63
1 داۋۇد يەھۇدا چۆلىدە تۇرغان چاغدا يازغان مەدھىيە ناخشىسى. 2 ئەي خۇدا، سەن مېنىڭ خۇدايىم.
مەن تاڭ سەھەردە سېنى ئىزدەيمەن،
جېنىم ساڭا تەشنادۇر.
سۈيى يوق قۇرۇق، قاقاس زېمىندا
ۋۇجۇدۇم سېنى سېغىنىدۇ.
3 سېنىڭ قۇدرىتىڭ ۋە شان-شەرىپىڭنى كۆرەي دەپ،
مۇقەددەس جايدا ساڭا تەلمۈرۈپ قارىدىم.
4 چۈنكى سېنىڭ مېھىر-شەپقىتىڭ ھاياتتىن ئەۋزەلدۇر.
لەۋلىرىم سېنى مەدھىيىلەيدۇ.
5 مەن ئۆمرۈم بويى سېنى ئۇلۇغلايمەن.
سېنىڭ نامىڭدا قوللىرىمنى كۆتۈرىمەن.
6 جېنىم يىلىك ۋە ياغدىن تويغاندەك بولىدۇ.
ئاغزىم خۇشاللىق بىلەن سېنى مەدھىيىلەيدۇ.
7 ئورنۇمدا ياتسام، سېنى ياد ئېتىمەن،
تۈن كېچىلەردە سېنى ئويلايمەن.
8 چۈنكى سەن مېنىڭ ياردەمچىمسەن،
سېنىڭ قاناتلىرىڭنىڭ سايىسىدا شادلىنىپ ناخشا ياڭرىتىمەن.
9 جېنىم ساڭا يېپىشىپ ئەگىشىدۇ،
ئوڭ قولۇڭ مېنى يۆلەيدۇ.
10 لېكىن مېنىڭ جېنىمنى يوقىتىشنى قەستلىگەنلەر،
يەرنىڭ تېگىگە چۈشۈپ كېتەر.
11 ئۇلار قىلىچقا تاپشۇرۇلار،
چىلبۆرىلەرگە يەم بولار.
12 پادىشاھ بولسا خۇدادىن شادلىنار،
ئۇنىڭ نامى بىلەن قەسەم قىلغۇچىلارنىڭ ھەممىسى ئۇنى ئۇلۇغلار،
چۈنكى يالغان سۆزلىگۈچىلەرنىڭ ئاغزى يۇمۇلار.