103
1 داۋۇد يازغان ناخشا. ئەي جېنىم، پەرۋەردىگارغا ھەمدۇسانا ئېيتقىن،
پۈتۈن ۋۇجۇدۇم ئۇنىڭ مۇقەددەس نامىنى مەدھىيىلىسۇن.
2 ئەي جېنىم، پەرۋەردىگارغا ھەمدۇسانا ئېيتقىن،
ئۇنىڭ ھەممە نېمەتلىرىنى ئۇنتۇمىغىن.
3 ئۇ سېنىڭ بارلىق گۇناھلىرىڭنى كەچۈرەر،
سېنىڭ ھەممە كېسەللىرىڭنى ساقايتار.
4 ئۇ ھاياتىڭنى گۆردىن قۇتۇلدۇرار،
ساڭا مېھىر-شەپقەت ۋە رەھىمدىللىق تاجى كىيدۈرەر.
5 ئۇ كۆڭلۈڭنى ياخشى نەرسىلەر بىلەن تولدۇرار.
ياشلىقىڭ بۈركۈتتەك يېڭىلىنار.
6 پەرۋەردىگار بارلىق زۇلۇم تارتقانلار ئۈچۈن
ھەققانىيەت ۋە ئادالەتنى يۈرگۈزەر.
7 ئۇ ئۆز يوللىرىنى مۇساغا كۆرسەتتى،
ئۆز ئىشلىرىنى بەنى ئىسرائىلغا ئايان قىلدى.
8 پەرۋەردىگار رەھىمدىل ۋە شەپقەتلىكتۇر،
ئۇ ئاسانلىقچە غەزەپلەنمەس،
ئۇنىڭ مېھىر-شەپقىتى چەكسىزدۇر.
9 ئۇ دائىما ئەيىبلىمەس،
غەزىپى ئەبەدكىچە سۈرمەس.
10 ئۇ بىزگە گۇناھلىرىمىزغا قاراپ مۇئامىلە قىلمىدى،
يامان ئىشلىرىمىزنىڭ جازاسىنى بەرمىدى.
11 چۈنكى ئاسمان يەردىن قانچىلىك ئېگىز بولسا،
ئۇنىڭ مېھىر-شەپقىتى ئۇنىڭدىن قورقىدىغانلارغا شۇنچىلىك زوردۇر.
12 شەرق غەربتىن قانچىلىك يىراق بولسا،
بىزنىڭ گۇناھلىرىمىزنى ئۇ بىزدىن شۇنچە يىراقلاشتۇرار.
13 ئاتا ئۆز بالىلىرىغا شەپقەت قىلغاندەك،
پەرۋەردىگار ئۇنىڭدىن قورقىدىغانلارغا شەپقەت قىلار.
14 چۈنكى ئۇ بىزنىڭ جىسمىمىزنى بىلىدۇ،
تۇپراق ئىكەنلىكىمىزنى ئېسىگە ئالىدۇ.
15 ئىنساننىڭ كۈنلىرى ئوت-چۆپكە ئوخشار،
ئۇ دالا گۈلىدەك چېچەكلەر.
16 شامال ئۇنىڭ ئۈستىدىن ئۆتكىنىدە ئۇ يوق بولار،
ئۆز ئورنىمۇ ئۇنى ئەسلىمەس.
17 لېكىن پەرۋەردىگارنىڭ مېھىر-شەپقىتى بولسا،
ئەزەلدىن ئەبەدكىچە ئۇنىڭدىن قورقىدىغانلارنىڭ ئۈستىدىدۇر.
18 ئۇنىڭ ھەققانىيىتى ئەۋلادتىن ئەۋلادقا،
ئۇنىڭ ئەھدىسىگە ۋاپا قىلغانلارغا
ۋە بۇيرۇقلىرىنى يادىدا ساقلىغانلارغىدۇر.
19 پەرۋەردىگار ئۆز تەختىنى ئەرشتە قۇرغاندۇر،
ئۇنىڭ پادىشاھلىقى ھەممىگە ھۆكۈمرانلىق قىلىدۇ.
20 ھەمدۇسانا ئېيتىڭلار پەرۋەردىگارغا،
ئەي ئۇنىڭ قۇدرەتلىك پەرىشتىلىرى،
ئۇنىڭ سۆزىگە قۇلاق سېلىپ، كالامىنىڭ ئاۋازىغا بۇيسۇنغانلار!
21 ھەمدۇسانا ئېيتىڭلار پەرۋەردىگارغا،
ئەي ئۇنىڭ ھەممە قوشۇنلىرى،
ئۇنىڭ ئىرادىسىنى ئورۇنلايدىغان خىزمەتكارلىرى!
22 ھەمدۇسانا ئېيتىڭلار پەرۋەردىگارغا،
ئۇنىڭ سەلتەنىتىنىڭ ھەممە جايلىرىدا،
ئەي ئۇنىڭ ھەممە مەخلۇقاتلىرى!
ھەمدۇسانا ئېيتقىن پەرۋەردىگارغا، ئەي جېنىم!