48
1 قوراھ ئوغۇللىرى يازغان ناخشا، بىر مەدھىيە ناخشىسى. 2 پەرۋەردىگار ئۇلۇغدۇر،
خۇدايىمىزنىڭ شەھىرىدە، ئۇنىڭ مۇقەددەس تېغىدا
ئۇ كۆپ مەدھىيىلىنىشكە لايىقتۇر.
3 ئۇلۇغ پادىشاھنىڭ شەھىرىنىڭ شىمال تەرىپىدىكى
كۆركەم ۋە ئېگىز سىئون تېغى پۈتۈن يەر يۈزىنىڭ خۇشاللىقىدۇر.
4 خۇدا ئۇنىڭ ئوردىلىرىدا
ئۆزىنىڭ ئېگىز قەلئەدەك ئىكەنلىكىنى نامايان قىلىدۇ.
5 چۈنكى پادىشاھلار يىغىلىپ،
بىر بولۇپ ئۆتكىنىدە،
6 ئۇنى كۆرۈپلا ھەيران بولۇشۇپ،
قورقۇپ بەدەر قېچىشتى.
7 ئۇلار تولغاق ئازابىدا قىينىلىۋاتقان ئايالدەك
قىينىلىپ دەھشەتكە چۈشتى.
8 سەن شەرقنىڭ شامىلى بىلەن
تارشىشنىڭ كېمىلىرىنى پاچاقلىۋېتىسەن.
9 بىز خۇددى ئاڭلىغىنىمىزدەك،
ساماۋى قوشۇنلارنىڭ سەردارى پەرۋەردىگارنىڭ شەھىرىدە،
خۇدايىمىزنىڭ شەھىرىدە ئۆز كۆزىمىز بىلەن كۆردۇق.
خۇدا ئۇنى ئەبەدكىچە ساقلايدۇ.
سېلاھ.
10 ئەي خۇدا، سېنىڭ ئىبادەتخاناڭدا تۇرۇپ،
مېھىر-شەپقىتىڭ ھەققىدە چوڭقۇر ئويلىنىمىز.
11 ئەي خۇدا، سېنىڭ نامىڭدەك،
شان-شۆھرىتىڭمۇ يەرنىڭ چەتلىرىگىچە يەتتى.
ئوڭ قولۇڭ ئادالەت بىلەن تولغان.
12 سېنىڭ ھۆكۈملىرىڭدىن سىئون تېغى سۆيۈنسۇن،
يەھۇدا قىزلىرى شادلانسۇن.
13 سىئوننى ئايلىنىپ ئۇنىڭ چۆرىسىدە يۈرۈپ،
ئۇنىڭ قەلئە مۇنارلىرىنى ساناڭلار.
14 كېلىدىغان نەسىلگە دەپ بېرىش ئۈچۈن،
سېپىللىرىغا سەپسېلىپ قاراڭلار،
ئوردىلىرىنى كۆزدىن كەچۈرۈڭلار.
15 چۈنكى خۇدا ئەبەدىلئەبەد خۇدايىمىزدۇر،
ئۇ ئۆمرىمىزنىڭ ئاخىرىغىچە بىزنى يېتەكلەيدۇ.