64
1 نەغمىچىلەرنىڭ بېشىغا تاپشۇرۇلسۇن دەپ، داۋۇد يازغان مەدھىيە ناخشىسى. 2 ئەي خۇدا، پەرياد قىلغىنىمدا ئاۋازىمنى ئاڭلىغىن،
جېنىمنى دۈشمەننىڭ قورقۇتۇشىدىن ساقلىغىن.
3 مېنى رەزىللەرنىڭ سۇيىقەستلىرىدىن،
يامانلىق قىلغۇچىلارنىڭ مالىمانچىلىق چىقىرىدىغان توپىدىن ساقلىغىن.
4 چۈنكى ئۇلار تىللىرىنى قىلىچتەك بىلەيدۇ،
ئاچچىق گەپلەرنى ئوقيادەك بەتلەيدۇ.
5 ئۇلار بىگۇناھ كىشىنى ئېتىش ئۈچۈن
يوشۇرۇن جايدا مۆكۈپ تۇرۇپ،
تۇيۇقسىز ئۇنىڭغا ئوق ئاتىدۇ،
چۈنكى ئۇلار ھېچ نېمىدىن قورقمايدۇ.
6 ئۇلار بىر-بىرىنى يامانلىققا قۇترىتىپ:
«كىم بىزنى كۆرەتتى؟» دەپ
يوشۇرۇن قىلتاق قۇرۇشنى مەسلىھەتلىشىدۇ.
7 ئۇلار سۇيىقەستلەرنى ئويلاپ چىقىپ:
«مانا، مەسلىھەتىمىز ئوبدان پىشتى» دەيدۇ.
ئىنساننىڭ ئىچكى ئوي-خىياللىرى
يۈرىكىنىڭ چوڭقۇر يېرىگە يوشۇرۇلغاندۇر.
8 لېكىن خۇدا ئۇلارغا ئوق ئاتار.
ئۇلار تۇيۇقسىز زەربە يەر.
9 ئۇلار ئۆز تىللىرىدىن ئىلىنىپ، يىقىلىپ چۈشەر.
ئۇلارنى كۆرگەنلەر ئارقىغا چېكىنەر.
10 ھەممە خەلق قورقۇپ، خۇدانىڭ ئىشلىرىنى بايان قىلار.
ئۇلار ئۇنىڭ ئەمەللىرى ئۈستىدې ئويلىنىپ، ساۋاق ئالار.
11 ھەققانىي ئادەم پەرۋەردىگاردىن شادلىنىپ، ئۇنىڭغا تايىنار.
كۆڭلى دۇرۇسلار ئۇنىڭدىن پەخىرلىنەر.