72
1 سۇلايمان ئۈچۈن. ئەي خۇدا، پادىشاھقا ئادالىتىڭنى بەرگىن،
شاھزادىگە ئۆز ھەققانىيلىقىڭنى ئاتا قىلغىن.
2 ئۇ ئۆز خەلقىڭ ئۈچۈن ھەققانىيلىق بىلەن،
ئاجىز بەندىلىرىڭ ئۈچۈن ئادىللىق بىلەن ھۆكۈم چىقارغاي.
3 خەلق ئۈچۈن تاغلار ئامانلىقنى
ۋە دۆڭلۈكلەر ئادالەتنى ئېلىپ كەلگەي.
4 پادىشاھ خەلق ئارىسىدىكى ئېزىلگەنلەرگە ئادىللىق قىلغاي،
مىسكىنلەرنىڭ بالىلىرىنى قۇتقۇزغاي
ۋە زالىملارنى پارە-پارە قىلغاي.
5 كۈن ۋە ئاي ئاسماندا يورۇپ تۇرسىلا،
نەسىلدىن نەسىلگە خەلق سەندىن قورقۇپ تۇرغاي.
6 ئۇ بولسا ئوتلاققا ياغىدىغان يامغۇردەك،
يەرنى سۇغىرىدىغان ھۆل-يېغىندەك بولغاي.
7 ئۇنىڭ كۈنلىرىدە ھەققانىي ئادەم ياشناپ كەتسۇن،
ئاي يوق بولغۇچە زېمىن تىنچ-ئامانلىققا تولسۇن.
8 ئۇ دېڭىزدىن دېڭىزغا، فىرات دەرياسىدىن تارتىپ
دۇنيانىڭ چەتلىرىگىچە ھۆكۈمرانلىق قىلغاي.
9 چۆل-باياۋاندا ياشاۋاتقانلار ئۇنىڭ ئالدىدا تىز پۈكسۇن،
ئۇنىڭ دۈشمەنلىرى بولسا توپا يالىسۇن.
10 تارشىش ۋە دېڭىز بويىدىكى ئەللەرنىڭ پادىشاھلىرى سوۋغاتلار ئېلىپ كەلسۇن،
شېبا ۋە سېبانىڭ پادىشاھلىرى ئۇنىڭغا ھەدىيەلەر سۇنسۇن.
11 ھەممە پادىشاھلار ئۇنىڭ ئالدىدا تەزىم قىلسۇن،
ھەممە ئەللەر ئۇنىڭغا خىزمەت قىلسۇن.
12 چۈنكى ئۇ پەرياد قىلغان مىسكىنلەرنى قۇتقۇزار،
مەدەتكارى يوق ئېزىلگەنلەرنى قۇتۇلدۇرار.
13 ئۇ ئاجىز-بىچارىلەرگە ئىچ ئاغرىتار،
مىسكىنلەرنىڭ جېنىنى قۇتقۇزار.
14 ئۇ ئۇلارنىڭ جېنىنى زۇلۇم ۋە زوراۋانلىقتىن قۇتۇلدۇرار.
ئۇلارنىڭ قېنى ئۇنىڭ نەزىرىدە قىممەتلىكتۇر.
15 ئۇ ياشىسۇن!
شېبانىڭ ئالتۇنى ئۇنىڭغا بېرىلسۇن.
ئۇنىڭ ئۈچۈن ھەمىشە دۇئا قىلىنسۇن،
كۈن بويى ئۇنىڭغا بەرىكەت تىلەنسۇن.
16 زېمىندا تاغنىڭ چوققىسىغىچە ئاشلىق ئۈنسۇن،
ئۇنىڭ ھوسۇلى لىۋاننىڭ دەرەخلىرىدەك دولقۇنلانسۇن.
شەھەر ئاھالىسى بولسا دالانىڭ گۈل-گىياھلىرىدەك گۈللەنسۇن.
17 ئۇنىڭ نامى ئەبەدكىچە ئۆچمىگەي،
قۇياش يورۇپ تۇرغۇچە ئۇنىڭ نامى ساقلانغاي.
خەلق ئۇنىڭ نامىدا بىر-بىرىگە بەرىكەت تىلىسۇن،
يەرنىڭ ھەممە ئەللىرى ئۇنى بەختىيار دەپ ئاتىسۇن.
18 ئىسرائىلنىڭ خۇداسى بولغان پەرۋەردىگار خۇداغا ھەمدۇسانا بولغاي!
ئاجايىپ ئىشلارنى قىلغۇچى پەقەتلا ئۇدۇر.
19 ئۇنىڭ شەرەپلىك نامىغا ئەبەدكىچە ھەمدۇسانا بولغاي!
پۈتۈن دۇنيا ئۇنىڭ شان-شەرىپىگە تولۇپ كەتكەي! ئامىن، ئامىن!
20 يىشاينىڭ ئوغلى داۋۇدنىڭ دۇئالىرى شۇنىڭ بىلەن تامام بولدى.