95
1 كېلىڭلار، پەرۋەردىگار ئۈچۈن ناخشا ياڭرىتايلى، نىجاتلىقىمىزنىڭ قورام تېشىنى مەدھىيىلەپ تەنتەنە قىلايلى.
2 شۈكۈر ئېيتىپ ئۇنىڭ ئالدىغا كېلەيلى،
ئۇنىڭغا مەدھىيە ناخشىلىرىنى ئېيتىپ، تەنتەنە قىلايلى.
3 چۈنكى پەرۋەردىگار ئۇلۇغ خۇدادۇر،
ئۇ ئۇلۇغ پادىشاھ، بارلىق ئىلاھلاردىن ئۈستۈندۇر!
4 يەرنىڭ چوڭقۇر قاتلاملىرى ئۇنىڭ قولىدىدۇر،
تاغلارنىڭ چوققىلىرىمۇ ئۇنىڭكىدۇر.
5 دېڭىز ئۇنىڭكىدۇر، ئۇ ئۇنى ياراتقان.
يەرنىمۇ ئۇنىڭ قوللىرى ياسىغان.
6 كېلىڭلار، باش ئېگىپ سەجدە قىلايلى،
ياراتقۇچىمىز پەرۋەردىگارنىڭ ئالدىدا تىز چۆكەيلى.
7 چۈنكى ئۇ بىزنىڭ خۇدايىمىزدۇر.
بىز ئۇنىڭ يايلىقىنىڭ خەلقىدۇرمىز،
ئۇنىڭ قولىدىكى قويلارمىز.
كاشكى بۈگۈن ئۇنىڭ ئاۋازىنى ئاڭلىساڭلارچۇ!
8 سىلەر مەرىبادا ۋە ئۇ كۈنى چۆل ئىچىدىكى ماسسادا قىلغىنىڭلاردەك،
يۈرىكىڭلارنى قاتتىق قىلماڭلار!
9 ئاتا-بوۋىلىرىڭلار ئەمەللىرىمنى كۆرۈپ تۇرۇپ،
ئۇ يەردە مېنى سىنىدى ۋە تەكشۈردى.
10 مەن قىرىق يىل داۋامىدا ئۇ نەسىلدىن بىزار بولۇپ:
«بۇلار كۆڭلى ئازغان بىر خەلق،
ئۇلار مېنىڭ يوللىرىمنى تونۇمايدۇ» دېدىم.
11 شۇنىڭ ئۈچۈن مەن غەزەپ بىلەن قەسەم قىلىپ:
«ئۇلار مېنىڭ ئارامگاھىمغا ھەرگىز كىرمەيدۇ» دېدىم.