بىكارچىلىق ۋە زىنا خەتىرىدىن ئاگاھلاندۇرۇش
6
1 ئەي ئوغلۇم، ئەگەر دوستۇڭ ئۈچۈن كېپىل بولغان بولساڭ، يات كىشىگە قول سوزۇپ ۋەدە بەرگەن بولساڭ،
2 ئاغزىڭنىڭ سۆزى بىلەن تۇتۇلغان بولساڭ،
لەۋلىرىڭنىڭ ئېيتقىنى بىلەن باغلىنىپ قالغان بولساڭ،
3 يېقىنىڭنىڭ قولىغا چۈشكىنىڭ ئۈچۈن
مۇنداق قىلغىن، ئەي ئوغلۇم:
ئۆزۈڭنى قۇتۇلدۇرۇشۇڭ ئۈچۈن ئۇنىڭ يېنىغا بارغىن،
ئۇنىڭ ئالدىغا يىقىلىپ، ئۇنىڭغا يالۋۇرغىن.
4 كۆزلىرىڭگە ئۇيقۇ بەرمىگىن،
قىرپىقلىرىڭنى قاقمىغىن.
5 ئوۋچىنىڭ قولىدىن قېچىۋاتقان كېيىكتەك،
ئوۋچىنىڭ تورىدىن قېچىۋاتقان قۇشتەك قۇتۇلۇشقا تىرىشقىن.
6 ئەي ھۇرۇن، چۈمۈلىگە بېرىپ قاراپ باققىن،
ئۇنىڭ ھەرىكەتلىرىگە سەپسېلىپ قاراپ دانا بولغىن.
7 ئۇنىڭغا نە سەردار، نە نازارەتچى، نە خوجا بولمىسىمۇ،
8 ئۇ ياز ۋاقتىدا ئوزۇقىنى تەييارلايدۇ،
ئورما ۋاقتىدا ئاشلىقىنى يىغىدۇ.
9 ئەي ھۇرۇن، قاچانغىچە ئۇخلايسەن؟
قاچان ئۇيقۇڭدىن ئويغىنىپ تۇرىسەن؟
10 «يەنە ئازغىنە ئۇخلىۋالاي، ئازغىنە مۈگدىۋالاي،
يەنە ئازغىنە ۋاقىت قول قوشتۇرۇپ يېتىۋالاي» دېسەڭ،
11 نامراتلىق بىر بۇلاڭچىدەك ئۈستۈڭگە كېلىدۇ،
موھتاجلىق بىر قاراقچىدەك سېنى باسىدۇ.
12 ھېچنېمىگە يارىمايدىغان يامان ئادەم
ئاغزى بىلەن يالغان سۆزلەپ يۈرىدۇ.
13 ئۇ كۆزلىرىنى قىسىپ،
پۇتلىرى ۋە قوللىرى بىلەن شەرەت قىلىپ يۈرىدۇ.
14 مۇنداق كىشىنىڭ كۆڭلى قارا نىيەتلىكتۇر،
ئۇ ھەمىشە جېدەل چىقىرىپ يۈرىدۇ.
15 شۇڭا ئۇنىڭغا تۇيۇقسىز بالا-قازا كېلىدۇ،
ئۇ قۇتۇلالماي بىردىنلا ئېزىلىدۇ.
16 پەرۋەردىگار يامان كۆرگەن ئالتە نەرسە بار،
ئۇنىڭغا يىرگىنچلىك بولغان يەتتە نەرسە بار:
17 ئۇلار بولسا تەكەببۇر كۆز، يالغانچى تىل،
بىگۇناھ قان تۆكىدىغان قوللار،
18 قارا نىيەتلىك كۆڭۈل،
يامانلىققا يۈگۈرىدىغان پۇتلار،
19 يالغان سۆزلەيدىغان ساختا گۇۋاھچى
ۋە قېرىنداشلار ئارىسىدا جېدەل تېرىغۇچى.
20 ئەي ئوغلۇم، ئاتاڭنىڭ بۇيرۇقلىرىغا بويسۇنغىن،
ئاناڭنىڭ تەلىمىنى تاشلىمىغىن.
21 بۇلارنى يۈرىكىڭگە ئورنىتىۋالغىن،
بوينۇڭغا مارجاندەك ئېسىۋالغىن.
22 بارغىنىڭدا ئۇلار سېنى باشلايدۇ،
ياتقىنىڭدا سېنى ساقلايدۇ،
ئويغانغىنىڭدا ساڭا سۆزلەيدۇ.
23 چۈنكى بۇيرۇق بىر چىراغدۇر، تەلىم بىر نۇردۇر
ۋە تەربىيىنىڭ تەنبىھلىرى ھايات يولىدۇر.
24 ئۇلار سېنى ساقلايدۇ يامان ئايالدىن
ۋە بۇزۇق خوتۇننىڭ سىلىق سۆزلىرىدىن.
25 ئۆز كۆڭلۈڭدە ئۇنىڭ گۈزەللىكىنى ئارزۇ قىلمىغىن،
ئۇ سېنى قاش-كۆز ئوينىتىشى بىلەن جەلپ قىلىپ ئازدۇرمىسۇن.
26 چۈنكى پاھىشە ئايالنىڭ سەۋەبىدىن
كىشى بىر چىشلەم نانغا موھتاج بولار،
باشقا كىشىنىڭ خوتۇنى كىشىنىڭ ئەزىز جېنىنى ئوۋلىۋالار.
27 بىر كىشى قوينىغا ئوت سالسا، كىيىمى كۆيۈپ كەتمەمدۇ؟
28 چوغلار ئۈستىدە ماڭسا، پۇتلىرى كۆيۈپ كەتمەمدۇ؟
29 ئۆز قوشنىسىنىڭ ئايالى بىلەن بىر ئورۇندا ياتقان كىشى شۇنداق بولار،
كىمكى باشقىسىنىڭ ئايالىغا تەگسە، جازاسىز قالماس.
30 ئاچ قېلىپ، ئۆز قورسىقىنى تويغۇزۇش ئۈچۈن
ئوغرىلىق قىلغان ئوغرى كەمسىتىلمەس.
31 لېكىن تۇتۇلۇپ قالسا، ئۇ يەتتە ھەسسە تۆلەم تۆلەر،
ئۆيىدىكى ھەممە نەرسىنى بېرىشى لازىم بولار.
32 بىر ئايال بىلەن زىنا قىلغۇچى ئەقىلسىزدۇر،
ئۇ ئۆز جېنىغا ھالاكەت ئېلىپ كېلىدۇ.
33 ئۇ تاياق ۋە دەشنەم يەيدۇ،
ئۇنىڭ شەرمەندىلىكى ئۆچۈرۈلمەيدۇ.
34 چۈنكى كۈنلەش ئوتى ئېرىنىڭ غەزىپىنى قوزغار،
ئۇ ئىنتىقام ئالغان كۈنىدە رەھىم قىلماس.
35 ئۇ سوۋغات قوبۇل قىلماس،
قانچىلىك چوڭ تۆلەم بەرسەڭمۇ، ئۇ رازى بولماس.