79
1 ئاساف يازغان مەدھىيە ناخشىسى. ئەي خۇدا، يات خەلقلەر سېنىڭ مىراسىڭغا بۆسۈپ كىردى.
ئۇلار مۇقەددەس ئىبادەتخاناڭنى بۇلغاپ،
يېرۇسالېمنى خارابىگە ئايلاندۇرۇۋەتتى.
2 ئۇلار خىزمەتكارلىرىڭنىڭ جەسەتلىرىنى
ئاسماننىڭ قۇشلىرىغا يەم قىلىپ،
تەقۋادارلىرىڭنىڭ گۆشىنى
دالادىكى ياۋايى ھايۋانلارغا تاشلاپ بەردى.
3 ئۇلارنىڭ قېنىنى يېرۇسالېمنىڭ چۆرىسىدە سۇدەك ئاققۇزدى.
ئۇلارنى كۆمگۈدەك ئادەم قالمىدى.
4 بىز قوشنىلىرىمىزنىڭ ھاقارىتىگە قالدۇق،
ئەتراپىمىزدىكىلەرنىڭ مازاق ۋە مەسخىرە نىشانى بولدۇق.
5 ئەي پەرۋەردىگار، قاچانغىچە شۇنداق بولىدۇ؟
ئەبەدكىچە ئاچچىقلىنىپ تۇرامسەن؟
غەزىپىڭ ئوت بولۇپ يېنىپ تۇرىۋېرەمدۇ؟
6 سېنى تونۇمىغان ئەللەرنىڭ ئۈستىگە،
نامىڭنى چاقىرىپ ئىبادەت قىلمىغان پادىشاھلىقلارنىڭ ئۈستىگە
غەزىپىڭنى ياغدۇرغىن.
7 چۈنكى ئۇلار ياقۇبنى يەپ يۇتۇپ،
ئۇنىڭ ماكانىنى ۋەيران قىلىۋەتتى.
8 سەن ئەجدادلىرىمىزنىڭ يامان ئىشلىرىنى
بىزگە ھېسابلىمىغىن.
بىزگە رەھىم-شەپقىتىڭنى تەزراق ئەۋەتكىن،
چۈنكى بىز بەك پەس ئەھۋالدا قالدۇق.
9 ئەي نىجاتكارىمىز بولغان خۇدا،
نامىڭنىڭ شان-شۆھرىتى ئۈچۈن بىزگە ياردەم بەرگىن.
ئۆز نامىڭ ئۈچۈن بىزنى قۇتقۇزۇپ،
گۇناھلىرىمىزنى كەچۈرگىن.
10 يات ئەللەر نېمىشقا:
«ئۇلارنىڭ خۇداسى قېنى؟» دەپ مازاق قىلىشسۇن؟
خىزمەتكارلىرىڭنىڭ تۆكۈلگەن قېنىنىڭ ئىنتىقامى
كۆز ئالدىمىزدا ئېلىنىپ، ئەللەر ئارىسىدا مەلۇم بولسۇن.
11 ئەسىرلەرنىڭ نالىسى سېنىڭ ھۇزۇرۇڭغا يەتكەي.
ئۇلۇغ قۇدرىتىڭ بىلەن ئۆلۈمگە مەھكۇم قىلىنغانلارنى قۇتقۇزغىن.
12 ئەي ئىگەم، قوشنىلىرىمىزنىڭ ساڭا قىلغان ھاقارىتىنى
يەتتە ھەسسە قوشۇپ قايتۇرۇپ، ئۇلارنىڭ باغرىغا تاشلىغىن.
13 لېكىن بىز ئۆزىمىز سېنىڭ خەلقىڭ ئاتىلىپ،
يايلىقىڭنىڭ قويلىرى بولغاچقا،
ئەبەدكىچە ساڭا شۈكۈر ئېيتىپ،
نەسىلدىن نەسىلگىچە ھەمد ئېيتايلى.