49
1 نەغمىچىلەرنىڭ بېشىغا تاپشۇرۇلسۇن دەپ، قوراھ ئوغۇللىرى يازغان مەدھىيە ناخشىسى. 2 ئەي ھەممە خەلقلەر، بۇنى ئاڭلاڭلار،
ئەي دۇنيادا ياشاۋاتقانلارنىڭ ھەممىسى، قۇلاق سېلىڭلار.
3 مەيلى ئاددىي ياكى ئۇلۇغ كىشى بولسۇن،
مەيلى باي ياكى كەمبەغەل بولسۇن، ھەممىسى ئاڭلىسۇن.
4 ئاغزىم ھېكمەتنى سۆزلەيدۇ،
كۆڭلۈمنىڭ ئوي-خىياللىرى مەزمۇنلۇقتۇر.
5 مەن ھېكمەتلىك سۆزگە قۇلاق سېلىپ، سىرىمنى لىرا چېلىپ بايان قىلاي.
6 بېشىمغا بالا-قازا كەلگەن كۈنلەردە مەن نېمىشقا قورقاي،
مېنى قوغلىغۇچىلارنىڭ يامانلىقى مېنى قورشىۋالسا،
نېمىشقا دەھشەتكە چۈشەي؟
7 ئۇلار بايلىقىغا تايىنىدۇ،
مال-مۈلۈكلىرىنىڭ كۆپلۈكىدىن پەخىرلىنىدۇ.
8 لېكىن ھېچكىم ئۆز قېرىندىشىنى بەدەل تۆلەپ قۇتۇلدۇرالماس
ئۇنىڭ ئۈچۈن خۇداغا بەدەل تۆلىيەلمەس.
9 چۈنكى جېنى ئۈچۈن تۆلەيدىغان بەدەل ئىنتايىن يۇقىرى بولغاچ،
ئۇ ئەبەدكىچە ئادا قىلىنماس.
10 بولمىسا كىشى مەڭگۈ ياشاپ، گۆر كۆرمەيتتى.
11 مەلۇمكى، دانىشمەنلەر ئۆلۈپ كېتىدۇ،
ئەخمەق ۋە نادانلارمۇ تۈگەپ كېتىدۇ.
ئۇلار ھەممىسى مال-مۈلكىنى باشقىلارغا تاشلاپ كېتىدۇ.
12 ئۇلار كۆڭلىدە: «بىزنىڭ ئۆيىمىز ئەبەدكىچە تۇرىدۇ،
ماكانلىرىمىز نەسىلدىن نەسىلگە قالىدۇ» دەپ خىيال قىلىپ،
ئۆز يەرلىرىنى ئۆز نامى بىلەن ئاتايدۇ.
13 لېكىن ئىنسان ئۆز ئىززىتىدە تۇرىۋەرمەيدۇ،
ھايۋانلارغا ئوخشاش يوق بولۇپ كېتىدۇ.
14 مانا، بۇ بولسا ئۇلارنىڭ ئەخمەقلىقىنىڭ ئاقىۋىتىدۇر.
شۇنداق بولسىمۇ، ئۇلاردىن كېيىن كەلگەنلەر ئۇلارنىڭ گېپىگە ئەگىشىدۇ.
سېلاھ.
15 ئۇلار قويلاردەك ھەيدىلىپ ئۆلۈكلەر دىيارىغا تاشلىنىدۇ،
ئۆلۈم ئۇلارنىڭ پادىچىسى بولۇپ قالىدۇ.
ئەتىسى سەھەر دۇرۇسلار ئۇلارنىڭ ئۈستىدىن ھۆكۈم سۈرىدۇ.
ئۇلار ئۆز ئۆيلىرىدىن ئايرىلىپ،
ئۆلۈكلەر دىيارىنىڭ لوقمىسى بولۇپ قالىدۇ.
16 لېكىن خۇدا مېنى قوبۇل قىلغاچقا،
ئۇ جېنىمنى ئۆلۈكلەر دىيارىنىڭ ئىلكىدىن قۇتۇلدۇرىدۇ.
سېلاھ.
17 بىر كىشى بېيىپ كېتىپ، ئۆيىنىڭ شان-شەۋكىتى كۆتۈرۈلسىمۇ،
سەن قورقمىغىن.
18 چۈنكى ئۇ ئۆلگەندە ھېچ نەرسىنى ئېلىپ كېتەلمەس،
ئۇنىڭ شان-شەۋكىتى ئۇنىڭغا ئەگەشمەس.
19 گەرچە ئۇ ئۆمۈر بويى ئۆزىنى بەختلىك دەپ ھېسابلىسىمۇ،
ياخشى كۈنلەر كۆرگىنىدە كىشىلەر ئۇنى ھۆرمەتلىسىمۇ،
20 ئۇنىڭ جېنى ئاتا-بوۋىلىرىنىڭ نەسلىگە قوشۇلىدۇ،
ئۇلار مەڭگۈ يورۇقلۇق كۆرەلمەيدۇ.
21 ئىززەت-ھۆرمەتلىك ئەمما ئاڭسىز ئادەم
يوق بولۇپ كېتىدىغان ھايۋانلارغا ئوخشايدۇ.