109
1 نەغمىچىلەرنىڭ بېشىغا تاپشۇرۇلسۇن دەپ، داۋۇد يازغان مەدھىيە ناخشىسى. ئەي مەدھىيەمنىڭ ئىگىسى خۇدا، سۈكۈت قىلما.
2 چۈنكى يامانلار ۋە ھىيلىگەرلەرنىڭ ئاغزى ماڭا قارشى ئېچىلدى.
ئۇلار يالغانچى تىلى بىلەن ماڭا قارشى سۆزلىۋاتىدۇ.
3 نەپرەتلىك سۆزلىرى بىلەن ئۇلار چۆرەمنى ئورىۋېلىپ،
ماڭا سەۋەبسىز ھۇجۇم قىلدى.
4 مېنىڭ كۆرسەتكەن مۇھەببىتىم ئۈچۈن
ئۇلار ماڭا قارشى چىقتى.
ئەمما مەن دۇئا قىلىپ تۇردۇم.
5 ئۇلار ياخشىلىقىمغا يامانلىق،
مۇھەببىتىمگە نەپرەت قايتۇردى.
6 سەن ئۇنى سوتلايدىغان بىر يامان كىشىنى تەيىنلىگىن،
بىر ئەيىبلىگۈچى ئۇنىڭ ئوڭ يېنىدا تۇرسۇن.
7 ئۇ سوراق قىلىنسا، ئەيىبكار بولۇپ چىقسۇن،
ئۇنىڭ دۇئاسىمۇ گۇناھ ھېسابلانسۇن.
8 ئۇنىڭ كۈنلىرى قىسقا بولسۇن،
ئۇنىڭ مەنسىپىنى باشقىسى ئالسۇن.
9 ئۇنىڭ بالىلىرى يېتىم بولسۇن،
خوتۇنى تۇل قالسۇن.
10 ئۇنىڭ بالىلىرى تىلەمچىلىك قىلىپ سەرگەردان بولسۇن،
ۋەيرانە ئۆيلىرىدىن ئۇزاقلاردا نان تىلەپ يۈرسۇن.
11 ئۇنىڭ پۈتۈن بارلىقىنى جازانىخور ئېلىۋالسۇن،
ئىشلەپ تاپقىنىنى ياتلار تارتىۋالسۇن.
12 ئۇنىڭغا مېھىر-شەپقەت كۆرسىتىدىغان كىشى بولمىسۇن،
يېتىم قالغان بالىلىرىغا ئىچ ئاغرىتىدىغان ھېچكىم چىقمىسۇن.
13 ئۇنىڭ ئۇرۇق-ئەۋلادى يوقىتىلسۇن،
كېلىدىغان نەسىلگىچە ئىسىملىرى ئۆچۈرۈلۈپ كەتسۇن.
14 ئۇنىڭ ئاتا-بوۋىلىرىنىڭ يامانلىقلىرى
پەرۋەردىگارنىڭ يادىدا بولسۇن،
ئانىسىنىڭ گۇناھى ئۆچۈرۈلمىسۇن.
15 بۇلار ھەمىشە پەرۋەردىگارنىڭ كۆز ئالدىدا بولسۇن،
ئۇ ئۇلارنىڭ نامىنى يەر يۈزىدىن ئۆچۈرۈپ تاشلىسۇن.
16 چۈنكى ئۇ مېھىر-شەپقەت كۆرسىتىشنى ھېچ ئويلىمىدى،
ئەكسىچە كەمبەغەل-بىچارىلەرنى قوغلاپ يۈردى،
دىلى سۇنۇقلارنى ئۆلتۈرۈشنى مەقسەت قىلدى.
17 ئۇ لەنەت ئوقۇشنى ياخشى كۆرگەچكە،
ئۇنىڭ بېشىغا لەنەت كەلسۇن.
بەرىكەت تىلەشنى خالىمىغاچقا،
بەرىكەت ئۇنىڭدىن يىراق بولسۇن.
18 ئۇ لەنەتنى كىيىمدەك كىيىۋالغاچقا،
لەنەت ئۇنىڭ ئىچىگە سۇدەك كىرسۇن،
ئۇستىخانلىرىغا ياغدەك سىڭسۇن.
19 بۇ ئۇنىڭغا يېپىنىدىغان تون،
ھەمىشە باغلايدىغان بەلۋاغ بولسۇن.
20 بۇلار، ماڭا قارشى تۇرغۇچىلار
ۋە جېنىمغا قارشى يامان سۆزلىگۈچىلەر ئۈچۈن،
پەرۋەردىگار تەرىپىدىن بېكىتىلگەن جازا بولسۇن.
21 لېكىن سەن، ئەي رەببىم پەرۋەردىگار،
ئۆز نامىڭ ئۈچۈن ماڭا ئىلتىپات قىلغىن،
مېھىر-شەپقىتىڭ كاتتا بولغاچ مېنى قۇتقۇزغىن.
22 چۈنكى مەن بىچارە ۋە ھاجەتمەن،
قەلبىم يارىلاندى.
23 مەن ئۇزارغان كۆلەڭگىدەك يوقىلىۋاتىمەن،
چېكەتكىدەك قېقىلىۋاتىمەن.
24 روزا تۇتقىنىمدىن تىزلىرىم تىترەپ،
بەدىنىم ئورۇقلاپ كەتتى.
25 مەن ئۇلارنىڭ ئالدىدا ھاقارەتكە ئۇچرىدىم،
ئۇلار مېنى كۆرگەندە باشلىرىنى چايقىشىدۇ.
26 ئەي پەرۋەردىگار خۇدايىم، ماڭا ياردەم قىلغىن،
ئۆز مېھىر-شەپقىتىڭ بىلەن مېنى قۇتقۇزغىن.
27 ئەي پەرۋەردىگار، ئۇلار بۇ ئىشتا سېنىڭ قولۇڭ بارلىقىنى،
بۇنى سېنىڭ قىلغانلىقىڭنى بىلسۇن.
28 ئۇلار لەنەت ئوقۇسىمۇ، سەن بەرىكەت ئاتا قىلغايسەن.
ئۇلار ھۇجۇم قىلسا رەسۋا بولسۇن.
بىراق سېنىڭ خىزمەتكارىڭ شادلانسۇن.
29 دۈشمەنلىرىم خىجالەتكە پۈركەنسۇن،
ئۆز شەرمەندىلىكىنى تون قىلىپ يېپىنسۇن.
30 مەن پەرۋەردىگارغا ئۈنلۈك ئاۋازدا شۈكۈر ئېيتىمەن،
كۆپچىلىك ئارىسىدا ئۇنى مەدھىيىلەيمەن.
31 چۈنكى ئۇ مىسكىنلارنىڭ ئوڭ يېنىدا تۇرۇپ،
جانلىرىنى سوراققا تارتقانلاردىن ئۇلارنى قۇتقۇزىدۇ.