14
1 دانا ئايال ئۆز ئۆيىنى ئاۋات قىلار، ئەخمەق ئايال ئۆز قولى بىلەن ئۇنى ۋەيران قىلار.
2 توغرا يولدا ماڭغان كىشى خۇدادىن قورقار،
لېكىن يوللىرى ئەگرى كىشى ئۇنى كۆزگە ئىلماس.
3 ئەخمەقنىڭ تەكەببۇر ئاغزى ئۆزىگە قامچا بولار،
لېكىن دانانىڭ لەۋلىرى ئۆزىنى ساقلار.
4 كالا يوق بولسا، ئوقۇر بىكار تۇرار،
ئۆكۈزنىڭ كۈچى بىلەن مول ھوسۇل بولار.
5 سادىق گۇۋاھچى يالغان سۆز ئېيتماس،
ساختا گۇۋاھچى يالغاننى كۆپ سۆزلەر.
6 مەسخىرە قىلغۇچى ھېكمەت ئىزدىسىمۇ ئۇنى تاپمايدۇ،
لېكىن ئەقىل-پاراسەتلىك كىشىگە بىلىم ئاشۇرۇش ئاساندۇر.
7 ئۆزۈڭنى نېرى تۇتقىن ئەخمەق ئادەمدىن،
ئىلىم-ھېكمەت تاپمايسەن ئۇنىڭ لەۋلىرىدىن.
8 زېرەك كىشىنىڭ دانالىقى ئۆز يولىنى ئويلاپ چۈشىنىشىدۇر،
ئەخمەقلەرنىڭ ئەخمەقلىقى ئۇنىڭ ئالدامچىلىقىدۇر.
9 ئەخمەقلەر گۇناھنى زاڭلىق قىلار،
لېكىن دۇرۇسلار ئارىسىدا ئىلتىپات تېپىلار.
10 كۆڭۈل ئۆز دەردىنى ئۆزىلا ياخشى بىلەر،
باشقا كىشى ئۇنىڭ خۇشاللىقىغىمۇ ئارىلىشالماس.
11 يامانلارنىڭ ئۆيى ئۆرۈلۈپ ۋەيران بولار،
لېكىن دۇرۇسلارنىڭ چېدىرى ئاۋات بولار.
12 بەزى يوللار ئادەمگە توغرا كۆرۈنەر،
لېكىن ئاخىرى ئۆلۈمگە ئېلىپ بارار.
13 بەزىدە ئادەم كۈلسىمۇ يۈرەك ئاغرار،
بەزىدە خۇشاللىق غەم بىلەن تۈگەر.
14 كۆڭلىدە ئېزىقىپ كەتكەن كىشى ئۆز يوللىرىدىن تويار،
ياخشى كىشى ئۆز ياخشىلىقىدىن تويار.
15 ئەخمەق ئادەم ھەرقانداق سۆزگە ئىشىنەر،
زېرەك ئادەم ھەر قەدىمىدە ئويلىنار.
16 دانا كىشى ئېھتىيات قىلىپ يامانلىقتىن قاچار،
ئەقىلسىز كىشى يوغانچىلىق قىلىپ بىغەم يۈرەر.
17 تېرىككەك ئادەم ئەخمەقلىق قىلار،
ھىيلىگەر كىشى نەپرەتكە قالار.
18 نادان ئادەملەرگە ئەخمەقلىق مىراس بولار،
زېرەك ئادەملەرگە ئىلىم-ھېكمەت تاج بولۇپ تاقىلار.
19 يامانلار ياخشىلارنىڭ ئالدىدا باش ئېگەر،
رەزىللەر ھەققانىيلارنىڭ دەرۋازىلىرىدا ئېگىلەر.
20 نامراتقا ئۆز يېقىنلىرىمۇ ئۆچ بولار،
لېكىن باينىڭ دوستلىرى كۆپ بولار.
21 ئۆز قوشنىسىنى كەمسىتكەن كىشى گۇناھ قىلار،
مىسكىنلەرگە رەھىم قىلغان كىشى بەختلىك بولار.
22 يامانلىق قىلغۇچىلار يولدىن ئادىشىپ كەتتى ئەمەسمۇ؟
لېكىن نىيىتى ياخشىلار مېھىر-شەپقەت ۋە سادىقلىق تاپار.
23 ھەرقانداق مېھنەتنىڭ پايدىسى بولار،
لېكىن قۇرۇق گەپتىن كىشى موھتاجلىقتا قالار.
24 دانالارنىڭ تاجى ئۇلارنىڭ دۆلىتىدۇر،
ئەخمەقلەرنىڭ ئەخمەقلىقى ئۇنى ئەخمەقلىق بىلەن بېزەيدۇ.
25 توغرا گۇۋاھچى جانلارنى قۇتقۇزار،
لېكىن كۆپ يالغان سۆزلىگۈچى ھىيلىگەر بولار.
26 پەرۋەردىگاردىن قورقىدىغان كىشىنىڭ مۇستەھكەم پاناھگاھى بار،
ئۇنىڭ بالىلىرىمۇ ئۇنىڭدا پاناھ تاپار.
27 پەرۋەردىگاردىن قورقۇش ھاياتلىقنىڭ بۇلىقىدۇر،
ئۇ كىشىنى ئۆلۈمنىڭ تۇزىقىدىن ساقلاپ قالار.
28 خەلقى كۆپ بولسا پادىشاھنىڭ ئىززىتى چوڭ بولار،
لېكىن خەلقى ئاز بولسا ئۇ ھالاكەتكە ئۇچرار.
29 ئاسان غەزەپلەنمەيدىغان كىشى چوڭ ئەقىل-پاراسەت كۆرسىتەر،
لېكىن تېرىككەك كىشى ئەخمەقلىقىنى ئاشكارىلار.
30 خاتىرجەم كۆڭۈل بەدەننىڭ ساغلاملىقىدۇر،
لېكىن ھەسەت سۆڭەكنى چىرىتىدىغان كېسەلدۇر.
31 بىچارىلەرگە زۇلۇم قىلغان كىشى ياراتقۇچىسىغا ھاقارەت قىلار،
لېكىن مىسكىنلەرگە رەھىم قىلغان كىشى ئۇنى ئۇلۇغلار.
32 يامان كىشى ئۆز يامانلىقىدىن يىقىلار،
ھەققانىي ئادەم ئۆلۈم ئالدىدىمۇ ئۈمىدلىك بولار.
33 ئەقىل-پاراسەتلىك كىشىنىڭ كۆڭلىدە دانالىق ساقلىنار،
ئەخمەقلەرنىڭ كۆڭلىدە نېمە بار بولسا، ئاشكارا بولار.
34 ھەققانىيەت خەلقنى كۆتۈرەر،
لېكىن گۇناھ خەلقلەرنى رەسۋاچىلىققا قالدۇرار.
35 پادىشاھ ئەقىللىق خىزمەتكاردىن رازى بولار،
لېكىن ئۇنى شەرمەندە قىلغان كىشى ئۈستىگە ئۇنىڭ غەزىپى چۈشەر.