108
1 داۋۇد يازغان مەدھىيە ناخشىسى. 2 مېنىڭ كۆڭلۈم تەييار، ئەي خۇدا.
مەن ھەمدۇسانا ئېيتىمەن،
پۈتۈن قەلبىم بىلەن مەدھىيە ناخشىلىرىنى ئېيتىمەن.
3 ئەي چىلتار بىلەن لىرا، ئويغانغىن!
سەھەرنىڭ قۇياشىنى ئويغىتاي.
4 ئەي پەرۋەردىگار، خەلقلەر ئارىسىدا سېنى ئۇلۇغلايمەن،
ئەللەر ئارىسىدا ساڭا ھەمدۇسانا ئېيتىمەن.
5 چۈنكى سېنىڭ مېھىر-شەپقىتىڭ ئاسمانلاردىن ئۈستۈندۇر،
ھەقىقىتىڭ بۇلۇتلارغا تاقاشقاندۇر.
6 ئەي خۇدا، ئاسمانلار ئۈستىدە ئۇلۇغلانغايسەن،
شان-شەرىپىڭ پۈتۈن يەر يۈزىنى قاپلىغاي.
7 سېنىڭ سۆيگەنلىرىڭنىڭ نىجاتلىق تېپىشى ئۈچۈن،
ئوڭ قولۇڭ بىلەن قۇتقۇزغىن، جاۋاب بەرگىن ماڭا.
8 خۇدا ئۆز مۇقەددەسلىكىدە مۇنداق دېگەن:
«مەن غالىب كېلىمەن، شەكەمنى بۆلىمەن
ۋە سۇككوت ۋادىسىنى ئۆلچەيمەن.
9 گىلېئاد ماڭا مەنسۇپتۇر،
ماناسسەمۇ ماڭا مەنسۇپتۇر.
ئەفرائىم بولسا بېشىمنىڭ دۇبۇلغىسىدۇر،
يەھۇدا سەلتەنەت ھاسامدۇر.
10 موئاب مېنىڭ يۇيۇنۇش دېسىمدۇر، ئېدومغا چورۇقۇمنى ئاتىمەن،
فىلىستىيە ئۈستىدىن غالىب كېلىپ تەنتەنە قىلىمەن».
11 كىم مېنى سېپىللىق شەھەرگە باشلاپ كىرىدۇ؟
كىم مېنى ئېدومغا ئېلىپ بارىدۇ؟
12 ئەي خۇدا، سەن ئۆزۈڭ بىزنى تاشلىۋەتتىڭ ئەمەسمۇ؟
ئەي خۇدا، قوشۇنلىرىمىز بىلەن جەڭگە چىقماس بولدۇڭ ئەمەسمۇ؟
13 دۈشمەنگە قارشى بىزگە ياردەم بەرگىن،
چۈنكى ئىنساننىڭ ياردىمى بىكاردۇر!
14 بىز خۇداغا تايىنىپ باتۇرلۇق قىلىمىز،
ئۇ دۈشمەنلىرىمىزنى دەسسەپ-چەيلەيدۇ.