86
1 داۋۇدنىڭ بىر دۇئاسى. ئەي پەرۋەردىگار، ماڭا قۇلاق سېلىپ جاۋاب بەرگىن،
چۈنكى مەن بىچارە ۋە ھاجەتمەن.
2 جېنىمنى ساقلىغىن، چۈنكى مەن ساڭا سادىقمەن.
ئەي مېنىڭ خۇدايىم، ئۆزۈڭگە تايانغان خىزمەتكارىڭنى قۇتقۇزغىن.
3 ماڭا مېھىر-شەپقىتىڭنى كۆرسەتكىن، ئەي رەببىم،
چۈنكى مەن ساڭا كۈن بويى پەرياد قىلىمەن.
4 ئەي رەببىم، ساڭا جېنىم تەلمۈرىدۇ.
خىزمەتكارىڭنىڭ جېنىنى شادلاندۇرغىن.
5 چۈنكى، ئەي رەببىم، سەن مېھرىبان ۋە كەچۈرۈمچان،
ئۆزۈڭگە ئىلتىجا قىلغانلارنىڭ ھەممىسىگە زور مېھىر-شەپقەت كۆرسىتىسەن.
6 دۇئايىمنى ئاڭلىغىن، ئەي پەرۋەردىگار.
نالە-زارىمغا قۇلاق سالغىن.
7 ئازاب-ئوقۇبەتلىك كۈنۈمدە ساڭا نالە قىلىمەن،
چۈنكى سەن ماڭا جاۋاب بېرىسەن.
8 ئەي رەببىم، ئىلاھلار ئارىسىدا سەندەك بىرى يوقتۇر،
قىلغان ئىشلىرىڭنىڭمۇ تەڭدىشى يوقتۇر.
9 ئەي رەببىم، سەن ياراتقان ئەل-خەلقلەر ھەممىسى كېلىپ،
سېنىڭ ئالدىڭدا سەجدە قىلىپ، نامىڭنى ئۇلۇغلايدۇ.
10 چۈنكى سەن ئۇلۇغسەن ۋە ئاجايىپ ئىشلارنى قىلىسەن.
سەن يېگانە خۇدادۇرسەن،
11 ئەي پەرۋەردىگار، ھەقىقىتىڭدە مېڭىشىم ئۈچۈن
يولۇڭنى ماڭا بىلدۈرگىن.
نامىڭدىن قورقۇشۇم ئۈچۈن
كۆڭلۈمنى سادىق قىلغىن.
12 ئەي رەببىم خۇدا، چىن كۆڭلۈمدىن ساڭا شۈكۈر ئېيتىمەن،
ئەبەدكىچە نامىڭنى ئۇلۇغلايمەن.
13 چۈنكى ماڭا بولغان مېھىر-شەپقىتىڭ شۇنچە چوڭقۇردۇر.
سەن جېنىمنى ئۆلۈكلەر دىيارىنىڭ تېرەنلىكلىرىدىن قۇتقۇزدۇڭ.
14 ئەي خۇدا، تەكەببۇرلار ماڭا قارشى چىقتى،
زالىملارنىڭ جامائىتى جېنىمنى قەستلىمەكتە.
ئۇلار سېنى كۆزگە ئىلمايدۇ.
15 ئەمما، ئەي رەببىم، سەن رەھىمدىل ۋە شەپقەتلىك خۇداسەن.
سەن ئاسان غەزەپلەنمەيسەن،
مېھىر-مۇھەببىتىڭ ۋە ۋاپادارلىقىڭ چوڭدۇر.
16 ماڭا يۈزلىنىپ رەھىم قىلغىن.
ئۆز خىزمەتكارىڭغا كۈچ-قۇۋۋىتىڭنى بەرگىن،
دېدىكىڭنىڭ ئوغلىنى قۇتقۇزغىن.
17 ماڭا ياخشىلىقىڭنى كۆرسىتىدىغان بىر نىشانە ئاتا قىلغىن.
ماڭا ئۆچمەنلىك قىلغۇچىلار بۇنى كۆرۈپ، شەرمەندە بولسۇن.
چۈنكى سەن، ئەي پەرۋەردىگار، ماڭا ياردەم قىلدىڭ ۋە تەسەللى بەردىڭ.