18
1 باشقىلار بىلەن ئارىلاشماي يالغۇز يۈرگەن كىشى ئۆزىنىلا ئويلار، ھەرقانداق دانالىققا ئۇنىڭ ئاچچىقى كېلەر.
2 ئەخمەق كىشى ئەقىل-ئىدراكقا قىزىقماس،
ئۆز كۆڭلىدە بارىنى ئاشكارىلاشقىلا قىزىقار.
3 يامان كىشى قەيەرگە كىرسە،
ھاقارەتمۇ كىرەر.
ئاھانەت شەرمەندىلىك بىلەن تەڭ كېلەر.
4 ئادەمنىڭ ئاغزىدىكى سۆزلەر چوڭقۇر سۇلاردەك بولار،
ھېكمەتنىڭ بۇلىقى ئېقىپ تۇرغان سۇلارغا ئوخشار.
5 ھۆكۈم قىلىشتا يامان كىشىگە يان بېسىپ،
ھەققانىي ئادەمگە ناھەقلىق قىلىش ناتوغرىدۇر.
6 ئەخمەقنىڭ لەۋلىرى جېدەل تېرەر،
ئۆز ئاغزى ئۇنى تاياققا تۇتۇپ بېرەر.
7 ئەخمەقنىڭ ئاغزى ئۆزىگە بالا كەلتۈرەر،
لەۋلىرى ئۆز جېنى ئۈچۈن قىلتاق بولار.
8 غەيۋەتچىنىڭ سۆزلىرى شېرىن لوقمىدەك بولۇپ،
كۆڭۈلنىڭ تېگىگە چۈشەر.
9 كىمكى ئۆز ئىشىدا ھۇرۇن بولسا،
ۋەيران قىلغۇچىنىڭ قېرىندىشى بولار.
10 پەرۋەردىگارنىڭ نامى مۇستەھكەم مۇنار،
ھەققانىي ئادەم ئۇ يەرگە يۈگۈرۈپ بېرىپ پاناھ تاپار.
11 باينىڭ خەزىنىلىرى ئۇنىڭغا مۇستەھكەم شەھەردەكتۇر،
ئۇنىڭ خىيالىدا ئۇ ئېگىز سېپىلدەكتۇر.
12 يىقىلىشتىن ئىلگىرى تەكەببۇرلۇق ئادەمنىڭ كۆڭلىگە كېلەر،
ئەمما ئىززەتتىن ئىلگىرى كەمتەرلىك پەيدا بولار.
13 سۆزنى ئاڭلىماستىن ئىلگىرى جاۋاب بەرگەن كىشى،
ئەخمەقلىقىنى كۆرسىتىپ ئۆزىگە خىجالەت كەلتۈرەر.
14 ئىنساننىڭ روھى ئۇنى كېسەلگە چىداملىق قىلار،
ئەمما روھى سۇنغان بولسا، كىممۇ ئۇنى كۆتۈرەلەر؟
15 ئەقىل-پاراسەتلىك كىشىنىڭ كۆڭلى بىلىم تاپار،
دانالارنىڭ قۇلاقلىرى ئىلىم-ھېكمەتنى ئىزدەر.
16 سوۋغات ئادەمنىڭ يولىنى ئاچار،
ئۇنى ئۇلۇغلارنىڭ ئالدىغا باشلاپ بارار.
17 ئاۋۋال كېلىپ دەۋا قىلغاننىڭ سۆزى راستتەك كۆرۈنەر،
لېكىن قارشى تەرەپ سوئال قويۇپ ئىشنى سۈرۈشتۈرەر.
18 چەك تاشلاش جېدەللەرنى تۈگىتەر،
كۈچلۈك كىشىلەرنىڭ ئوتتۇرىسىدىكى دەۋانىمۇ ھەل قىلار.
19 رەنجىگەن قېرىنداشنى رازى قىلماق
مۇستەھكەم شەھەرنى ئالماقتىن مۈشكۈلدۇر.
ئۇرۇش-جېدەل قورغاننىڭ ئالدىدىكى بالداقلاردەكتۇر.
20 ئادەمنىڭ قورسىقى ئاغزىنىڭ مېۋىسىدىن تويار،
لەۋلىرىنىڭ ھوسۇلىدىن ئۇ توق بولار.
21 ئۆلۈم ۋە ھاياتلىق تىلنىڭ ئىلكىدە بولار،
ئۇنى سۆيگەنلەر ئۇنىڭ مېۋىسىغا تويار.
22 ئۆزىگە خوتۇن تاپقان كىشى ياخشىلىق تاپقان بولار،
ئۇ پەرۋەردىگارنىڭ مەرھەمىتىگە ئېرىشكەن بولار.
23 كەمبەغەل يالۋۇرۇپ سۆزلەر،
باي بولسا قوپاللىق بىلەن جاۋاب بېرەر.
24 دوستلىرى كۆپ بولغان كىشى ئۆزىگە ھالاكەت ئېلىپ كېلەر،
لېكىن بەزى دوست بىر تۇغقاندىنمۇ ۋاپادار بولار.