66
1 نەغمىچىلەرنىڭ بېشىغا تاپشۇرۇلغان ناخشا، بىر مەدھىيە ناخشىسى. ئەي بارلىق ئەللەر،
خۇدانى مەدھىيىلەپ ئاۋازىڭلارنى ياڭرىتىڭلار.
2 ئۇنىڭ نامىنىڭ شان-شەرىپىگە مەدھىيە ناخشىلىرىنى ئېيتىڭلار،
مەدھىيىلەر بىلەن ئۇنى ئۇلۇغلاڭلار.
3 سىلەر خۇداغا مۇنداق دەڭلار:
«سېنىڭ ئىشلىرىڭ نەقەدەر ھەيۋەتلىكتۇر،
سېنىڭ دۈشمەنلىرىڭ ئۇلۇغ قۇدرىتىڭدىن قورقۇپ ساڭا بويسۇنىدۇ.
4 ھەممە ئەللەر ساڭا سەجدە قىلىپ مەدھىيە ناخشىلىرىنى ئېيتىپ،
نامىڭغا ھەمدۇسانا ئوقۇيدۇ».
سېلاھ.
5 كېلىڭلار، خۇدانىڭ ئەمەللىرىنى كۆرۈڭلار.
ئۇنىڭ ئادەم بالىلىرىغا قىلغان ئىشلىرى ھەيۋەتلىكتۇر.
6 ئۇ دېڭىزنى قۇرۇقلۇققا ئايلاندۇرغاندىن كېيىن،
ئۇلار دەريادىن پىيادە ئۆتۈپ كەتتى.
بىز ئۇ يەردە ئۇنىڭدىن خۇرسەن بولدۇق.
7 ئۇ ئۆز قۇدرىتى بىلەن ئەبەدكىچە ھۆكۈم سۈرىدۇ.
ئۇنىڭ كۆزلىرى خەلقلەرنى كۆرۈپ تۇرغاچقا،
ئاسىيلار تەكەببۇرلۇق قىلمىسۇن.
سېلاھ.
8 ئەي خالايىق، خۇدايىمىزنى ئۇلۇغلاڭلار،
ئۈنلۈك ئاۋاز بىلەن ئۇنىڭغا ھەمدۇسانا ئېيتىڭلار.
9 چۈنكى ئۇ جېنىمىزنى تىرىك ساقلىغان،
پۇتلىرىمىزنىڭ تېيىلىپ كېتىشىگە يول قويمىغان.
10 ئەي خۇدا، سەن بىزنى سىنىدىڭ،
كۈمۈش تاۋلىغاندەك بىزنى تاۋلىدىڭ.
11 سەن بىزنى تورغا چۈشۈردۈڭ،
دۈمبىمىزگە ئېغىر يۈك ئارتىپ قويدۇڭ.
12 باشلىرىمىزنىڭ ئۈستىگە خەلقلەرنى مىندۈردۈڭ،
بىزنى ئوت ۋە سۇدىن ئۆتكۈزدۈڭ.
لېكىن بىزنى يەنە كەڭرىچىلىككە چىقاردىڭ.
13 مەن بولسام، كۆيدۈرمە قۇربانلىقلارنى ئېلىپ
سېنىڭ ئۆيۈڭگە كىرىمەن.
14 ئازاب-ئوقۇبەتتە قالغىنىمدا ئاغزىمدىن چىققان،
لەۋلىرىم ساڭا سۆزلىگەن ۋەدىلىرىمنى
ساڭا ئادا قىلىمەن.
15 سېمىز ھايۋانلارنى كۆيدۈرمە قۇربانلىق سۈپىتىدە،
قوچقارلارنىڭ خۇشبۇيى بىلەن بىللە ساڭا قۇربانلىق قىلىمەن،
بۇقا ۋە تېكىلەرنىمۇ ساڭا سۇنىمەن.
سېلاھ.
16 ئەي خۇدادىن قورقىدىغانلارنىڭ ھەممىسى، كېلىپ ئاڭلاڭلار.
مەن ئۈچۈن ئۇنىڭ نېمە قىلغىنىنى مەن سىلەرگە دەپ بېرەي.
17 ئاغزىم بىلەن ئۇنىڭغا يالۋۇردۇم.
تىلىم بىلەن ئۇنى مەدھىيىلىدىم.
18 ئەگەر مەن كۆڭلۈمدە يامان خىيال قىلغان بولسام،
ئىگەم ماڭا قۇلاق سالماس ئىدى.
19 لېكىن خۇدا مېنى تىڭشاپ،
دۇئايىمنىڭ ساداسىغا قۇلاق سالدى.
20 دۇئايىمنى رەت قىلمىغان،
مېھىر-شەپقىتىنى مەندىن ئايىمىغان خۇداغا
ھەمدۇسانا بولغاي.