55
1 نەغمىچىلەرنىڭ بېشىغا تاپشۇرۇلۇپ، تارلىق سازلار بىلەن ئېيتىلسۇن دەپ، داۋۇد يازغان نەزمە. 2 ئەي خۇدا، دۇئايىمغا قۇلاق سالغىن،
يالۋۇرۇشۇمدىن ئۆزۈڭنى قاچۇرمىغىن.
3 ماڭا دىققىتىڭنى بەرگىن ۋە جاۋاب بەرگىن.
مەن دەرد-ئەلەم ئىچىدە تولغىنىپ،
داد-پەرياد قىلىپ يۈرىمەن.
4 دۈشمەننىڭ ئۈنلۈك ئاۋازلىرى
ۋە رەزىللەرنىڭ زۇلۇمى سەۋەبىدىن پەرياد كۆتۈرىمەن،
چۈنكى ئۇلار بېشىمغا يامانلىق كەلتۈرۈپ،
غەزەپ بىلەن مېنى قىينايدۇ.
5 ئىچىمدە يۈرىكىم ئازابتىن تولغاندى،
ئۆلۈم ۋەھشەتى ئۈستۈمنى باستى.
6 قورقۇنچ ۋە تىترەك مېنى چىرمىۋالدى،
دەھشەت مېنى بېسىۋالدى.
7 كاشكى كەپتەردەك قانىتىم بولسا ئىدى،
ئۇچۇپ كېتىپ ئارام تاپار ئىدىم.
8 مەن يىراققا قېچىپ كېتىپ،
چۆل-باياۋاندا قونار ئىدىم.
سېلاھ.
9 بوران-چاپقۇن ۋە قارا يامغۇردىن قېچىپ،
ئالدىراپ پاناھ جايغا قاچار ئىدىم.
10 ئەي ئىگەم، ئۇلارنى قالايمىقانچىلىققا سېلىپ،
تىللىرىنى بۆلۈۋەتكىن.
چۈنكى شەھەردە زوراۋانلىق
ۋە جېدەل-ماجىرا كۆردۈم.
11 ئۇلار كېچە-كۈندۈز شەھەرنىڭ سېپىللىرىنىڭ ئۈستىدە ئايلىنىپ يۈرىدۇ.
شەھەرنىڭ ئىچى يامانلىق ۋە مۇسىبەت بىلەن تولغان.
12 رەزىللىك ئۇنىڭ ئىچىدە تۇرىدۇ،
زۇلۇم ۋە ھىيلە ئۇنىڭ كوچىلىرىدىن كەتمەيدۇ.
13 دۈشمىنىم ئەمەس ماڭا ھاقارەت قىلغۇچى،
بولمىسا ئۇنىڭغا چىدايتتىم.
ھاكاۋۇرلۇق بىلەن ماڭا قارشى چىققان كىشى
ئەسلى مېنى ئۆچ كۆرگۈچى ئەمەس،
بولمىسا ئۇنىڭدىن ئۆزۈمنى يوشۇراتتىم.
14 ئەمما سەن، مېنىڭ تەڭدىشىم،
مېنىڭ دوستۇم ۋە ئادىشىم تۇرۇپ، بۇنى قىلدىڭ.
15 بىز بىر-بىرىمىز بىلەن ئىناق ئۆتكەن سىرداش ئىدۇق،
بىللە مېڭىپ جامائەتكە قوشۇلۇپ، خۇدانىڭ بەيتىگە باراتتۇق.
16 ئۆلۈم ئۇلارنى تۇيۇقسىز بېسىۋالسۇن،
ئۇلار ھايات تۇرۇپ، ئۆلۈكلەر دىيارىغا چۈشۈپ كەتسۇن،
چۈنكى ئۇلارنىڭ ماكانلىرى ۋە كۆڭۈللىرى يامانلىققا تولغان.
17 مەن بولسام پەرۋەردىگارغا پەرياد قىلىمەن،
ئۇ مېنى قۇتقۇزىدۇ.
18 ئاخشامدا، ئەتىگەندە ۋە چۈش ۋاقتىدا پەرياد قىلىپ ئاخ ئۇرسام،
ئۇ ئاۋازىمنى ئاڭلايدۇ.
19 ماڭا ھۇجۇم قىلغانلار كۆپ بولسىمۇ،
ماڭا قارشى قىلىنغان جەڭدىن ئۇ مېنى قۇتۇلدۇرۇپ،
جېنىمغا ئارام بېرىدۇ.
20 ئەزەلدىن بېرى ئۆز تەختىدە ئولتۇرغان خۇدا ئاڭلايدۇ،
ۋە ئۇلارغا جازا بېرىدۇ.
سېلاھ.
چۈنكى ئۇلاردا ھېچقانداق ئۆزگىرىش يوق،
ئۇلار خۇدادىن قورقمايدۇ.
21 ئۇ ئۆزى بىلەن دوست بولغانلارغا قارشى مۇشت كۆتۈردى،
ئۆزى بەرگەن ۋەدىسىنى بۇزدى. ■
22 ئۇنىڭ ئاغزىدىكى سۆزلەر سېرىق مايدەك سىلىق بولسىمۇ،
كۆڭلى ئۆچمەنلىك بىلەن تولغان.
ئۇنىڭ سۆزلىرى ياغدىن يۇمشاق بولسىمۇ، ئەسلىدە سۇغۇرۇلغان قىلىچلاردۇر.
23 يۈكۈڭنى پەرۋەردىگارغا تاپشۇرغىن، ئۇ سېنى يۆلەيدۇ.
ئۇ ھەققانىي ئادەمنىڭ تەۋرىنىشىگە مەڭگۈ يول قويمايدۇ.
24 سەن، ئەي خۇدا، ئۇلارنى ھالاكەتنىڭ ھاڭىغا تاشلايسەن.
قانخور ۋە ھىيلىگەر كىشىلەر ئۆمرىنىڭ يېرىمىگىچە ياشىيالماس.
بىراق مەن بولسام، ساڭا تايىنىمەن. ■