68
1 نەغمىچىلەرنىڭ بېشىغا تاپشۇرۇلسۇن دەپ، داۋۇد يازغان مەدھىيە ناخشىسى. 2 خۇدا قوزغالسۇن،
ئۇنىڭ دۈشمەنلىرى تىرىپىرەن بولسۇن،
ئۇنىڭغا ئۆچمەنلەر ئۇنىڭ ئالدىدىن قاچسۇن.
3 تۈتۈن ئۆرلەپ تارىلىپ كەتكەندەك
سەن ئۇلارنى تارىتىۋېتىسەن.
ئاق موم ئوتنىڭ ئالدىدا ئېرىپ كەتكەندەك
يامانلار خۇدانىڭ ئالدىدا ھالاك بولىدۇ.
4 ئەمما ھەققانىيلار بولسا خۇشال بولىدۇ.
ئۇلار خۇدانىڭ ھۇزۇرىدا شادلىنىپ، خۇشاللىققا چۆمىدۇ.
5 خۇدانى كۈيلەڭلار،
ئۇنىڭ نامىغا مەدھىيە ناخشىلىرىنى ئېيتىڭلار.
چۆل-باياۋانلاردىن ئۆتۈپ ماڭغۇچىغا ئېگىز يول ھازىرلاڭلار.
ئۇنىڭ نامى پەرۋەردىگاردۇر.
ئۇنىڭ ھۇزۇرىدا شادلىنىڭلار. ■
6 ئۇ يېتىملارنىڭ ئاتىسى ۋە تۇل خوتۇنلارنىڭ دەۋاسىنى سورىغۇچى،
ئۆز مۇقەددەس ماكانىدا تۇرغان خۇدادۇر.
7 خۇدا يالغۇز بولغانلارنى ئۆي-ئوچاقلىق قىلىدۇ،
زەنجىر بىلەن باغلانغانلارنى ئازادلىققا چىقىرىدۇ.
ئەمما ئاسىيلار قاقاس زېمىندا ياشايدۇ.
8 ئەي خۇدا، سەن خەلقىڭنىڭ ئالدىدا ماڭغىنىڭدا،
چۆل-باياۋاندىن ئۆتۈپ بارغىنىڭدا،
سېلاھ.
9 خۇدانىڭ ھۇزۇرىدا يەر تەۋرىنىپ كەتتى، ئاسمان يېغىن ياغدۇردى.
ئىسرائىلنىڭ خۇداسى بولغان خۇدانىڭ ئالدىدا
سىنا تېغى سىلكىنىپ كەتتى.
10 سەن، ئەي خۇدا، مول يامغۇر ياغدۇردۇڭ،
خارابلاشقان مىراس زېمىنىڭنى ياشارتىپ كۈچلەندۈردۈڭ.
11 ئۇنىڭ ئىچىدە سېنىڭ خەلقىڭ ماكان تۇتتى.
ئەي خۇدا، مېھرىبانلىقىڭدا ئۇنى بىچارىلەر ئۈچۈن راسلاپ بەردىڭ.
12 ئىگىمىز سۆزىنى ئەۋەتتى.
چوڭ ئاياللار توپى خۇش خەۋەرنى جاكارلىدى.
13 قوشۇنلارنىڭ پادىشاھلىرى بولسا قېچىپ كەتتى.
ئۆيدە قالغان ئاياللار ئولجىنى بۆلۈشتى.
14 سىلەر قوتانلىرىڭلار ئىچىدە ياتقىنىڭلاردا،
قاناتلىرى كۈمۈشتىن بولغان،
پەيلىرى ساپ ئالتۇندىن قاپلانغان كەپتەرگە ئوخشايسىلەر.
15 ھەممىگە قادىر خۇدا زېمىندىكى پادىشاھلارنى تىرىپىرەن قىلغىنىدا،
يەر قار قاپلىغان زالموننىڭ تېغىدەك ئاپئاق بولدى.
16 باشان تېغى ھەيۋەتلىك تاغدۇر.
باشان تېغى ئېگىز چوققىلىرى كۆپ بىر تاغدۇر.
17 ئەي ئېگىز تاغلار، نېمىشقا خۇدا ئۆزىگە
ماكان قىلىپ تاللىغان تاغقا ھەسەت بىلەن قارايسىلەر؟
پەرۋەردىگار شۇ تاغدا ئەبەدكىچە ماكان تۇتىدۇ.
18 خۇدانىڭ جەڭ ھارۋىلىرى تۈمەنلىگەندۇر،
مىڭ مىڭلىغاندۇر.
ئىگەم ئۇلار ئارىسىدا تۇرىدۇ.
ئۇ سىنا تېغىدىن مۇقەددەس جايغا كېلىدۇ.
19 سەن يۇقىرىغا چىققاندا ئەسىرلەرنى ئېلىپ كېتىسەن،
ئادەملەردىن ھەدىيەلەر قوبۇل قىلىسەن، ھەتتا ئاسىيلاردىن.
