51
1 نەغمىچىلەرنىڭ بېشىغا تاپشۇرۇلسۇن دەپ، داۋۇد يازغان مەدھىيە ناخشىسى. 2 ناتان پەيغەمبەر، داۋۇدنىڭ باتشېبا بىلەن بىر ئورۇندا ياتقىنى ئۈچۈن ئۇنىڭ يېنىغا كەلگەندىن كېيىن يېزىلغان.
3 ئەي خۇدا، مېھىر-شەپقىتىڭگە مۇناسىپ ماڭا رەھىم قىلغىن،
چەكسىز رەھىمدىللىقىڭدا گۇناھلىرىمنى ئۆچۈرگىن.
4 يامانلىقىمدىن مېنى يۇيۇپ-تازىلاپ،
گۇناھىمدىن مېنى پاك قىلغىن.
5 چۈنكى مەن ئاسىيلىقلىرىمنى ئىقرار قىلىمەن،
گۇناھىم ھەمىشە كۆز ئالدىمدا تۇرىدۇ.
6 مەن پەقەت سېنىڭ ئالدىڭدا گۇناھ قىلىپ،
سېنىڭ نەزىرىڭدە رەزىل بولغان ئىشنى قىلدىم.
ئەمما سەن سۆزلىرىڭدە ھەقلىق،
ھۆكۈملىرىڭدە ئادىلسەن.
7 مانا، مەن گۇناھكار بولۇپ تۇغۇلدۇم،
ئانامنىڭ قورسىقىدا پەيدا بولغىنىمدىلا گۇناھكار ئىدىم.
8 مانا، سەن ھەقىقەتنىڭ ئىچ كۆڭۈلدە بولۇشىنى ئىستەيسەن.
شۇڭا قەلبىمنىڭ چوڭقۇر قاتلىمىلىرىغا ھېكمىتىڭنى سالغىن.
9 مېنى پاك بولسۇن دەپ زۇپا ئۆسۈملۈكى بىلەن پاكلىغىن،
قاردىنمۇ پاك بولسۇن دەپ مېنى يۇغىن. ■
10 ماڭا خۇشاللىق ۋە شادلىق ساداسىنى ئاڭلاتقىن،
سەن سۇندۇرغان ئۇستىخانلار قايتا شادلانسۇن.
11 گۇناھلىرىمدىن يۈزۈڭنى قاچۇرۇپ،
يامانلىقلىرىمنى ئۆچۈرۈۋەتكىن.
12 ئەي خۇدا، ئىچىمدە بىر پاك كۆڭۈل ياراتقىن،
ئىچىمدىكى روھنى يېڭىلاپ قەيسەر قىلغىن.
13 مېنى ھۇزۇرۇڭدىن چىقىرىۋەتمىگىن،
مۇقەددەس روھىڭنى مەندىن قايتۇرۇۋالمىغىن.
14 نىجاتلىقىڭنىڭ شادلىقىنى ماڭا قايتۇرۇپ بەرگىن.
بىر غەيرەتلىك روھ مېنى يۆلەپ تۇرغۇزسۇن.
15 بۇنىڭ بىلەن مەن ئاسىيلىق قىلغۇچىلارغا سېنىڭ يوللىرىڭنى ئۆگىتەي،
گۇناھكارلار ساڭا قايتقاي.
16 ئەي خۇدا، مېنىڭ نىجاتكارىم بولغان خۇدا،
مېنى قان تۆكۈش گۇناھىدىن قۇتقۇزغىن.
تىلىم سېنىڭ ھەققانىيلىقىڭنى كۈيلەپ ناخشا ياڭرىتىدۇ.
17 ئەي ئىگەم، مېنىڭ لەۋلىرىمنى ئاچقايسەن،
ئاغزىم ساڭا ھەمد ئېيتسۇن.
18 چۈنكى سەن قۇربانلىقنى خالىمايسەن،
كۆيدۈرمە قۇربانلىقتىن مەمنۇن بولمايسەن،
بولمىسا مۇنداق قۇربانلىقنى كەلتۈرەتتىم.
19 بەلكى پۇشايمان قىلىپ سۇنغان روھ خۇداغا لايىق قۇربانلىقتۇر.
ئەي خۇدا، سۇنۇق ۋە ئېزىلگەن كۆڭۈلگە سەن سەل قارىمايسەن. ■
20 شاپائىتىڭ بىلەن سىئونغا ياخشىلىق قىلغىن،
يېرۇسالېمنىڭ سېپىللىرىنى قايتا سالغىن.
21 ئۇ چاغدا سەن ھەققانىيلىق بىلەن كەلتۈرۈلگەن قۇربانلىقلاردىن،
كۆيدۈرمە ۋە پۈتۈن قۇربانلىقلاردىن سۆيۈنىسەن.
ئۇ چاغدا سېنىڭ قۇربانلىق سۇپاڭدا تورپاقلار قۇربانلىق قىلىنىدۇ.