69
1 نەغمىچىلەرنىڭ بېشىغا تاپشۇرۇلۇپ، «نىلۇپەرلەر» دېگەن ئاھاڭدا ئېيتىلسۇن دەپ، داۋۇد يازغان ناخشا. 2 ئەي خۇدا، مېنى قۇتقۇزغىن،
چۈنكى سۇلار مېنى بېسىپ، تۇمشۇقۇمغا يەتتى.
3 مەن تېگى يوق چوڭقۇر پاتقاققا پېتىپ قالدىم،
چوڭقۇر سۇلار ئىچىگە چۆكۈپ كەتتىم،
كەلكۈن مېنى غەرق قىلدى.
4 مەن پەرياد قىلىپ ھالىمدىن كەتتىم.
گېلىم قۇرۇدى.
خۇدايىمغا تەلمۈرۈپ، كۆزلىرىم تېلىپ كەتتى.
5 سەۋەبسىز ماڭا ئۆچمەنلىك قىلغۇچىلار بېشىمدىكى چاچتىنمۇ كۆپتۇر.
ماڭا ناھەق دۈشمەن بولۇپ، مېنى يوقىتىشنى قەستلىگۈچىلەر كۈچلۈكتۇر.
مەن ئېلىۋالمىغان نەرسىنى قايتۇرۇشقا مەجبۇرلىنىمەن.
6 ئەي خۇدا، نادانلىقىمنى سەن بىلىسەن،
گۇناھلىرىم سەندىن يوشۇرۇن ئەمەس.
7 ئەي رەببىم، ساماۋى قوشۇنلارنىڭ سەردارى پەرۋەردىگار،
ساڭا ئۈمىد باغلىغانلار مېنىڭ سەۋەبىمدىن ئۇياتتا قالمىسۇن.
ئەي ئىسرائىلنىڭ خۇداسى،
سېنى ئىزدىگۈچىلەر مېنىڭ سەۋەبىمدىن شەرمەندە بولمىسۇن.
8 چۈنكى سەن ئۈچۈن مەن ھاقارەتلەندىم،
سەن ئۈچۈن خىجالەت يۈزۈمنى قاپلىدى.
9 مەن ئۆز قېرىنداشلىرىمغا ناتونۇشتەك كۆرۈنۈپ قالدىم،
ئانامنىڭ ئۆز بالىلىرىغا يات بولۇپ قالدىم.
10 چۈنكى ئۆيۈڭگە بولغان ئوتلۇق غەيرىتىم مېنى يەپ كەتتى،
ساڭا ھاقارەت قىلغۇچىلارنىڭ ھاقارىتى مېنىڭ ئۈستۈمگە چۈشتى.
11 مەن يىغلاپ روزا تۇتۇپ جېنىمنى قىينىسام،
ئوخشاشلا ئىزا-ئاھانەتكە قالدىم.
12 مەن بۆز رەختكە يۆگىنىپ قايغۇرۇپ يۈرسەم،
ئۇلارنىڭ ئارىسىدا سۆز-چۆچەككە قالدىم.
13 دەرۋازىدا ئولتۇرغۇچىلارنىڭ تەنە گېپىگە قالدىم،
مەيخورلارنىڭ قوشاقلىرىغا قېتىلدىم.
14 لېكىن مەن بولسام، ئەي پەرۋەردىگار،
مۇۋاپىق ۋاقىتتا ساڭا دۇئا قىلىمەن.
ئەي خۇدا، كاتتا مېھىر-شەپقىتىڭ ۋەجىدىن،
ۋاپادارلىقىڭدا ماڭا جاۋاب بېرىپ مېنى قۇتقۇزغىن.
15 پاتقاقنىڭ ئىچىدىن مېنى چىقارغىن،
پېتىپ كېتىشىمگە يول قويمىغىن.
ماڭا ئۆچلەردىن مېنى قۇتقۇزغىن،
ۋە چوڭقۇر سۇلاردىن مېنى قۇتۇلدۇرغىن.
16 كەلكۈن سۇلىرى مېنى بېسىپ كەتمىسۇن،
چوڭقۇر سۇلار مېنى يۇتۇۋالمىسۇن،
ھاڭ مېنىڭ ئۈستۈمگە ئاغزىنى ئېتىۋالمىسۇن.
17 ئەي پەرۋەردىگار، ماڭا جاۋاب بەرگىن،
چۈنكى سېنىڭ مېھىر-شەپقىتىڭ كاتتىدۇر.
چەكسىز رەھىمدىللىقىڭ بىلەن ماڭا يۈزلەنگىن.
