143
1 داۋۇد يازغان مەدھىيە ناخشىسى. ئەي پەرۋەردىگار، دۇئايىمنى ئاڭلىغىن،
پەريادلىرىمغا قۇلاق سالغىن،
ۋاپادارلىقىڭ ۋە ھەققانىيلىقىڭ بىلەن ماڭا جاۋاب بەرگىن.
2 سېنىڭ ئالدىڭدا ھەرقانداق تىرىك جان گۇناھسىز بولمىغاچقا،
خىزمەتكارىڭنى سوراققا تارتمىغىن.
3 دۈشمەن جېنىمنى قوغلاپ،
ھاياتىمنى يەر بىلەن يەكسان قىلدى.
ئۇ مېنى ئۆلگىلى ئۇزۇن بولغان كىشىلەردەك
قاراڭغۇ يەرگە ياتقۇزۇپ قويدى.
4 شۇڭا روھىم ئىچىمدە سىقىلىپ كەتتى،
ئىچىمدە كۆڭلۈم گاڭگىراپ قالدى.
5 مەن قەدىمكى كۈنلەرنى ئەسلەپ،
سېنىڭ ھەممە قىلغان ئىشلىرىڭ ئۈستىدە چوڭقۇر ئويلىنىمەن،
قوللىرىڭنىڭ قىلغانلىرىنى ئەسلەپ خىيال قىلىمەن.
6 ساڭا قاراپ قوللىرىمنى كۆتۈرىمەن،
چاڭقىغان قاقاس زېمىندەك جېنىم ساڭا تەشنادۇر.
سېلاھ.
7 ماڭا تېز جاۋاب بەرگىن، ئەي پەرۋەردىگار،
چۈنكى روھىم ھالىدىن كەتتى.
يۈزۈڭنى مەندىن يوشۇرمىغىن،
بولمىسا مەن گۆرگە چۈشۈپ كەتكەنلەرگە قوشۇلىمەن.
8 مېھىر-شەپقىتىڭنى تاڭ سەھەردە ماڭا ئاڭلاتقىن،
چۈنكى ساڭا تايىنىمەن.
ماڭىدىغان يولۇمنى ماڭا كۆرسەتكىن،
چۈنكى جېنىم ساڭا تەلمۈرۈپ قارايدۇ.
9 ئەي پەرۋەردىگار، دۈشمەنلىرىمدىن مېنى قۇتقۇزغىن.
مەن سېنىڭ يېنىڭغا پاناھ ئىزدەپ كېلىمەن.
10 سېنىڭ ئىرادەڭنى ئورۇنلاشنى ماڭا ئۆگەتكىن،
چۈنكى سەن مېنىڭ خۇدايىمدۇرسەن.
سېنىڭ مېھرىبان روھىڭ مېنى تۈپتۈز زېمىندا يېتەكلىسۇن.
11 ئۆز نامىڭ ئۈچۈن مېنى جانلاندۇرغىن، ئەي پەرۋەردىگار،
ھەققانىيلىقىڭ بىلەن جېنىمنى قىيىنچىلىقلاردىن قۇتۇلدۇرغىن.
12 مېھىر-شەپقىتىڭ بىلەن دۈشمەنلىرىمنى يوقىتىۋەتكىن،
جېنىمنى ئازابقا سالغۇچىلارنىڭ ھەممىسىنى ھالاك قىلغىن،
چۈنكى مەن سېنىڭ خىزمەتكارىڭدۇرمەن.