ئۈچىنچى بۆلۈم - زەبۇر 73-89
73
1 ئاساف يازغان مەدھىيە ناخشىسى. خۇدا ھەقىقەتەن ئىسرائىلغا،
كۆڭلى پاكلارغا مېھرىباندۇر.
2 ئەمما مەن بولسام، پۇتلىرىم پۇتلىشىشقا تاس قالدى،
قەدەملىرىم تېيىلىپ كېتىشكە ئاز قالدى.
3 چۈنكى يامانلارنىڭ گۈللەپ ياشنىشىنى كۆرگىنىمدە،
ھاكاۋۇرلارغا ھەسەت قىلىشقا باشلىدىم.
4 چۈنكى ئۇلار ئۆلگۈچە قىيىنچىلىققا چۈشمەس،
بەلكى كۈچلۈك ۋە ساغلام تۇرار.
5 ئۇلار باشقا ئىنسانلاردەك جاپا-مۇشەققەت تارتماس،
ئۇلاردەك بالا-قازاغا ئۇچرىماس.
6 كىبىرلىك ئۇلارنىڭ بوينىغا مارجاندەك ئېسىلغان،
زوراۋانلىق كىيىمدەك ئۇلارنى ئورىۋالغان.
7 ئۇلارنىڭ كۆزلىرى سېمىزلىكتىن پۇلتىيىپ چىقتى،
كۆڭۈللىرىدىكى ئوي-خىياللار ھەددىدىن ئېشىپ كەتتى.
8 ئۇلار مەسخىرە قىلىپ، يامان گەپ قىلار،
يوغانچىلىق قىلىپ، دوق قىلار.
9 ئۇلار ئاغزىنى ئاسمانغا قارشى ئاچار،
ئۇلارنىڭ تىللىرى يەر يۈزىنى كېزىپ يۈرەر.
10 شۇڭا ئۇلارنىڭ خەلقى ئۇلارغا يۈزلىنىپ،
تاشقان سۇ بىلەن تولغاندەك بولار. ■
11 ئۇلار: «خۇدا بۇنى قانداق بىلىدۇ؟
ھەممىدىن ئۇلۇغ خۇدانىڭ خەۋىرى بارمۇ؟» دېيىشەر.
12 مانا، يامانلار شۇنداقتۇر،
ئۇلار بۇ دۇنيادا راۋاج تېپىپ، بايلىق توپلار.
13 مەن بولسام كۆڭلۈمنى بىكاردىن-بىكار پاك ساقلاپ،
قوللىرىمنى گۇناھسىزلىقتا يۇيۇپ كەلدىم.
14 مەن بىكارغا كۈن بويى ئازاب تارتىپ،
ھەر ئەتىگەن ئەدەپ يەپ تۇردۇم.
15 ئەگەر مەن: «مەنمۇ شۇنداق گەپ قىلىمەن» دېگەن بولسام ئىدىم،
مەن سېنىڭ نەسلىڭنىڭ بالىلىرىغا خىيانەت قىلغان بولاتتىم.
16 بۇنى قانداق ئۇقالايمەن دەپ پىكىر قىلسام،
بۇ ئىش مېنىڭ كۆزۈمگە تەس كۆرۈندى.
17 لېكىن خۇدانىڭ مۇقەددەس جايىغا كىرىشىم بىلەن،
مۇنداقلارنىڭ ئاقىۋىتىنى چۈشىنىشكە باشلىدىم.
18 دەرۋەقە، سەن ئۇلارنى تېيىلغاق يەرلەرگە قويىسەن،
ئۇلارنى يىقىتىپ پارە-پارە قىلىۋېتىسەن.
19 ئۇلار بىر دەمدە ۋەيران بولار،
قورقۇنچلۇق تەرىقىدە يوق بولار.
20 كىشى ئويغانغاندا چۈش يوق بولۇپ كەتكەندەك،
سەن، ئەي ئىگەم، ئويغانساڭ،
ئۇلارنى كۆزگە ئىلماي، يوقتەك سانايسەن.
21 يۈرىكىم ئازابلانغاندا،
ئىچىم سانجىلغاندا،
22 مەن ئەقىل-پاراسەتسىز ئىدىم،
سېنىڭ ئالدىڭدا ئاڭسىز بىر ھايۋاندەك تۇرغانىدىم.
23 بىراق مەن ھەمىشە سەن بىلەن بىللە،
سەن مېنى ئوڭ قولۇڭ بىلەن تۇتتۇڭ.
24 نەسىھەتىڭ بىلەن مېنى يېتەكلەيسەن،
ئاخىرىدا شان-شەرەپ بىلەن مېنى قوبۇل قىلىسەن.
25 ئاسماندا سەندىن باشقا مېنىڭ كىمىم بار؟
سەندىن باشقا يەر يۈزىدە ھېچكىمگە ئىنتىزار ئەمەسمەن.
26 ئەگەر جىسمىم ۋە جېنىم ھالسىزلىنىپ كەتسىمۇ،
خۇدا قەلبىمنىڭ كۈچى ۋە مەڭگۈلۈك نېسىۋەمدۇر.
27 چۈنكى مانا، سەندىن يىراق تۇرغانلار ھالاك بولىدۇ.
ساڭا زىناخورلاردەك ۋاپاسىز بولغانلارنى يوقىتىۋېتىسەن.
28 لېكىن مەن بولسام خۇداغا يېقىن تۇرۇشنى ئەۋزەل كۆرىمەن،
ئۇنىڭ ھەممە ئەمەللىرىنى بايان قىلاي دەپ،
رەب پەرۋەردىگارنى تايانچىم قىلدىم.