18 خىزمەتكارىڭدىن يۈزۈڭنى يوشۇرمىغىن،
ماڭا تېز جاۋاب بەرگىن،
چۈنكى ئازاب-ئوقۇبەتتە قالدىم.
19 ماڭا يېقىنلىشىپ، جېنىمنى قۇتۇلدۇرغىن،
مېنى دۈشمەنلىرىمدىن ئازاد قىلغىن.
20 مېنىڭ قانداق قىلىپ ھاقارەتكە ئۇچرىغىنىمنى،
ئۇياتقا ۋە ئاھانەتكە قالغىنىمنى سەن بىلىسەن،
ماڭا قارشى چىققانلارنىڭ ھەممىسىنى كۆرۈپ تۇرىسەن.
21 ھاقارەت يۈرىكىمنى پارە-پارە قىلدى.
مەن دەردكە تولدۇم.
دەردلەشكۈدەك بىرىنى ئىزدىدىم،
بىرىمۇ چىقمىدى.
تەسەللى بەرگۈچىلەرگە تەلمۈردۈم،
ئەمما بىرىنىمۇ تاپالمىدىم.
22 ئۇلار يېيىشكە ماڭا ئۆت بەردى،
ئۇسسىغىنىمدا ماڭا سىركە ئىچۈردى.
23 ئۇلارنىڭ ئالدىدىكى داستىخىنى ئۆزلىرىگە قىلتاق بولغاي،
ھەمراھلىرىغا قاپقان بولغاي.
24 كۆزلىرى كۆرەلمىگۈدەك قاراڭغۇلىشىپ كەتسۇن،
بەللىرى ھەمىشە تىترەپ تۇرسۇن.
25 قەھرىڭنى ئۇلارنىڭ ئۈستىگە ياغدۇرغىن،
غەزەپ ئوتۇڭ ئۇلارغا تۇتاشسۇن.
26 ئۇلارنىڭ ماكانى ۋەيران بولسۇن،
چېدىرلىرىدا ئولتۇرىدىغانلار قالمىسۇن.
27 چۈنكى ئۇلار سەن ئۇرغانلارغا زىيانكەشلىك قىلىدۇ،
سەن زەخىملەندۈرگەنلەرنىڭ ئازابىغا ئازاب قوشىدۇ.
28 ئەمدى سەن ئۇلارنىڭ گۇناھىغا گۇناھ قوشقىن،
ئۇلار سېنىڭ ئادالىتىڭنىڭ ھېچقانداق نېسىۋىسىگە ئېرىشمىسۇن.
29 ئۇلارنىڭ ئىسمى ھاياتلىق كىتابىدىن ئۆچۈرۈلسۇن،
ھەققانىيلارنىڭ قاتارىغا پۈتۈلمىسۇن.
30 ئەمما مەن بولسام، دەرد-ئەلەم تارتىپ ئېزىلدىم.
ئەي خۇدا، سېنىڭ نىجاتلىقىڭ مېنى ئېگىز كۆتۈرۈپ تۇرغۇزغاي.
31 مەن مەدھىيە ناخشىسى ئېيتىپ خۇدانىڭ نامىنى مەدھىيىلەيمەن،
شۈكۈر ئېيتىپ ئۇنى ئۇلۇغلايمەن.
32 بۇ پەرۋەردىگارنى بىر كالىدىن،
مۈڭگۈزلۈك ۋە ئاچىماق تۇياقلىق بىر تورپاقتىن
بەكرەك خۇرسەن قىلار.
33 كەمتەرلەر بۇنى كۆرۈپ خۇشال بولار.
خۇدانى ئىزدىگۈچىلەرنىڭ كۆڭلى كۆتۈرۈلەر.
34 چۈنكى پەرۋەردىگار قۇلاق سالار مىسكىنلەرگە،
ئۇ سەل قارىماس ئەسىرگە چۈشكەن خەلقىگە.
35 ئاسمان بىلەن يەر ئۇنى ئۇلۇغلىسۇن،
دېڭىزلار ۋە ئۇنىڭ ئىچىدىكى پۈتۈن جانىۋارلار
ئۇنى مەدھىيىلىسۇن.
36 چۈنكى خۇدا سىئوننى قۇتقۇزار،
يەھۇدانىڭ شەھەرلىرىنى قايتا بىنا قىلار.
ئۇنىڭ خەلقى ئۇ يەرگە ماكانلىشىپ، ئۇنىڭغا ئىگە بولار.
37 ئۇنىڭ خىزمەتكارلىرىنىڭ ئۇرۇق-ئەۋلادى ئۇنىڭغا ئىگە بولار،
ئۇنىڭ نامىنى سۆيگەنلەر ئۇ يەرگە ماكانلىشار.