11
1 يالغان تارازا پەرۋەردىگارغا يىرگىنچلىكتۇر، لېكىن توغرا تارازا تېشى ئۇنى خۇرسەن قىلىدۇ. ■
2 تەكەببۇرلۇققا شەرمەندىچىلىك ئەگىشىپ كېلەر،
ئەمما كەمتەرلىككە دانالىق ھەمراھ بولار.
3 دۇرۇسلارنىڭ پاك تىلى ئۆزلىرىنى يېتەكلەر،
ۋاپاسىزلارنىڭ ئەگرىلىكى ئۆزلىرىنى ۋەيران قىلار.
4 خۇدانىڭ غەزەپ كۈنىدە دۆلەتنىڭ پايدىسى بولماس،
لېكىن ھەققانىيلىق ئۆلۈمدىن قۇتقۇزار.
5 توغرا كىشىنىڭ ھەققانىيلىقى ئۇنىڭ يولىنى تۈز قىلار،
لېكىن يامان ئادەم ئۆز يامانلىقىدىن يىقىلار.
6 دۇرۇسلارنىڭ ھەققانىيلىقى ئۇلارنى قۇتقۇزار،
لېكىن ۋاپاسىزلار ئۆز بۇزۇق نىيىتىدىن تۇتۇلار.
7 يامان ئادەم ئۆلسە، ئۇنىڭ ئۈمىدى يوققا چىقار،
يامانلىقنىڭ ئىنتىزارى بىكار بولار.
8 ھەققانىي ئادەم بالا-قازادىن قۇتۇلار،
يامان كىشى ئۇنىڭ ئورنىغا بالا-قازاغا دۇچار بولار.
9 بۇزۇق ئادەم ئۆز تىلى بىلەن قوشنىسىغا ھالاكەت ئېلىپ كېلەر،
لېكىن ھەققانىيلار ئىلىم-ھېكمەت بىلەن قۇتقۇزۇلار.
10 ھەققانىيلار روناق تاپسا شەھەر شادلىنار،
يامانلار ھالاك بولسا خەلق تەنتەنە قىلار.
11 دۇرۇسلارنىڭ بەرىكىتى بىلەن شەھەر ئۇلۇغلىنار،
لېكىن ئۇ يامانلارنىڭ تىلىدىن خاراب بولار.
12 ئەقىلسىز كىشى ئۆز قوشنىسىنى كەمسىتەر،
ئەقىل-پاراسەتلىك ئادەم ئاغزىنى يىغار.
13 گەپ توشۇغۇچى سىرنى ئاشكارىلار،
ئىشەنچلىك كىشى سىرنى ساقلار.
14 ياخشى مەسلىھەت بولمىسا، خەلق ۋەيران بولار.
ياخشى مەسلىھەتچىلەر كۆپ بولسا، خەلقنىڭ ئەھۋالى ئوبدان بولار.
15 باشقىسىغا كېپىل بولغان كىشى بالاغا چۈشەر،
كېپىل بولۇشنى يامان كۆرگەن كىشى تىنچ-ئامان ياشار.
16 مۇلايىم ئايال ھۆرمەتكە ئىگە بولار،
زوراۋانلار بايلىقنىلا ئىگىلەر.
17 رەھىمدىل كىشى ئۆز جېنىغا ياخشىلىق كەلتۈرەر،
رەھىمسىز كىشى ئۆز تېنىگە زىيان يەتكۈزەر.
18 يامان ئادەمنىڭ ئەجرى بىكارغا كېتەر،
ھەققانىيلىق ئۇرۇقىنى تېرىغۇچى چوقۇم ئىنئام تاپار.
19 ھەققانىيلىقتا مەزمۇت تۇرغان كىشى ھايات تاپار،
يامانلىققا ئەگەشكەن كىشى ئۆلۈمگە بارار.
20 پەرۋەردىگار ئەگرى كۆڭۈللۈك كىشىدىن يىرگىنەر،
لېكىن ئۇ يولى توغرا كىشىدىن خۇرسەن بولار.
21 بىلىپ قويۇڭلاركى، يامانلار چوقۇم جازاغا تارتىلار،
لېكىن ھەققانىيلارنىڭ ئۇرۇق-ئەۋلادى نىجاتلىق تاپار.
22 چىرايلىق، لېكىن ئەقىلسىز خوتۇن
توڭگۇزنىڭ تۇمشۇقىغا سالغان ئالتۇن ھالقىدەكتۇر.
23 ھەققانىيلارنىڭ ئارزۇسى پەقەت ياخشىلىق ئېلىپ كېلەر،
لېكىن يامانلارنىڭ ئۈمىد قىلغىنى غەزەپكە ئېلىپ بارار.
24 بىرى كۆپ بەرسىمۇ، ئۇنىڭ بارى كۆپىيەر،
يەنە بىرى ھەددىدىن كۆپ ئايىسىمۇ، كەمبەغەل بولۇپ قالار.
25 قولى ئوچۇق كىشى بەرىكەت تاپار،
باشقىلارنى سۇغارغان كىشى ئۆزى سۇغىرىلار.
26 ئاشلىقىنى سېتىپ بەرمەي ساقلايدىغان كىشىنى خەلق قارغار،
لېكىن ئاشلىقنى سېتىپ بېرىدىغان كىشىنىڭ بېشىغا بەرىكەت ياغار.
27 ياخشىلىققا ئىنتىلگۈچىگە ئىلتىپات كۆرسىتىلەر،
لېكىن يامانلىقنى ئىزدىگۈچىگە يامانلىق كېلەر.
28 ئۆز دۆلىتىگە تايانغانلار يىقىلار،
لېكىن ھەققانىيلار بىخىدەك كۆكلەر.
29 ئۆز ئۆيىگە قىيىنچىلىق سالغان كىشى شامالغىلا ئىگە بولار،
ئەقىلسىز كىشى دانا كىشىگە قۇل بولار.
30 ھەققانىي ئادەمنىڭ مېۋىسى بىر ھاياتلىق دەرىخىدەكتۇر،
دانا كىشى كۆڭۈللەرنى ئۆزىگە تارتىدۇ.
31 ئەگەر ھەققانىي ئادەمگە بۇ ئالەمدە ياندۇرۇلسا،
قانچە ئوشۇقراق يامانلار ۋە گۇناھكارلارغا ياندۇرۇلار.