78
1 ئاساف يازغان نەزمە. ئەي خەلقىم، تەلىمىمنى ئاڭلاڭلار،
ئاغزىمنىڭ سۆزلىرىگە قۇلاق سېلىڭلار.
2 مەن ھېكمەتلىك سۆزلەر بىلەن ئاغزىمنى ئاچىمەن،
قەدىمدىن تارتىپ سىر بولۇپ كەلگەن ئىشلارنى بايان قىلىمەن.
3 ئاتا-بوۋىلىرىمىز بىزگە دەپ بەرگىنىنى،
ئۆزىمىزنىڭ ئاڭلىغىنىنى، بىلگىنىنى،
4 ئۇلارنىڭ ئەۋلادلىرىدىن يوشۇرمايمىز.
كېلىدىغان نەسىلگە پەرۋەردىگارنىڭ شان-شۆھرىتىنى،
ئۇنىڭ كۈچ-قۇدرىتى ۋە ئاجايىپ ئىشلىرىنى بايان قىلىمىز.
5 چۈنكى ئۇ ياقۇبقا يوليورۇقلىرىنى چۈشۈرگەن،
ئىسرائىلدا بىر قانۇننى بېكىتكەن،
«بۇلارنى بالىلىرىڭلارغا ئۆگىتىڭلار» دەپ
ئاتا-بوۋىلىرىمىزغا بۇيرۇغان.
6 شۇنىڭ ئۈچۈن بۇلار كېلىدىغان نەسىلگە مەلۇم بولسۇن
ۋە تۇغۇلىدىغان بالىلارغا بىلدۈرۈلسۇن.
ئۇلارمۇ ئۆز بالىلىرىغا بۇلارنى ئۆگەتسۇن.
7 بۇنىڭ بىلەن ئۇلار خۇداغا ئۈمىدىنى باغلىسۇن،
خۇدانىڭ ئەمەللىرىنى ئۇنتۇماي، ئۇنىڭ ئەمرلىرىنى تۇتسۇن.
8 ئۇلار ئۆز ئاتا-بوۋىلىرىغا ئوخشاش جاھىل ۋە ئاسىي،
كۆڭلى دۇرۇس بولمىغان
ۋە روھى خۇداغا ۋاپادار بولمىغان نەسىل بولمىسۇن.
9 ئەفرائىم قەبىلىسى ئوقيا بىلەن قوراللىنىپ چىقىپ،
جەڭ كۈنىدە ئارقىسىغا بۇرۇلۇپ قېچىپ كەتتى.
10 ئۇلار خۇدانىڭ ئەھدىسىنى تۇتمىدى،
ئۇنىڭ قانۇنى بويىچە مېڭىشنى خالىمىدى.
11 ئۇنىڭ كۆرسەتكەن ئىشلىرىنى ۋە مۆجىزىلىرىنى
ئۇلار ئۇنتۇپ قالدى.
12 خۇدا بولسا مىسىر زېمىنىدا زوئان دالالىرىدا،
ئۇلارنىڭ ئاتا-بوۋىلىرىنىڭ ئالدىدا ئاجايىپ مۆجىزىلەر كۆرسەتكەنىدى.
13 ئۇ دېڭىزنى يېرىپ ئىككىگە بۆلۈپ، ئۇلارنى ئۆتكۈزگەنىدى،
سۇنى قۇم دۆۋىسىدەك دۆۋىلەپ تىك تۇرغۇزغانىدى.
14 ئۇ كۈندۈزى بۇلۇت بىلەن،
كېچىسى ئوتنىڭ نۇرى بىلەن ئۇلارنى يېتەكلىگەنىدى.
15 ئۇ چۆلدە قورام تاشلارنى يېرىپ،
چوڭقۇر سۇلاردىن ئىچۈرگەندەك ئۇلارغا سۇ ئىچۈرگەنىدى.
16 ئۇ قورام تاشتىن ئېقىنلار ئېقىتىپ،
سۇنى دەريالاردەك ئاققۇزغانىدى.
17 شۇنداق بولسىمۇ، ئۇلار ئۇنىڭغا قارشى گۇناھ قىلىۋەردى،
باياۋاندا ھەممىدىن ئۇلۇغ خۇداغا ئاسىيلىق قىلدى.
