65
1 نەغمىچىلەرنىڭ بېشىغا تاپشۇرۇلسۇن دەپ، داۋۇد يازغان ناخشا. بىر مەدھىيە ناخشىسى. 2 ئەي خۇدا، سىئوندا ساڭا ھەمدۇسانا ئېيتىلىدۇ،
ۋەدىلەر ساڭا ئادا قىلىنىدۇ.
3 ئەي دۇئانى ئىجابەت قىلغۇچى،
ھەممە ئىنسان سېنىڭ ئالدىڭغا كېلىدۇ. ■
4 يامان ئىشلار مېنىڭ ئۈستۈمدىن غالىب كەلدى،
لېكىن سەن گۇناھلىرىمىزنى كەچۈرۈم قىلىسەن.
5 سەن ئۇنى ھويلىلىرىمدا ئولتۇرسۇن دەپ تاللىغان،
ئۆزۈڭگە يېقىنلاشتۇرغان كىشى نەقەدەر بەختلىكتۇر!
بىز سېنىڭ بەيتىڭنىڭ بەرىكىتىدىن،
ئىبادەتخاناڭنىڭ مۇقەددەس نېمىتىدىن تويۇپ سۆيۈنىمىز.
6 ئەي بىزنىڭ نىجاتكارىمىز بولغان خۇدا،
يەرنىڭ چەتلىرى ۋە دېڭىزنىڭ يىراق جايلىرىغىچە پاناھگاھ بولغۇچى،
سەن ئاجايىپ ئىشلار قىلىپ،
ئادالەت بىلەن دۇئالىرىمىزنى ئىجابەت قىلىسەن.
7 سەن قۇدرەت بىلەن بېلىڭنى باغلاپ،
ئۆز كۈچۈڭ بىلەن تاغلارنى تۇرغۇزۇپ تىكلىدىڭ.
8 سەن دېڭىزلارنىڭ ئۆركەشلىگەن سۇلىرىنى،
دولقۇنلىرىنىڭ شاۋقۇنلىرىنى
ۋە خەلقلەر ئارىسىدىكى چۇقانلارنى تىنجىتقۇچىسەن.
9 يەرنىڭ چەتلىرىدە ياشاۋاتقانلار
كارامەتلىرىڭدىن ئەيمىنەر.
كۈن چىقىش ۋە كۈن پېتىشنى شادلىق ساداسىغا تولدۇرىسەن.
10 سەن يەرنى يوقلاپ، ئۇنى سۇغىرىپ يۇقىرى ھوسۇللۇق قىلىسەن،
چۈنكى خۇدانىڭ دەرياسى سۇغا تولغان.
سەن ئادەملەرنى ئاشلىق بىلەن تەمىنلەشكە يەرنى راسلايسەن.
11 سەن ئۇنىڭ چۆنەكلىرىنى كەڭرىچىلىك بىلەن سۇغىرىپ،
يامغۇر بىلەن ئۇنى يۇمشىتىپ،
ئۇنىڭدا ئۈنگەن زىرائەتلەرنى ئۆستۈرىسەن.
12 سەن يىلنى ياخشى نېمەتلىرىڭ بىلەن تاجلاندۇرىسەن.
قەدەملىرىڭدىن ياغ تېمىپ تۇرۇپ، ■
13 باياۋاننىڭ يايلاقلىرىغا تامچىلاپ چۈشىدۇ.
دۆڭلۈكلەر شادلىقنى بەلۋاغ قىلىدۇ.
14 يايلاقلار پادىلاردىن غۇچ-غۇچ تولۇپ كەتكەن،
ۋادىلار ئاشلىق بىلەن قاپلانغان.
ئۇلار خۇشاللىقتىن چۇقان سېلىپ،
ناخشا ياڭرىتىدۇ.