پەرۋەردىگار خۇدا ئۇ يەردە ماكان تۇتىدۇ.
20 ھەر كۈنى يۈكلىرىمىزنى كۆتۈرىدىغان ئىگىمىزگە ھەمدۇسانا بولغاي.
ئۇ بىزنى قۇتقۇزىدىغان خۇدايىمىزدۇر.
سېلاھ.
21 خۇدايىمىز نىجاتلىق ئاتا قىلىدىغان خۇدادۇر،
ئۆلۈمدىن قۇتقۇزۇش ئىگىمىز پەرۋەردىگارغا خاستۇر.
22 لېكىن خۇدا دۈشمەنلىرىنىڭ بېشىنى يارىدۇ،
گۇناھ يولىدا مېڭىۋېرىدىغانلارنىڭ چاچلىق كاللىسىنى ئېزىدۇ.
23 ئىگىمىز مۇنداق دېدى:
«مەن ئۇلارنى باشاندىن قايتۇرۇپ كېلىمەن،
مەن ئۇلارنى چوڭقۇر دېڭىزنىڭ تېگىدىن قايتۇرۇپ كېلىمەن.
24 شۇنىڭ بىلەن سېنىڭ دۈشمەنلىرىڭنىڭ قېنىغا مىلىنىدۇ،
ئىتلىرىڭنىڭ تىلىمۇ ئۇلاردىن نېسىۋىسىنى ئالىدۇ».
25 ئەي خۇدا، خەلق سېنىڭ مېڭىپ يۈرگىنىڭگە نەزەر سالدى،
ئەي خۇدايىم، مېنىڭ پادىشاھىم،
ئۇلار مۇقەددەس جايغا كىرگىنىڭنى كۆردى.
26 ئالدىدا ناخشا ئېيتقۇچىلار يۈردى،
كەينىدىن ساز سالغۇچىلار ئەگىشىپ كەلدى.
داپ چالىدىغان قىزلار بولسا ئوتتۇرىدا ئىدى:
27 «ئەي ئىسرائىلنىڭ بۇلىقىدىن چىققانلار،
يىغىلىشلاردا رەببىمىز خۇداغا ھەمدۇسانا ئېيتىڭلار» دېيىشتى.
28 قەبىلىلەرنىڭ كىچىكى بولغان بەنيامىن باشلامچى بولۇپ ئالدىدا ماڭدى.
كۆپچىلىكنىڭ ئارىسىدا ماڭغان يەھۇدانىڭ ئەمىرلىرى،
زەبۇلۇننىڭ ئەمىرلىرى ۋە نافتالىنىڭ ئەمىرلىرىمۇ ئەگەشتى.
29 سېنىڭ خۇدايىڭ ساڭا كۈچ ئاتا قىلدى.
ئەي خۇدا، بىز ئۈچۈن قىلغىنىڭنى مۇستەھكەملىگىن.
30 يېرۇسالېمدىكى ئىبادەتخاناڭ ۋەجىدىن
پادىشاھلارمۇ ساڭا ھەدىيە ئېلىپ كېلىدۇ.
31 قومۇشلۇقتىكى يىرتقۇچ ھايۋانلارغا،
بۇقىلارنىڭ توپى ۋە موزايلارغا ئوخشايدىغان خەلقلەرگە تەنبىھ بەرگىن.
ئۇلار كۈمۈشلىرىنى ئېلىپ كېلىپ، ساڭا بويسۇنسۇن.
جەڭ قىلىشقا ئامراق خەلقلەرنى پاراكەندە قىلغىن.
32 مىسىردىن ئەمىرلەر چىقىپ كېلىدۇ،
كۇش خەلقى ئالدىراپ قوللىرىنى خۇدا تەرەپكە كۆتۈرىدۇ.
33 ئەي يەر يۈزىنىڭ پادىشاھلىقلىرى، خۇدانى كۈيلەڭلار،
ئىگىمىزگە مەدھىيە ناخشىلىرىنى ئېيتىڭلار.
سېلاھ.
34 ئۇ قەدىمدىن بار بولغان ئاسمانلارنىڭ ئاسمىنى ئۈستىگە مىنىپ يۈرگۈچى،
ئۇ ئاۋازىنى، قۇدرەتلىك ئاۋازىنى ياڭرىتىدۇ.
35 خۇدانىڭ قۇدرىتىنى تونۇڭلار!
ئۇنىڭ شان-شەۋكىتى ئىسرائىلنىڭ ئۈستىدىدۇر،
ئۇنىڭ كۈچ-قۇدرىتى بۇلۇتلاردا نامايان بولىدۇ.
36 ھەيۋەتلىكسەن، ئەي خۇدا، مۇقەددەس جايىڭدا.
ئىسرائىلنىڭ خۇداسى ئۆز خەلقىگە قۇدرەت ۋە قۇۋۋەت ئاتا قىلىدۇ.
خۇداغا ھەمدۇسانا بولغاي.
ئىسرائىلىيەنىڭ تاغ-جىلغىلىرى («زەب.» 16:68)