84
1 نەغمىچىلەرنىڭ بېشىغا تاپشۇرۇلۇپ، «گىتتىت» دېگەن ئاھاڭدا ئېيتىلسۇن دەپ، قوراھنىڭ ئوغۇللىرى يازغان مەدھىيە ناخشىسى. 2 ئەي ساماۋى قوشۇنلارنىڭ سەردارى پەرۋەردىگار،
سېنىڭ ماكانلىرىڭ نەقەدەر گۈزەلدۇر!
3 جېنىم تەشنا بولۇپ، پەرۋەردىگارنىڭ ھويلىلىرىنى سېغىنىپ كەتتى.
قەلبىم ۋە جىسمىم ھايات خۇدا ئۈچۈن ناخشا ياڭرىتىدۇ.
4 ئەي مېنىڭ پادىشاھىم، مېنىڭ خۇدايىم،
ساماۋى قوشۇنلارنىڭ سەردارى پەرۋەردىگار،
سېنىڭ قۇربانلىق سۇپىلىرىڭنىڭ يېنىدا ھەتتا قۇشقاچ ماكان تاپتى،
قارلىغاچ ئۆز بالىلىرىنى قويغىلى ئۇۋا سالدى.
5 سېنىڭ بەيتىڭدە تۇرۇۋاتقانلار نەقەدەر بەختلىكتۇر!
ئۇلار توشتىماي سېنى مەدھىيىلەر.
سېلاھ.
6 سەندىن كۈچ-قۇۋۋەت تاپقانلار نەقەدەر بەختلىكتۇر!
ئۇلار قەلبىدە توغرا يوللارغا ئىنتىزار.
7 ئۇلار يىغا-زارە ۋادىسىدىن ئۆتسە،
ئۇنى بۇلاقلىققا ئايلاندۇرار.
كۈز يامغۇرى ئۇنى بەرىكەت بىلەن تولدۇرار.
8 مۇنداق كىشىلەر قۇۋۋەت ئۈستىگە قۇۋۋەت تاپار،
سىئوندا خۇدانىڭ ھۇزۇرىدا ھازىر بولار.
9 ئەي ساماۋى قوشۇنلارنىڭ سەردارى پەرۋەردىگار خۇدا،
دۇئايىمغا قۇلاق سالغىن.
مېنى ئاڭلىغىن، ئەي ياقۇبنىڭ خۇداسى.
سېلاھ.
10 ئەي قالقىنىمىز بولغان خۇدا،
ئۆزۈڭ تاللاپ مەسىھلىگەننىڭ يۈزىگە
ئىلتىپات بىلەن نەزەر سالغىن.
11 چۈنكى سېنىڭ ھويلىلىرىڭدىكى بىر كۈن
باشقا يەردىكى مىڭ كۈندىن ياخشىدۇر.
مەن خۇدايىمنىڭ بەيتىنىڭ بوسۇغىسىدا تۇرۇشنى
يامانلارنىڭ چېدىرلىرىنىڭ ئىچىدە ئولتۇرۇشتىن ئەۋزەل بىلىمەن.
12 چۈنكى پەرۋەردىگار خۇدا قۇياش ۋە قالقاندۇر.
پەرۋەردىگار شاپائەت ۋە شان-شۆھرەت ئاتا قىلىدۇ،
توغرا يۈرگۈچىلەردىن ياخشى نېمەتلەرنى ئايىمايدۇ.
13 ئەي ساماۋى قوشۇنلارنىڭ سەردارى پەرۋەردىگار،
ساڭا تايانغان كىشى نەقەدەر بەختلىكتۇر!