132
1 يۇقىرىغا چىقىش ناخشىسى. ئەي پەرۋەردىگار، يادىڭغا ئالغايسەن داۋۇدنى
ۋە ئۇنىڭ تارتقان ھەممە جاپالىرىنى.
2 ئۇنىڭ پەرۋەردىگارغا قەسەم قىلىپ،
ياقۇبنىڭ ھەممىگە قادىر خۇداسى ئالدىدا ۋەدە قىلىپ
مۇنداق دېگىنىنى ئەسكە ئالغىن:
3 «مەن ھەرگىز ئولتۇرغان ئۆيۈمگە كىرىپ، ئورنۇمدا ياتمايمەن،
4 كۆزلىرىمنى ئۇيقۇغا كەتكۈزمەيمەن،
كىرپىكلىرىمنىمۇ يۇممايمەن،
5 تاكى تاپمىغۇچە پەرۋەردىگار ئۈچۈن بىر تۇرار جاينى،
ياقۇبنىڭ ھەممىگە قادىر خۇداسى ئۈچۈن بىر ماكاننى.
6 مانا، بىز ئەفراتادا ئەھدە ساندۇقى توغرىسىدا ئاڭلىدۇق،
يائارنىڭ ئېتىزلىرىدىن ئۇنى تاپتۇق.
7 ئەمدى ئۇنىڭ ئۆيلىرىگە كىرەيلى،
ئۇنىڭ ئايىغىغا سەجدە قىلايلى.
8 ئەي پەرۋەردىگار، قۇدرىتىڭنىڭ ئەھدە ساندۇقۇڭ بىلەن،
ئۆز ئارامگاھىڭغا چىقىپ كىرگىن. ■
9 كاھىنلىرىڭ ھەققانىيلىقنى يېپىنسۇن،
تەقۋادارلىرىڭ خۇشاللىق ئاۋاز بىلەن شادلانسۇن.
10 خىزمەتكارىڭ داۋۇدنىڭ خاتىرىسىنى قىلىپ،
ئۆزۈڭ تاللاپ مەسىھلىگىنىڭنىڭ يۈزىنى ياندۇرۇۋەتمىگىن.
11 ھەرگىز قەسىمىدىن يانمايدىغان پەرۋەردىگار
داۋۇدقا چىڭ قەسەم قىلىپ مۇنداق دېگەن:
«ۋۇجۇدۇڭنىڭ مېۋىسىدىن بولغاننى
سېنىڭ تەختىڭدە ئولتۇرغۇزىمەن.
12 ئەگەر ئوغۇللىرىڭ مېنىڭ ئەھدەمگە ۋاپا قىلسا
ۋە مەن ئۇلارغا ئۆگىتىدىغان يوليورۇقلىرىمنى ساقلىسا،
ئۇلارنىڭ ئوغۇللىرىمۇ ئەبەدكىچە سېنىڭ تەختىڭدە ئولتۇرىدۇ».
13 چۈنكى پەرۋەردىگار سىئوننى تاللاپ،
ئۆزىگە ماكان قىلىش ئۈچۈن ئۇنى خالىغاندۇر.
14 ئۇ ئۇنىڭ توغرىسىدا مۇنداق دېگەن:
«بۇ ئەبەدكىچە مېنىڭ ئارامگاھىمدۇر،
بۇ جاينى خالىغاچقا، مەن شۇ يەردە تۇرىمەن.
15 ئۇنىڭ رىزقىنى كەڭ قىلىمەن،
يوقسۇللىرىنى نان بىلەن تويدۇرىمەن.
16 ئۇنىڭ كاھىنلىرىغا نىجاتلىقنى كىيدۈرىمەن.
ئۇنىڭ تەقۋادارلىرى تەنتەنىلىك ئاۋازنى ياڭرىتىدۇ.
17 ئۇ يەردە مەن داۋۇد ئۈچۈن بىر مۈڭگۈزنى ئۆستۈرىمەن،
ئۆزۈم تاللاپ مەسىھلىگىنىمگە بىر چىراغنى بېكىتكەنمەن.
18 ئۇنىڭ دۈشمەنلىرىنى شەرمەندىلىك بىلەن ياپىمەن.
ئەمما ئۇنىڭ بېشىدىكى تاجى پارقىرايدىغان بولىدۇ».