80
1 نەغمىچىلەرنىڭ بېشىغا تاپشۇرۇلۇپ، «نىلۇپەرلەر» دېگەن ئاھاڭدا ئېيتىلسۇن دەپ، ئاساف يازغان گۇۋاھلىق، بىر مەدھىيە ناخشىسى. 2 ئەي ئىسرائىلنىڭ پادىچىسى،
يۈسۈپنى پادىدەك يېتەكلىگۈچى،
بىزگە قۇلاق سالغىن.
ئەي كېرۇبلارنىڭ ئۈستىدە ئولتۇرغۇچى،
شانلىق نۇرۇڭنى چاچقىن.
3 ئەفرائىم، بەنيامىن ۋە ماناسسەنىڭ ئالدىدا قۇدرىتىڭنى كۆرسىتىپ،
بىزنى قۇتقۇزغىلى كەلگىن.
4 ئەي خۇدا، بىزنى ئۆز يېنىڭغا قايتۇرۇپ،
يۈزۈڭنىڭ نۇرىنى چاچقىن.
شۇندىلا بىز نىجاتلىق تاپىمىز.
5 ئەي ساماۋى قوشۇنلارنىڭ سەردارى پەرۋەردىگار خۇدا،
سەن قاچانغىچە خەلقىڭنىڭ دۇئاسىغا ئاچچىقلىنىپ تۇرىسەن؟
6 سەن كۆز ياشلىرىنى ئۇلارغا نان ئورنىدا يېگۈزۈپ،
ئۇلارغا زور مىقداردا كۆز ياشلىرىنى ئىچكۈزىسەن.
7 سەن بىزنى قوشنىلىرىمىزنىڭ جېدىلىگە سەۋەب قىلىپ قويدۇڭ.
دۈشمەنلىرىمىز ئۆزئارا بىزنى مەسخىرە قىلىشىدۇ.
8 ئەي ساماۋى قوشۇنلارنىڭ سەردارى خۇدا،
بىزنى ئۆز يېنىڭغا قايتۇرۇپ،
يۈزۈڭنىڭ نۇرىنى بىزگە چاچقايسەن.
شۇندىلا بىز نىجاتلىق تاپىمىز.
9 سەن مىسىردىن بىر ئۈزۈم كۆچىتىنى ئېلىپ كېلىپ،
خەلقلەرنى قوغلاپ چىقىرىپ، ئۇنى تىكتىڭ.
10 سەن ئۇنىڭ ئۈچۈن يەر تەييارلىغاچقا،
ئۇ چوڭقۇر يىلتىز تارتىپ، زېمىننى تولدۇردى.
11 ئۇنىڭ سايىسى تاغلارنى ،
ئۇنىڭ شاخلىرى زور كېدىر دەرەخلىرىنى قاپلىدى. ■
12 ئۇ ئۆز شاخلىرىنى دېڭىزغىچە يېيىپ،
نوتىلىرىنى فىرات دەرياسىغىچە ئۆستۈرۈپ ئۇزارتتى.
13 سەن نېمىشقا ئۇنىڭ تاملىرىنى يىقىتىۋېتىپ،
يولدىن ئۆتكەن ھەممە ئادەمنىڭ
ئۇنىڭ مېۋىسىنى ئۈزۈۋېلىشىغا يول قويدۇڭ؟
14 ئورمانلىقتىكى ياۋا توڭگۇزلارمۇ ئۇنى بۇزۇۋاتىدۇ،
دالادىكى ھايۋانلار ئۇنىڭدىن ئوزۇقلىنىدۇ.
15 ئەي ساماۋى قوشۇنلارنىڭ سەردارى خۇدا،
يېنىمىزغا قايتقىن،
ئاسماندىن نەزەر سېلىپ، بۇ ئۈزۈم تېلىنى يوقلىغىن.
16 ئوڭ قولۇڭ تىككەن ئۈزۈم تېلىنى پەرۋىش قىلغىن،
ئۆزۈڭ ئۈچۈن باققان شاخىڭدىن خەۋەر ئالغىن. ■
17 ئۇ ئوتتا كۆيدۈرۈلۈپ كېسىۋېتىلدى.
ئۇلار غەزەپلىك بېقىشلىرىڭدىن ھالاك بولىدۇ.
18 قولۇڭ ئوڭ تەرىپىڭدىكى ئادەمنىڭ ئۈستىدە،
سەن ئۆزۈڭ ئۈچۈن كۈچلۈق قىلغان ئىنسانئوغلىنىڭ ئۈستىدە بولسۇن.
19 شۇندىلا بىز سەندىن ئايرىلمايمىز.
بىزنى تىرىك ساقلىساڭ،
سېنىڭ نامىڭنى چاقىرىپ ئىبادەت قىلىمىز.
20 ئەي ساماۋى قوشۇنلارنىڭ سەردارى پەرۋەردىگار خۇدا،
بىزنى ئۆز يېنىڭغا قايتۇرۇپ،
يۈزۈڭنىڭ نۇرىنى بىزگە چاچقايسەن.
شۇندىلا بىز نىجاتلىق تاپىمىز.