102
1 ئازاب-ئوقۇبەت تارتقۇچىنىڭ دۇئاسى، ئۇنىڭ ھالىدىن كەتكەندە پەرۋەردىگارنىڭ ئالدىدا قىلغان داد-پەريادى. 2 ئەي پەرۋەردىگار، دۇئايىمنى ئاڭلىغىن،
نالەم ساڭا يەتسۇن.
3 ئازاب-ئوقۇبەتتە قالغان كۈنۈمدە
مەندىن يۈزۈڭنى يوشۇرمىغىن.
نالە قىلغان كۈنۈمدە
ماڭا قۇلاق سېلىپ، تېز جاۋاب بەرگىن.
4 كۈنلىرىم تۈتۈندەك يوق بولۇپ كەتتى،
ئۇستىخانلىرىم تونۇرنىڭ چوغلىرىدەك بولۇپ قالدى.
5 يۈرىكىم سولىشىپ ئوت-چۆپلەردەك قۇرۇپ كەتتى.
ھەتتا نان يېيىشنىمۇ ئۇنتۇپ قالدىم.
6 ھەسرەتلىك ئاھۇ-پەريادلىرىمدىن
تېرەم ئۇستىخىنىمغا يېپىشىپ قالدى.
7 مەن چۆل-باياۋاندىكى ساقىيقۇشقا ئوخشاپ قالدىم،
ۋەيرانچىلىقنى ماكان قىلغان مۈشۈكياپىلاق كەبىدۇرمەن.
8 مەن ئۇيقۇسىز قالدىم،
ئۆگزىدىكى يالغۇز بىر قۇشقاچ كەبىدۇرمەن.
9 دۈشمەنلىرىم كۈن بويى مېنى مەسخىرە قىلىدۇ.
ماڭا قارشى غەزىپى تاشقانلار ئۈستۈمگە لەنەت ياغدۇرىدۇ.
10 مەن كۈلنى ناندەك يېدىم،
كۆز يېشىم قوشۇلغان ئىچىملىك ئىچتىم.
11 سېنىڭ غەزىپىڭ ۋە قەھرىڭنىڭ سەۋەبىدىن ھالىم شۇنداق بولدى.
چۈنكى سەن مېنى كۆتۈردۈڭ ۋە يەنە تاشلىۋەتتىڭ.
12 كۈنلىرىم ئۇزارغان سايىدەك يوقالماقتا.
ئۆزۈم ئوت-چۆپلەردەك قۇرۇماقتىمەن.
13 ئەمما سەن، ئەي پەرۋەردىگار، ئەبەدكىچە تۇرىسەن،
سېنىڭ شۆھرىتىڭ نەسىلدىن نەسىلگە داۋام قىلىدۇ.
14 سەن قوزغىلىپ سىئونغا رەھىم قىلىسەن،
چۈنكى ئۇنىڭغا شەپقەت كۆرسىتىش ۋاقتى كەلدى،
بېكىتىلگەن ۋاقىت-سائەت يېتىپ كەلدى.
15 سېنىڭ خىزمەتكارلىرىڭ ئۇنىڭ تاشلىرىنى ياخشى كۆرىدۇ،
چاڭ-توپىسىنى ھەم سۆيىدۇ.
16 ئەي پەرۋەردىگار، ئەللەر سېنىڭ نامىڭدىن،
يەر يۈزىدىكى ھەممە پادىشاھلار سېنىڭ شان-شۆھرىتىڭدىن قورقىدۇ.
17 چۈنكى پەرۋەردىگار سىئوننى قايتا قۇرغاندا،
ئۇ ئۆز شان-شەرىپى ئىچىدە كۆرۈنىدۇ.
18 ئۇ مىسكىنلەرنىڭ دۇئاسىغا قۇلاق سالىدۇ،
ئۇ ئۇلارنىڭ دۇئالىرىنى كەمسىتمەيدۇ.
19 بۇلار كېلىدىغان نەسىل ئۈچۈن خاتىرىلىنىدۇ،
كەلگۈسىدىكى خەلق پەرۋەردىگارغا ھەمد ئېيتىدۇ.
20 چۈنكى ئۇ ئېگىز مۇقەددەس دەرگاھىدىن تۆۋەنگە نەزەر سالدى،
ئەرشتىن يەر يۈزىنى كۆزەتتى
21 مەھبۇسلارنىڭ پەريادىنى ئاڭلاي،
ئۆلۈمگە بۇيرۇلغانلارنى قۇتقۇزاي دەپ.
22 شۇنىڭ بىلەن، پەرۋەردىگارغا ئىبادەت قىلىش ئۈچۈن
خەلقلەر يىغىلغىنىدا ۋە ئەللەر توپلانغىنىدا،
23 پەرۋەردىگارنىڭ نامى سىئوندا جاكارلىنىدۇ
ۋە يېرۇسالېمدا ئۇنىڭغا مەدھىيە ئېيتىلىدۇ.
24 ئۇ مېنىڭ كۈچۈمنى يولدا ئاجىزلاشتۇرۇپ،
كۈنلىرىمنى قىسقارتتى.
25 «ئەي خۇدايىم، مېنى كۈنلىرىمنىڭ يېرىمىدا ئېلىپ كەتمىگىن» دېدىم.
سېنىڭ يىللىرىڭ نەسىلدىن نەسىلگە داۋام قىلار.
26 دەسلەپتە سەن يەرنىڭ ئۇلىنى بەرپا قىلدىڭ،
ئاسمانلار سېنىڭ قوللىرىڭنىڭ ئەسىرىدۇر.
27 ئۇلار يوق بولۇپ كېتىدۇ، ئەمما سەن ئەبەدىي تۇرىسەن.
ئۇلارنىڭ ھەممىسى كىيىمدەك كونىراپ كېتىدۇ،
سەن ئۇلارنى لىباستەك ئالماشتۇرىسەن.
شۇنىڭ بىلەن ئۇلار يوقىتىلىدۇ.
28 ئەمما سەن ئۆزگەرمەس،
يىللىرىڭنىڭ ئاخىرى يوقتۇر.
29 خىزمەتكارلىرىڭنىڭ بالىلىرىمۇ خاتىرجەم ياشاۋېرىدۇ،
ئۇلارنىڭ ئۇرۇق-ئەۋلادى سېنىڭ ئالدىڭدا مەزمۇت تۇرىدۇ.