18 ئۇلار ئۆز نەپسىنى قاندۇرۇشقا يېمەكلىك تەلەپ قىلىپ،
كۆڭلىدە خۇدانى سىناپ باقتى.
19 ئۇلار خۇداغا قارشى سۆزلەپ:
«خۇدا چۆل-باياۋاندا داستىخان سالالامدۇ؟
20 مانا، ئۇ قورام تاشقا ئۇرغىنىدا سۇ بۇلدۇقلاپ چىقىپ،
قايناپ-تېشىپ ئېقىنلارغا ئاقتى.
ئەمدى ئۇ بىزگە نان بېرەلەمدۇ؟
ئۆز خەلقىگە گۆش تېپىپ بېرەلەمدۇ؟» دېيىشتى.
21 پەرۋەردىگار بۇنى ئاڭلاپ غەزەپلەندى،
ياقۇبقا قارشى ئاچچىقى ئوت بولۇپ ياندى،
ئىسرائىلغا قارشى غەزىپى ئۆرلىدى.
22 چۈنكى ئۇلار خۇداغا ئىشەنمىدى،
ئۇنىڭ نىجاتلىقىغا تايانمىدى.
23 شۇنداق بولسىمۇ، ئۇ بۇلۇتلارغا بۇيرۇق بېرىپ،
ئاسماننىڭ دەرۋازىلىرىنى ئېچىۋەتتى.
24 يېسۇن دەپ، ئۇ ئۇلارنىڭ ئۈستىگە ماننا ياغدۇرۇپ،
ئۇلارغا ئەرشتىن ئوزۇق بەردى. ■
25 ئىنسانلار پەرىشتىلەرنىڭ غىزاسىنى يېدى،
ئۇ ئوزۇق-تۈلۈك ئەۋەتىپ ئۇلارنى تويدۇردى.
26 ئۇ ئاسماندىن شەرق شامىلىنى چىقىرىپ،
قۇدرىتى بىلەن جەنۇب شامىلىنى ئەۋەتىپ،
27 ئۇلارنىڭ ئۈستىگە چاڭ-توزاندەك گۆش ياغدۇردى.
ئۇ قۇشلارنى دېڭىزنىڭ قۇمىدەك قىلىپ،
28 ئۇلارنىڭ بارگاھىنىڭ ئوتتۇرىسىغا،
ماكانلىرىنىڭ چۆرىسىگە چۈشۈرۈپ بەردى.
29 ئۇ ئۇلارنىڭ خالىغىنىنى بەرگەچكە،
ئۇلار يەپ ئوبدان تويدى.
30 لېكىن ئۇلار نەپسىنى يىغمىغىنى ئۈچۈن
لوقمىلىرى تېخى ئېغىزلىرىدا تۇرغاندا،
31 خۇدانىڭ ئۇلارغا غەزىپى قوزغالدى.
ئۇ ئۇلارنىڭ قاۋۇللىرىنىڭ ئارىسىغا ئۆلۈم ئەۋەتتى،
ئىسرائىلنىڭ يىگىتلىرىنى ئۇرۇپ يىقىتىۋەتتى.
32 ئۇلار بۇنىڭ ھەممىسىنى كۆرۈپ تۇرسىمۇ،
ئۇنىڭ مۆجىزىلىرىگە ئىشەنمەي، گۇناھ قىلىۋەردى.
33 شۇنىڭ بىلەن ئۇ ئۇلارنىڭ كۈنلىرىنى مەنىسىز،
يىللىرىنى دەككە-دۈككە ئىچىدە ئاخىرلاشتۇردى.
34 ئۇ ئۇلارنى ئۇرغىنىدا، ئۇلار ئۇنى ئىزدەشكە باشلىدى.
ئۇلار يامان يولىدىن يېنىپ توۋا قىلىپ، خۇدانى سېغىنىشقا باشلىدى.
35 ئۇلار خۇدانىڭ ئۆزلىرىنىڭ قورام تېشى ئىكەنلىكىنى
ۋە ھەممىدىن ئۇلۇغ خۇدانىڭ
ئۇلارنىڭ قۇتۇلدۇرغۇچى ئىكەنلىكىنى ئېسىگە كەلتۈردى.
