15
1 يۇمشاق جاۋاب غەزەپنى باسار، لېكىن قاتتىق سۆز ئاچچىقنى قوزغار.
2 دانالارنىڭ تىلى بىلىمنى ئۆستۈرەر،
ئەخمەقلەرنىڭ ئاغزى ئەخمەقلىقتىن تېشىپ كېتەر.
3 پەرۋەردىگارنىڭ كۆزى ھەر يەردە بولار،
ئۇ ھەم يامانلارنى، ھەم ياخشىلارنى كۆرۈپ تۇرار.
4 شىپالىق يۇمشاق تىل ھاياتلىق دەرىخىدۇر،
لېكىن ئەگرى تىل كىشىلەرنىڭ روھىنى سۇندۇرىدۇ.
5 ئەخمەق ئوغۇل ئاتىسىنىڭ تەربىيىسىنى رەت قىلار،
لېكىن نەسىھىتىگە قۇلاق سالغۇچى زېرەك بولار.
6 ھەققانىينىڭ ئۆيىدە چوڭ خەزىنە بار،
لېكىن يامانلارنىڭ تاپقىنى زىيان كەلتۈرەر.
7 دانالارنىڭ لەۋلىرى بىلىم تارقىتار،
ئەمما ئەخمەقلەرنىڭ كۆڭلى ئۇنداق ئەمەستۇر.
8 يامانلارنىڭ قۇربانلىقى پەرۋەردىگارغا يىرگىنچلىكتۇر،
لېكىن دۇرۇسلارنىڭ دۇئاسى ئۇنىڭ خۇرسەنلىكىدۇر.
9 يامانلارنىڭ يوللىرىدىن پەرۋەردىگار يىرگىنەر،
لېكىن ھەققانىيلىقنى ئىزدىگەن كىشىنى ئۇ سۆيەر.
10 يولدىن چىقىپ كەتكەنلەر قاتتىق جازالىنار،
تەنبىھنى يامان كۆرگەن كىشى ھالاك بولار.
11 ئۆلۈكلەر دىيارى ۋە ھالاكەت ھاڭى
پەرۋەردىگارنىڭ ئالدىدا ئاشكارا تۇرۇقلۇق،
قانچە ئوشۇقراق ئادەم بالىلىرىنىڭ كۆڭۈللىرى
ئۇنىڭ ئالدىدا ئاشكارىدۇر.
12 مەسخىرە قىلغۇچى ئۆزىگە تەنبىھ بەرگۈچىنى ياخشى كۆرمەس،
ئۇ دانالارنىڭ يېنىغا كەلمەس.
13 كۆڭۈل خۇش بولسا، چىراي ئېچىلىپ كېتەر،
كۆڭۈل غەمكىن بولسا، روھ چۈشۈپ كېتەر.
14 ئەقىل-پاراسەتلىك كىشىنىڭ كۆڭلى ئىلىم-ھېكمەتنى ئىزدەر،
ئەخمەقلەرنىڭ ئاغزىنىڭ غىزاسى ئەخمەقلىقتۇر.
15 غەمكىن كىشىنىڭ ھەممە كۈنلىرى ياماندۇر،
لېكىن كۆڭلى خۇش كىشى دائىم زىياپەتتە بولغاندەكتۇر.
16 پەرۋەردىگاردىن قورقىدىغان كىشىنىڭ دۆلىتى ئاز بولسىمۇ،
ئۇ بىئاراملىققا سەۋەب بولغان چوڭ خەزىنىدىن ئەۋزەلدۇر.
17 مېھىر-مۇھەببەت بىلەن يېگەن كۆكتات،
ئاداۋەت بىلەن يېگەن سېمىز مالنىڭ گۆشىدىن ئەۋزەل.
18 تېرىككەك ئادەم جېدەل چىقىرار،
سەۋرچان كىشى تالاش-تارتىشنى باسار.
19 ھۇرۇن كىشىنىڭ يولى بىر تىكەنلىك چاتقالدەكتۇر،
ئەمما دۇرۇسلارنىڭ يولى تۈزدۇر.
20 دانا ئوغۇل ئۆز ئاتىسىنى خۇش قىلار،
ئەخمەق ئۆز ئانىسىنى كەمسىتەر.
21 ئەقىلسىز كىشى ئەخمەقلىقتىن خۇشال بولار،
ئەقىل-پاراسەتلىك كىشى توغرا يول بىلەن ماڭار.
22 مەسلىھەت بولمىسا، مەقسەتلەر يوققا چىقار،
مەسلىھەتچىلەر كۆپ بولسا مەقسەتلەر پىششىق بولار.
23 توغرا جاۋاب بەرگەن كىشى خۇشال بولۇر،
ۋاقتىدا ئېيتىلغان سۆز نەقەدەر ياخشىدۇر.
24 دانا كىشى ماڭغان ھايات يولى يۇقىرىغا باشلار،
بۇ يول ئۇنى ئۆلۈكلەر دىيارىدىن قۇتقۇزۇپ قالار.
25 پەرۋەردىگار تەكەببۇرلارنىڭ ئۆيىنى ۋەيران قىلار،
ئەمما تۇل خوتۇننىڭ ئۆي-زېمىنىنى ساقلار.
26 يامانلارنىڭ ئوي-پىكىرلىرى پەرۋەردىگارغا يىرگىنچلىكتۇر،
لېكىن پاك كىشىلەرنىڭ سۆزلىرى يېقىملىقتۇر.
27 ئاچ كۆز كىشى ئۆز ئۆيىگە بالا-قازا كەلتۈرەر،
لېكىن پارىنى يامان كۆرگەن كىشى ئامان ياشار.
28 ھەققانىي كىشى كۆڭلىدە ئويلاپ-ئويلاپ جاۋاب بېرەر،
لېكىن يامانلارنىڭ ئاغزىدىن يامانلىق تۆكۈلەر.
29 پەرۋەردىگار يامانلاردىن يىراق تۇرار،
ئەمما ھەققانىيلارنىڭ دۇئاسىنى ئاڭلار.
30 كۆزلەرنىڭ نۇرى كۆڭۈلنى خۇش قىلار،
خۇش خەۋەر سۆڭەكلەرنى ساغ قىلار.
31 ھاياتلىققا ئېرىشتۈرىدىغان نەسىھەتكە قۇلاق سالغان كىشى،
دانالارنىڭ ئارىسىدىن ئورۇن ئالار.
32 تەربىيەنى رەت قىلغان كىشى ئۆز جېنىنى خار قىلار،
نەسىھەتكە قۇلاق سالغان كىشى ئەقىل تاپار.
33 پەرۋەردىگاردىن قورقۇش ئادەمگە دانالىق ئۆگىتەر،
ئىززەتتىن ئىلگىرى كەمتەرلىك پەيدا بولار.