140
1 نەغمىچىلەرنىڭ بېشىغا تاپشۇرۇلسۇن دەپ، داۋۇد يازغان مەدھىيە ناخشىسى. 2 مېنى رەزىلللەردىن، ئەي پەرۋەردىگار، قۇتقۇزغىن،
زوراۋانلاردىن ساقلىغىن.
3 ئۇلار كۆڭۈللىرىدە يامانلىق ئويلاپ،
ھەر كۈنى جېدەل چىقىرىدۇ.
4 ئۇلار تىللىرىنى يىلاننىڭكىدەك ئۆتكۈر قىلار،
لەۋلىرىنىڭ ئىچىدە يىلاننىڭ زەھىرى باردۇر.
سېلاھ.
5 ئەي پەرۋەردىگار، يامانلارنىڭ قوللىرىدىن مېنى قۇتقۇزغىن،
مېنى يىقىتىشنى قەستلەيدىغان زوراۋانلاردىن مېنى ساقلىغىن.
6 تەكەببۇرلار مەن ئۈچۈن يوشۇرۇن قىلتاق قۇردى.
ئۇلار تانىلارنى تارتىپ، يولنىڭ چېتىدە تور يېيىپ، قاپقان قۇردى.
سېلاھ.
7 مەن پەرۋەردىگارغا:
«سەن مېنىڭ خۇدايىمسەن» دېدىم.
ئەي پەرۋەردىگار، نالە-پەريادلىرىمغا قۇلاق سالغىن.
8 ئەي نىجاتلىقىمنىڭ كۈچى بولغان رەببىم پەرۋەردىگار،
جەڭ كۈنىدە بېشىمنى قوغدىغىن.
9 ئەي پەرۋەردىگار، يامانلارنىڭ تىلەكلىرىنى ئىجابەت قىلمىغىن،
يامان نىيەتلىرىنىڭ ئىشقا ئېشىشىغىمۇ يول قويمىغىن.
بولمىسا ئۇلار كىبىرلىنىدۇ.
سېلاھ.
10 مېنى قورشىۋالغانلارنىڭ لەۋلىرىدىن چىققان ھاقارەتلىرى
ئۇلارنىڭ ئۆز بېشىغا كەلسۇن.
11 قىزىتىلغان چوغلار ئۇلارنىڭ ئۈستىگە ياغدۇرۇلسۇن،
ئۇلار ئوتلارغا، قايتا چىقالمايدىغان چوڭقۇر ھاڭلارغا تاشلىۋېتىلسۇن.
12 چېقىمچىلىق قىلغۇچىلارغا يەر يۈزىدە ئورۇن بولمىسۇن،
بالا-قازا زوراۋانلارنى قوغلاپ يىقىتىلسۇن.
13 بىلىمەنكى، پەرۋەردىگار ئېزىلگەنلەرنىڭ دەۋاسىنى سورايدۇ،
مىسكىنلەرنىڭ ھەققىنى قوغدايدۇ.
14 شۈبھىسىز، ھەققانىيلار سېنىڭ نامىڭغا شۈكۈر ئېيتىدۇ،
دۇرۇسلار سېنىڭ ھۇزۇرۇڭدا ياشايدۇ.