36 ئەمما ئۇلار ئاغزى بىلەن ئۇنىڭغا خۇشامەت قىلدى،
تىلى بىلەن ئۇنىڭغا يالغان سۆزلىدى.
37 چۈنكى ئۇلارنىڭ كۆڭلى ئۇنىڭغا ۋاپادار ئەمەس ئىدى،
ئۇنىڭ ئەھدىسىگە ئۇلار سادىق بولمىدى.
38 لېكىن شۇنداق بولسىمۇ، ئۇ رەھىمدىل بولغاچقا،
گۇناھلىرىنى كەچۈرۈپ، ئۇلارنى ھالاك قىلمىدى.
ئۇ قايتا-قايتا ئاچچىقىنى باستى،
قاتتىق غەزىپىنىڭ قوزغىلىشىغا يول قويمىدى.
39 ئۇ ئۇلارنىڭ ئادەمزاتى ئىكەنلىكىنى،
ئۆتۈپ كەتسە قايتىپ كەلمەيدىغان شامالدەك ئىكەنلىكىنى ئېسىگە ئالدى. ■
40 ئۇلار كۆپ قېتىم چۆلدە ئۇنىڭ غەزىپىنى كەلتۈردى،
باياۋاندا ئۇنىڭغا خاپىلىق سالدى.
41 ئۇلار قايتا-قايتىدىن خۇدانى سىنىدى،
ئىسرائىلنىڭ مۇقەددىسىنىڭ كۆڭلىنى ئاغرىتتى.
42 ئۇنىڭ ئۇلارنى دۈشمەنلەردىن قۇتۇلدۇرغان كۈنىنى،
ئۆز قولى بىلەن قىلغان ئىشلىرىنى ئۇلار ئېسىدە تۇتمىدى.
43 ئۇلار ئۇنىڭ مىسىردا ئاجايىپ ئىشلار قىلغىنىنى،
زوئان دالالىرىدا مۆجىزىلەر كۆرسەتكىنىنى ئويلىمىدى.
44 ئۇ مىسىرلىقلارنىڭ دەريالىرىنى قانغا ئايلاندۇرۇپ،
سۇلىرىنى ئىچكۈسىز قىلىۋەتتى.
45 ئۇ ئۇلارنىڭ ئارىسىغا توپ-توپ نەشتەرلىك چىۋىنلارنى ئەۋەتتى،
ۋەيران قىلغۇچى پاقىلارنى كەلتۈردى.
46 ئۇ ئۇلارنىڭ ھوسۇلىنى چېكەتكە لىچىنكىلىرىگە بەردى،
مەھسۇلاتلىرىنىڭ مېۋىسىنى چېكەتكىلەرگە تاپشۇردى.
47 ئۇ ئۈزۈم تاللىرىنى مۆلدۈر بىلەن ئۇرۇپ،
ئەنجۈر دەرەخلىرىنى ئۈششۈك تەگكۈزۈپ يوقاتتى.
48 ئۇ ئۇلارنىڭ مال-چارۋىلىرىنى مۆلدۈرگە،
پادىلىرىنى چاقماققا تاپشۇرۇپ بەردى.
49 ئۇ ئوتلۇق قەھر-غەزىپىنى، نەپرەت ۋە كۈلپەتلەرنى ئۇلارغا ياغدۇرۇپ،
ئۇلارغا بالايىئاپەت ئېلىپ كېلىدىغان پەرىشتىلەر ئەۋەتتى.
50 ئۇ غەزىپىگە يول قويۇپ،
ئۇلارنىڭ جېنىنى ئۆلۈمدىن ئايىمىدى،
ئەكسىچە ھاياتىنى ۋاباغا تاپشۇرۇپ بەردى.
51 ئۇ مىسىرنىڭ ھەممە تۇنجى بالىلىرىنى،
يەنى خامنىڭ چېدىرلىرىدىكىلىرىنىڭ قۇۋۋىتىنىڭ تۇنجىلىرىنى ئۆلتۈرۈۋەتتى.
52 ئۇ ئۆز خەلقىنى قويلاردەك باشلاپ چىقىپ،
چۆل-باياۋاننىڭ ئىچىدە پادىدەك يېتەكلىدى.
53 ئۇ ئۇلارنى ئامان-ئېسەن يېتەكلىگەچكە، ئۇلار قورقمايتتى.
