75
1 نەغمىچىلەرنىڭ بېشىغا تاپشۇرۇلۇپ «ھالاك قىلمىغىن» دېگەن ئاھاڭدا ئېيتىلسۇن دەپ، ئاساف يازغان مەدھىيە ناخشىسى. 2 شۈكۈر ساڭا، ئەي خۇدا، شۈكۈر ساڭا،
چۈنكى سېنىڭ نامىڭ بىزگە يېقىندۇر.
ئادەملەر سېنىڭ ئاجايىپ ئىشلىرىڭنى بايان قىلىدۇ.
3 خۇدا: «مەن بېكىتكەن ۋاقىتتا
ئادىللىق بىلەن ھۆكۈم چىقىرىمەن.
4 يەر ۋە ئۇنىڭ ئۈستىدە ياشاۋاتقانلارنىڭ ھەممىسى تەۋرەپ كەتسىمۇ،
ئۇنىڭ تۈۋرۈكلىرىنى مۇستەھكەم تۇرغۇزىمەن» دەيدۇ.
سېلاھ.
5 مەن ھاكاۋۇرلارغا: «كىبىرلەنمەڭلار»،
يامانلارغا: «مۈڭگۈزۈڭلارنى كۆتۈرمەڭلار» دەيمەن.
6 مۈڭگۈزۈڭلارنى ئېگىز كۆتۈرمەڭلار،
بوينۇڭلارنى قاتتىق قىلىپ غادىيىپ يۈرمەڭلار.
7 چۈنكى مەدەت نە شەرقتىن نە غەربتىن كەلمەيدۇ،
ياكى جەنۇبتىكى چۆلدىن كەلمەيدۇ.
8 بەلكى ھۆكۈم قىلغۇچى خۇدادۇر،
ئۇ بىرىنى تۆۋەنگە چۈشۈرىدۇ، يەنە بىرىنى كۆتۈرىدۇ.
9 مانا پەرۋەردىگارنىڭ قولىدا، دورا-دەرمەك ئارىلاشتۇرۇلغان
كۆپۈكلۈك شاراب بىلەن تولدۇرۇلغان بىر قەدەھ بار.
ئۇ ئۇنى تۆككىنىدە يەر يۈزىدىكى بارلىق يامانلار
شارابنىڭ دۇغىنى قالدۇرماي ئىچىدۇ.
10 مەن بولسام ياقۇبنىڭ خۇداسىغا مەدھىيە ناخشىلىرىنى ئېيتىپ،
ئۇنىڭ ئىشلىرىنى ئەبەدكىچە بايان قىلىمەن.
11 خۇدا «يامانلارنىڭ بارلىق مۈڭگۈزلىرىنى كېسىۋېتىمەن،
لېكىن ھەققانىيلارنىڭ مۈڭگۈزلىرى ئېگىز كۆتۈرۈلىدۇ» دەيدۇ.