115
1 مېھىر-شەپقىتىڭ ۋە ھەقىقىتىڭ ئۈچۈن، بىزگە ئەمەس، ئەي پەرۋەردىگار، بىزگە ئەمەس،
شان-شەرەپ ئۆز نامىڭغا مەنسۇپ بولسۇن.
2 نىچۈن يات خەلقلەر:
«ئۇلارنىڭ خۇداسى قېنى؟» دېيىشسۇن؟
3 ئەمما بىزنىڭ خۇدايىمىز ئەرشلەردىدۇر،
نېمە قىلىشنى خالىسا شۇنى قىلىدۇ.
4 ئۇلارنىڭ بۇتلىرى بولسا ئالتۇن-كۈمۈشتىن ئىبارەتتۇر،
ئۇلارنى ئادەم قوللىرى ياسىغاندۇر.
5 ئۇلارنىڭ ئېغىزلىرى بولسىمۇ سۆزلىيەلمەس،
كۆزلىرى بولسىمۇ كۆرەلمەس.
6 قۇلاقلىرى بولسىمۇ ئاڭلىيالماس،
بۇرۇنلىرى بولسىمۇ پۇرىيالماس.
7 ئۇلارنىڭ قوللىرى بولسىمۇ تۇتالماس،
پۇتلىرى بولسىمۇ ماڭالماس.
ئۇلارنىڭ كانىيىدىن ئاۋاز چىقماس.
8 ئۇلارنى ياسىغۇچىلار ۋە ئۇلارغا تايانغۇچىلار
ئۇلارغا ئوخشاپ قالار.
9 ئەي ئىسرائىل، پەرۋەردىگارغا تايىنىڭلار.
ئۇ سىلەرنىڭ ياردەمچىڭلار ۋە قالقىنىڭلاردۇر.
10 ئەي ھارۇن جەمەتى، پەرۋەردىگارغا تايىنىڭلار.
ئۇ سىلەرنىڭ ياردەمچىڭلار ۋە قالقىنىڭلاردۇر.
11 ئەي پەرۋەردىگارنىڭ تەقۋادارلىرى، پەرۋەردىگارغا تايىنىڭلار.
ئۇ سىلەرنىڭ ياردەمچىڭلار ۋە قالقىنىڭلاردۇر.
12 پەرۋەردىگار بىزنى ياد ئېتىپ بەرىكەت بېرىدۇ.
ئىسرائىل جەمەتىگە بەرىكەت ئاتا قىلىدۇ.
ھارۇن جەمەتىگىمۇ بەرىكەت ئاتا قىلىدۇ.
13 پەرۋەردىگاردىن قورقىدىغانلارغا،
چوڭ-كىچىك ھەممىسىگە بەرىكەت ئاتا قىلىدۇ.
14 پەرۋەردىگار سىلەرنى كۆپەيتكەي،
سىلەرنى ۋە بالا-چاقاڭلارنى كۆپەيتكەي.
15 سىلەر ئاسمان-زېمىننى ياراتقان پەرۋەردىگارنىڭ بەرىكىتىگە ئېرىشكەنسىلەر.
16 ئاسمانلار پەرۋەردىگارنىڭ ئاسمانلىرىدۇر،
ئەمما يەرنى ئۇ ئادەم بالىلىرىغا بەرگەندۇر.
17 ئۆلۈكلەر پەرۋەردىگارنى مەدھىيىلىمەس،
سۈكۈت دىيارىغا چۈشكەنلەر ئۇنىڭغا ھەمد ئېيتالماس.
18 ئەمما بىز ھازىردىن ئەبەدكىچە پەرۋەردىگارنى مەدھىيىلەيمىز.
پەرۋەردىگارغا ھەمدۇسانالار بولسۇن!