17
1 تىنچ-ئامانلىقتا يېگەن بىر پارچە قۇرۇق نان، زىياپەت ئۆيىدە جېدەل-ماجىرا بىلەن يېگەن مول نېمەتلەردىن ئەۋزەلدۇر.
2 ئەقىللىق خىزمەتكار ئۇياتقا قالدۇرغۇچى ئوغۇلنى باشقۇرار،
ئۇ قېرىنداشلار بىلەن تەڭ مىراسقا ئىگە بولار.
3 خۇمداندا كۈمۈش، تونۇردا ئالتۇن تاۋلانغاندەك،
پەرۋەردىگار كۆڭۈللەرنى سىناق قىلىپ تاۋلار.
4 يامانلىق قىلغۇچى ھىيلىگەر لەۋلەرنىڭ سۆزىگە قۇلاق سالار،
يالغانچى غەيۋەت-پىتنە گەپنى تىڭشار.
5 كەمبەغەلنى مەسخىرە قىلغۇچى ئۆز ياراتقۇچىسىنى مەنسىتمەس،
باشقىلارنىڭ مۇسىبەتىگە خۇشال بولغان كىشى جازاسىز قالماس.
6 قېرىلارنىڭ تاجى نەۋرىلىرى بولار،
ئوغۇللارنىڭ ئىززىتى ئاتا-بوۋىلىرى بولار.
7 ئەخمەق يوغان گەپ قىلسا ئۇنىڭغا ياراشماس،
ئېسىلزادە كىشى يالغان سۆزلىسە ئۇنىڭغا تېخىمۇ ياراشماس.
8 سوۋغات ئۇنى بەرگۈچىنىڭ نەزىرىدە قىممەتلىك گۆھەردۇر،
كىشى ئۇنىڭ بىلەن نەگە بارسا، مۇۋەپپەقىيەتلىك بولۇر.
9 باشقىنىڭ گۇناھىنى كەچۈرگەن كىشى مۇھەببەتنى كۆزلەر،
كونا گەپنى قوزغىغان كىشى دوستلارنى بىر-بىرىدىن ئايرىۋېتەر.
10 دانا كىشىگە بېرىلگەن بىرلا نەسىھەت سۆزى،
ئەخمەققە ئۇرۇلغان يۈز قامچىدىن پايدىلىق بولار.
11 قوزغىلاڭ كۆتۈرگۈچى پەقەت يامانلىقنى ئىزدەر،
شۇنىڭ ئۈچۈن رەھىمسىز ئەلچى ئۇنىڭغا ئەۋەتىلەر.
12 ھاماكەتلىك قىلىۋاتقان ئەخمەققە ئۇچراپ قالغاندىن كۆرە،
بالىلىرىدىن ئايرىلغان ئېيىققا ئۇچراپ قالغان ياخشىدۇر.
13 ياخشىلىققا يامانلىق قايتۇرغان كىشىنىڭ ئۆيىدىن
بالا-قازا ھەرگىز كەتمەس.
14 جېدەلنىڭ باشلىنىشى سۇ توسمىسىنى تەشكەنگە ئوخشار،
شۇڭا جېدەل-ماجىرا باشلىنىشى بىلەنلا ئۇنى توختاتقىن.
15 يامان كىشىنى ھەققانىي سانىغان كىشى،
ھەققانىي كىشىنى يامان سانىغان كىشى،
ئىككىلىسى پەرۋەردىگارنىڭ نەزىرىدە يىرگىنچلىكتۇر.
16 ئەخمەقنىڭ قولىدىكى پۇلنىڭ نېمە پايدىسى بار؟
ئۇنىڭ ئەقلى بولمىغاچقا، ئۇنىڭ بىلەن ھېكمەت ئىزدىشى ئۈنۈمسىز بولار.
17 ھەقىقىي دوست مېھىر-مۇھەببەت كۆرسىتەر ھەرقاچان،
قېرىنداش ئېغىر كۈنلەردە يەردەمچى بولۇشقا تۇغۇلغان.
18 ئەقىلسىز كىشى قول بېرىپ،
ئۆز قوشنىسىغا كېپىل بولار.
19 جېدەلنى ياخشى كۆرگەن كىشى گۇناھنى ياخشى كۆرەر،
ئىشىكىنى ئېگىز ياسىغان كىشى ئۆز ۋەيرانلىقىنى ئىزدەر.
20 ئەگرى كۆڭۈللۈك كىشى ياخشىلىقتىن مەھرۇم بولار،
تىلىدا ھەقىقەتنى بۇرمۇلىغۇچى بالاغا ئۇچرار.
21 ئەخمەق بالا تاپقان كىشى ئۇنىڭدىن غەم يەيدۇ،
ئەخمەقنىڭ ئاتىسىنىڭ خۇشاللىقى يوقتۇر.
22 شاد كۆڭۈل ئوبدان داۋا بولار،
لېكىن ئېزىلگەن روھ ئۇستىخان يىلىكىنى قۇرۇتار.
23 يامان كىشى يوشۇرۇنچە پارا ئېلىپ،
ئادالەت يوللىرىنى بۇرمىلار.
24 ئەقىل-پاراسەتلىك كىشى ھېكمەتنى كۆزلەر،
لېكىن ئەخمەقنىڭ كۆزلىرى يەرنىڭ چەتلىرىگە تىكىلەر.
25 ئەخمەق ئوغۇل ئۆز ئاتىسىنى ئازابقا سالار،
تۇغقان ئانىسىغا دەرد-ئەلەم يەتكۈزەر.
26 ھەققانىي ئادەمگە جازا بېرىش توغرا ئەمەستۇر،
شەرەپلىك كىشىلەرنى ئۇرۇشمۇ ناتوغرىدۇر.
27 ئىلىم-ھېكمەت ئىگىسى گەپنى ئاز قىلار،
ئەقىل-پاراسەتلىك كىشى ئۆزىنى تۇتۇۋالار.
28 ئەخمەق كىشى شۈك تۇرسا، دانا ھېسابلىنار،
لەۋلىرىنى ئاچمىغان كىشى ئەقىل-پاراسەتلىك كۆرۈنەر.