لېكىن دېڭىز سۈيى ئۇلارنىڭ دۈشمەنلىرىنى يۇتۇۋەتتى.
54 ئۇ ئۇلارنى مۇقەددەس زېمىنىغا باشلاپ،
ئوڭ قولى ئىگىلىگەن بۇ تاغقا ئېلىپ كەلدى.
55 ئۇ ئۇلارنىڭ ئالدىدىن خەلقلەرنى قوغلىۋېتىپ،
ئۇلارنىڭ زېمىنىنى ئۇلارغا مىراس قىلىپ بەردى.
ئۇلارنىڭ چېدىرلىرىغا ئىسرائىلنىڭ قەبىلىلىرىنى يەرلەشتۈردى.
56 لېكىن ئۇلار ئاسىيلىق قىلىپ، ھەممىدىن ئۇلۇغ خۇدانى سىنىدى.
ئۇلار ئۇنىڭ يوليورۇقلىرىغا بويسۇنمىدى.
57 ئۇلار ئارقىغا يېنىپ، ئاتا-بوۋىلىرىدەك ۋاپاسىزلىق قىلىپ،
بىر ئالدامچى ئوقيا كەبى قايرىلىپ كەتتى.
58 ئۇلار تۆپىلىكتىكى سەجدىگاھلىرى بىلەن ئۇنىڭ ئاچچىقىنى كەلتۈردى،
ئويما بۇت ھەيكەللىرى بىلەن ئۇنىڭ غەزىپىنى قوزغىدى.
59 خۇدا بۇنى ئاڭلاپ غەزەپلەندى.
ئۇ ئىسرائىلدىن ئىنتايىن نەپرەتلەندى
60 ئۇ شىلوھتىكى ماكانىنى،
ئىنسانلار ئارىسىدا قۇرغان چېدىرىنى تەرك ئەتتى.
61 ئۇ ئۆز قۇدرەت بەلگىسىنىڭ ئولجا ئېلىنىشىغا يول قويدى،
شان-شەرىپىنى دۈشمەننىڭ قولىغا بەردى. ■
62 ئۇ ئۆز خەلقىنى قىلىچقا تاپشۇردى،
ئۇنىڭ ئۆز مىراسىغا غەزىپى قوزغالدى.
63 ئوت ئۇلارنىڭ يىگىتلىرىنى يالاپ يۇتتى،
قىزلىرىغا توي ناخشىلىرى ئېيتىلماس بولدى.
64 ئۇلارنىڭ كاھىنلىرى قىلىچ ئاستىدا ھالاك بولدى،
تۇل قالغان ئاياللىرى ماتەم تۇتالمىدى.
65 ئاندىن ئىگىمىز ئۇيقۇدىن ئويغانغان كىشىدەك ئويغاندى،
خۇددى شارابتىن جاسارەتلەنگەن پالۋان كەبى.
66 ئۇ دۈشمەنلىرىنى ئۇرۇپ چېكىندۈرۈپ،
ئۇلارنى مەڭگۈلۈك نومۇسقا قويدى.
67 ئۇ يۈسۈپنىڭ چېدىرىنى رەت قىلدى،
ئەفرائىم قەبىلىسىنى تاللىمىدى.
68 بەلكى يەھۇدا قەبىلىسىنى
ۋە ئۆزى سۆيگەن سىئون تېغىنى تاللىدى.
69 ئۇ مۇقەددەس جايىنى ئاسماندەك ئېگىز ياساپ،
ئۇنى ئەبەدكىچە تۇرىدىغان يەردەك مۇستەھكەم قىلدى.
70 ئۇ ئۆز خىزمەتكارى داۋۇدنى تاللاپ،
ئۇنى قوي قوتانلىرىدىن چىقىرىۋالدى.
71 ئۇ ئۇنى قوزىلىق قويلارنى بېقىشتىن ئايرىۋېلىپ،
ئۇنى ئۆز خەلقى بولغان ياقۇب،
ئۆز مىراسى بولغان ئىسرائىلغا پادىچى قىلدى.
72 ئۇ كۆڭلىدىكى دۇرۇسلۇقى بىلەن ئۇلارنى باقتى،
ئەپچىل قولى بىلەن ئۇلارنى يېتەكلىدى.