44
1 نەغمىچىلەرنىڭ بېشىغا تاپشۇرۇلسۇن دەپ، قوراخ ئوغۇللىرى يازغان نەزمە. 2 ئەي خۇدا، سەن ئاتا-بوۋىلىرىمىزنىڭ كۈنلىرىدە،
قەدىمكى زاماندا قىلغان ئىشلىرىڭنى
ئاتا-بوۋىلىرىمىز بىزگە دەپ بەردى،
بىز ئۇلارنى ئۆز قۇلاقلىرىمىز بىلەن ئاڭلىدۇق.
3 سەن ئۆز قولۇڭ بىلەن خەلقلەرنى قوغلىۋەتتىڭ،
ئەمما ئاتا-بوۋىلىرىمىزنى ئۇ زېمىنغا ئورۇنلاشتۇردۇڭ.
سەن باشقا خەلقلەرنى ئۇردۇڭ،
ئەمما ئۇلارنىڭ يېيىلىشىغا سەۋەب بولدۇڭ.
4 چۈنكى ئاتا-بوۋىلىرىمىز قىلىچ بىلەن زېمىننى ئىگىلىۋالمىدى،
ئۆز بىلىكى بىلەن غەلىبىگە ئېرىشمىدى.
بەلكى سەن ئۇلاردىن سۆيۈنگەچكە،
سېنىڭ ئوڭ قولۇڭ، ئۆز بىلىكىڭ
ۋە يۈزۈڭنىڭ نۇرى ئۇلارنى قۇتقۇزدى.
5 ئەي خۇدا، سەن مېنىڭ پادىشاھىمسەن.
ياقۇبقا غەلىبە ئاتا قىلغۇچىسەن.
6 سېنىڭ ياردىمىڭ بىلەن دۈشمەنلىرىمىزنى يىقىتىمىز،
سېنىڭ نامىڭ بىلەن بىزگە قارشى چىققانلارنى چەيلەيمىز.
7 چۈنكى مەن ئوقيايىمغا ئىشەنچ باغلىمايمەن،
قىلىچىم مېنى قۇتقۇزالماس.
8 پەقەتلا سەن ئۆزۈڭ بىزنى دۈشمەنلىرىمىزدىن قۇتقۇزىسەن،
بىزدىن نەپرەتلىنىدىغانلارنى شەرمەندە قىلىسەن.
9 خۇدانى كۈن بويى ماختاپ مەدھىيىلەيمىز.
سېنىڭ نامىڭغا ئەبەدكىچە شۈكۈر ئېيتىمىز.
سېلاھ.
10 ئەمما سەن بىزنى تاشلاپ ئاھانەتكە قويدۇڭ،
قوشۇنلىرىمىز بىلەن بىللە جەڭگە چىقمىدىڭ.
11 سەن دۈشمەنلىرىمىزنىڭ ئالدىدا بىزنى كەينىمىزگە چېكىندۈرگەچكە،
بىزگە ئۆچلەر بىزنى بۇلاڭ-تالاڭ قىلدى.
12 سەن بىزنى قويلاردەك بوغۇزلاشقا تۇتۇپ بەردىڭ،
ئەللەر ئارىسىغا بىزنى چېچىۋەتتىڭ.
13 سەن ئۆز خەلقىڭنى ئەرزانغا سېتىۋەتتىڭ،
ئۇلارنى سېتىشتىن سەن ھېچ پايدا ئالمىدىڭ.
14 سەن بىزنى قوشنىلىرىمىزنىڭ ھاقارىتىغا،
ئەتراپىمىزدىكىلەرنىڭ زاڭلىقى ۋە مەسخىرىسىگە قالدۇردۇڭ.
15 سەن بىزنى يات ئەللەر ئارىسىدا ماقال-تەمسىلنىڭ ماۋزۇسى قىلىپ،
خەلقلەرنىڭ بىزگە باش چايقىشىغا يول قويدۇڭ.
16 كۈن بويى ئۇياتقا قالغىنىم كۆز ئالدىمدا تۇرىدۇ،
خىجالەت يۈزۈمنى قاپلايدۇ.
17 چۈنكى دۈشمەن ۋە قىساسكارنىڭ مەسخىرىسى
ۋە ھاقارەتلىرىنى ئاڭلاپ تۇرىمەن.
18 بىز سېنى ئۇنتۇمىغان، ئەھدەڭگىمۇ خىيانەت قىلمىغان بولساقمۇ،
بۇلارنىڭ ھەممىسى بېشىمىزغا كەلدى.
19 كۆڭلىمىز ساڭا ئاسىي بولمىغان بولسىمۇ،
قەدەملىرىمىز سېنىڭ يولۇڭدىن چەتنىمىگەن بولسىمۇ،
20 سەن بىزنى چىلبۆرىلەرنىڭ ماكانىدا ئېزىپ،
ئۆلۈم سايىسى بىلەن قاپلاپ قويدۇڭ.
21 ئەگەر خۇدايىمىزنىڭ نامىنى ئۇنتۇغان بولساق،
قوللىرىمىزنى يات ئىلاھقا كۆتۈرگەن بولساق،
22 كۆڭۈلنىڭ سىرلىرىنى بىلگۈچى خۇدا
بۇنى بايقىماسمىدى؟
23 بەلكى بىز سەن ئۈچۈن كۈن بويى ئۆلتۈرۈلمەكتىمىز،
بوغۇزلىنىدىغان قويلار ھېسابلانماقتىمىز.
24 ئويغان، ئەي رەببىم، نېمىشقا ئۇخلايسەن؟
تۇر ئورنۇڭدىن، بىزنى ئەبەدكىچە تاشلىمىغىن!
25 نېمىشقا يۈزۈڭنى يوشۇرىسەن؟
نېمىشقا بىزنىڭ ئازابلىرىمىز ۋە ئۇچرىغان زۇلۇملىرىمىزغا پىسەنت قىلمايسەن؟
26 مانا، جېنىمىز توپ-چاڭغا تەسلىم بولدى،
تېنىمىز يەرگە چاپلاشتى.
27 بىزگە ياردەم بېرىشكە قوزغال،
ۋە مېھىر-شەپقىتىڭ نامىدىن بىزنى قۇتۇلدۇرغىن.