62
1 نەغمىچىلەرنىڭ بېشىغا تاپشۇرۇلۇپ «يەدۇتۇن» دېگەن ئاھاڭدا ئېيتىلسۇن دەپ، داۋۇد يازغان مەدھىيە ناخشىسى. 2 بىر خۇدادىنلا مېنىڭ جېنىم ئارام تاپىدۇ،
مېنىڭ نىجاتلىقىم ئۇنىڭدىن كېلىدۇ.
3 پەقەت ئۇ مېنىڭ قورام تېشىم ۋە نىجاتكارىم.
ئۇ مېنىڭ ئېگىز قەلئەم بولغاچقا، مەن تەۋرەنمەيمەن.
4 سىلەر قاچانغىچە ئاجىز بىر ئىنسانغا ھۇجۇم قىلىسىلەر؟
سىلەر ھەممىڭلار ئۇنى بىر قىيسىق تام
ياكى لىڭشىق بىر قاشا كەبى يىقىتماقچىمۇ؟
5 ئۇلارنىڭ مەقسىتى پەقەتلا
ئۇنى مەرتىۋىسىدىن چۈشۈرۈۋېتىشتۇر.
ئۇلار يالغانچىلىققا بېرىلىپ،
ئاغزىنىڭ ئۇچىدا بەرىكەت تىلەيدۇ،
لېكىن كۆڭلىدە لەنەت ئوقۇيدۇ.
سېلاھ.
6 ئەي جېنىم، خۇدادىن ئارام تاپقىن،
چۈنكى ئۈمىدىم ئۇنىڭدىدۇر.
7 پەقەت ئۇ مېنىڭ قورام تېشىم ۋە نىجاتكارىمدۇر.
ئۇ مېنىڭ ئېگىز قەلئەم بولغاچ،
مەن تەۋرەنمەيمەن.
8 نىجاتلىقىم ۋە شان-شۆھرىتىم خۇدادىندۇر.
قۇدرەتلىك قورام تېشىم ۋە پاناھگاھىم خۇدادۇر.
9 ئەي خالايىق، ھەمىشە ئۇنىڭغا تايىنىڭلار،
يۈرەكتىكى دەردلىرىڭلارنى ئۇنىڭ ئالدىدا تۆكۈڭلار.
بىزنىڭ پاناھگاھىمىز خۇدادۇر.
سېلاھ.
10 ئادەم بالىلىرى پەقەتلا بىر تىنىقتۇر،
ئېسىلزادىلەرمۇ بىر يالغاندۇر.
ئۇلار تارازىغا سېلىنغاندا كۆتۈرۈلۈپ كېتىدۇ،
چۈنكى ئۇلارنىڭ ھەممىسى قوشۇلسىمۇ، نەپەستىن يېنىك چىقىدۇ.
11 سىلەر زۇلۇمغا تايانماڭلار،
بۇلاڭچىلىقتىن پايدا تېپىشنى ئويلىماڭلار.
ئەگەر بايلىقىڭلار ئاۋۇپ كەتسە،
ئۇنىڭغا كۆڭۈل بەرمەڭلار.
12 خۇدا بىر قېتىم سۆزلىدى،
مەن ئىككى قېتىم بۇنى ئاڭلىدىم:
«كۈچ-قۇدرەت خۇداغا مەنسۇپتۇر».
13 ئەي ئىگەم، مېھىر-شەپقەتمۇ ساڭا مەنسۇپتۇر.
سەن ھەربىر ئادەمگە ئۆز ئەمەللىرىگە قاراپ قايتۇرىسەن.