تۆتىنچى بۆلۈم - زەبۇر 90-106
90
1 خۇدانىڭ ئادىمى بولغان مۇسانىڭ بىر دۇئاسى. ئەي رەببىم، نەسىلدىن نەسىلگە
سەن بىزنىڭ پاناھگاھىمىز بولۇپ كەلدىڭ.
2 تاغلار ۋۇجۇدقا كەلمەستىن بۇرۇن،
سەن يەر ۋە دۇنيانى ياراتماستىن بۇرۇن،
ئەزەلدىن ئەبەدكىچە سەن خۇدادۇرسەن.
3 سەن ئىنساننى تۇپراققا قايتۇرۇپ:
«ئەي ئادەم بالىلىرى، قايتىڭلار» دەيسەن.
4 چۈنكى سېنىڭ نەزىرىڭدە مىڭ يىل
تۈنۈگۈن ئۆتكەن بىر كۈندەك،
كېچىنىڭ بىر جېسەك ۋاقتىدەكتۇر.
5 سەن ئۇلارنى كەلكۈن سۈيىدەك ئېقىتىۋېتىسەن.
ئۇلار بىر ئۇيقۇغا:
سەھەردە ئۈنۈپ چىقىدىغان ئوت-چۆپكە ئوخشار:
6 ئەتىگەندە ئۇلار كۆكلەپ ئۈنۈپ چىقار،
ئاخشىمى ئورۇلۇپ سولىشىپ قۇرار.
7 چۈنكى بىز غەزىپىڭدە ئېرىپ كېتىمىز،
قەھرىڭدىن ساراسىمىگە چۈشىمىز.
8 سەن خاتالىرىمىزنى ئالدىڭغا قويدۇڭ،
يوشۇرۇن گۇناھلىرىمىزنى يۈزۈڭنىڭ نۇرىغا چىقاردىڭ.
9 چۈنكى كۈنلىرىمىز سېنىڭ غەزىپىڭ ئاستىدا ئۆتەر،
ئۆمرىمىز تارتقان بىر «ئۇھ»تەك تۈگەر.
10 ئۆمرىمىزنىڭ يىللىرى يەتمىش يىل،
كىشى قۇۋۋەتلىك بولسا سەكسەن يىل بولار،
لېكىن ياخشى يىللىرىمىزمۇ مۇشەققەت ۋە غەمگە تولغاندۇر.
ئۆمرىمىز تېز تۈگەر،
ھاياتىمىز ئۇچقاندەك ئۆتۈپ كېتەر.
11 سېنىڭ غەزىپىڭنىڭ قاتتىقلىقىنى كىم بىلەر؟
قەھرىڭگە لايىق تەرىقىدە سەندىن قورقىدىغان كىم بار؟
12 كۆڭلىمىزنى ھېكمەتكە تولسۇن دەپ،
كۈنلىرىمىزنى ساناشنى بىزگە ئۆگەتكىن.
13 ئەي پەرۋەردىگار، قايتىپ كەلگىن. قاچانغىچە كۈتىمىز؟
ئۆز خىزمەتكارلىرىڭغا ئىچىڭ ئاغرىغاي.
14 تاڭدا مېھىر-شەپقىتىڭگە بىزنى قاندۇرغىن،
ئۆمۈر بويى كۈيلەر ياڭرىتىپ شادلىنايلى.
15 بىزنى قانچە كۈن ئازاب-ئوقۇبەتكە دۇچار قىلغان بولساڭ،
نەچچە يىل بالايىئاپەتكە ئۇچرىغان بولساق،
شۇنچە ۋاقىت بىزنى خۇشال قىلغىن.
16 ئۇلۇغ ئىشلىرىڭنى خىزمەتكارلىرىڭ كۆرسۈن،
شانۇ-شەۋكىتىڭ ئۇلارنىڭ بالىلىرىغا ئاشكارا بولسۇن.
17 پەرۋەردىگار خۇدايىمىزنىڭ شاپائىتى ئۈستىمىزدە بولغاي،
قوللىرىمىزنىڭ خىزمىتىگە بەرىكەت بەرگىن.
بەرھەق، قوللىرىمىزنىڭ ئىشلىرىغا بەرىكەت ئاتا قىلغىن!