئېغىر بىر يۈكتەك مېنى بېسىۋالدى.
6 جاراھەتلىرىم بولسا ئەخمەقلىقىم سەۋەبىدىن
يىرىڭلاپ سېسىپ كەتتى.
7 مەن تولا دەرد تارتىپ، بېلىم ئېگىلىپ كەتتى،
كۈن بويى غەم-قايغۇغا پېتىپ يۈرىمەن.
8 بەللىرىم ئازابتىن يانىدۇ،
بەدىنىمنىڭ ساق يېرى قالمىدى.
9 مەن ھالسىراپ، بەك ئېزىلىپ كەتتىم،
قەلبىمدىكى بىئاراملىقتىن پەرياد قىلىپ نەرە تارتىمەن.
10 ئەي رەببىم، بارچە ئارزۇيۇم ساڭا ئايان،
ئاھ ئۇرۇشۇم ساڭا يوشۇرۇن ئەمەس.
11 يۈرىكىم سېلىپ،
ھالىمدىن كەتتىم.
كۆزلىرىمنىڭ نۇرى ئۆچتى.
12 يار-بۇرادەرلىرىم ماڭا كەلگەن ۋابا سەۋەبىدىن ئۆزلىرىنى قاچۇرىدۇ،
يېقىنلىرىممۇ مەندىن يىراق تۇرىدۇ.
13 جېنىمنى ئالماقچى بولغانلار ماڭا تۇزاق قۇرىدۇ.
ماڭا زىيان سېلىشنى ئارزۇلىغانلار
جېنىمغا قەست قىلىش توغرىسىدا سۆزلەيدۇ.
ئۇلار كۈن بويى ھىيلە-مىكىر ئويلايدۇ.
14 مەن بولسام، ئاڭلىمايمەن خۇددى گاستەك،
ئېغىز ئاچمايمەن خۇددى گاچىدەك.
15 مەن ئاڭلىيالمايدىغان،
ئاغزىدا قايتۇرىدىغان جاۋابى يوق بىر ئادەمگە ئايلاندىم.
16 چۈنكى، ئەي پەرۋەردىگار، ساڭا ئۈمىد باغلىدىم.
ئەي ئىگەم، مېنىڭ خۇدايىم، سەن جاۋاب بېرىسەن.
17 «ئۇلار مېنىڭ ھالىمدىن خۇشال بولمىسۇن.
پۇتۇم تېيىلغاندا، مېنى مەسخىرە قىلمىسۇن» دېدىم.
18 مەن يىقىلاي دەپ قالدىم.
ئازابىم كۆز ئالدىمدىن كەتمەيدۇ.
19 مەن يامانلىق قىلغىنىمنى ئىقرار قىلىمەن،
گۇناھىمغا پۇشايمان قىلىمەن.
20 دۈشمەنلىرىم ساغلام ۋە كۈچلۈكتۇر،
مېنى سەۋەبسىز ئۆچ كۆرگۈچىلەر نۇرغۇندۇر.
21 ياخشىلىققا يامانلىق قايتۇرغۇچىلار،
توغرا يولدا ماڭغىنىم ئۈچۈن، ماڭا قارشى چىقتى.
22 ئەي پەرۋەردىگار، مېنى تاشلىمىغىن!
ئەي خۇدايىم، مەندىن يىراق تۇرمىغىن!
23 ئەي ئىگەم، مېنىڭ نىجاتكارىم،
ماڭا ياردەم قىلىشقا ئالدىرىغىن!