19
1 توغرا يولدا ماڭغان كەمبەغەل كىشى، تىلىنى تولغاپ يالغان سۆزلەيدىغان ئەخمەقتىن ياخشى.
2 بىلىمسىز تۇرۇپ غەيرەت كۆرسەتكەن كىشى روناق تاپماس،
ئالدىراڭغۇلۇق بىلەن ئىش قىلغان كىشىنىڭ ئايىغى پۇتلاشماي قالماس.
3 ئادەمنىڭ ئەقىلسىزلىقى ئۇنىڭ يولىنى ئەگرى قىلار،
ئاندىن ئۇ كۆڭلىدە پەرۋەردىگاردىن رەنجىپ قالار.
4 بايلىق دوستنى كۆپەيتەر،
لېكىن كەمبەغەل ئۆز دوستىدىن ئايرىلىپ قالار.
5 يالغان گۇۋاھچى جازاسىز قالماس،
كۆپ يالغان سۆزلىگۈچى قۇتۇلالماس.
6 كۆپ كىشى ئېسىلزادە كىشىگە خۇشامەت قىلار،
ھەممە ئادەم سوۋغات بەرگۈچىنى دوست تۇتار.
7 كەمبەغەلنى قېرىنداشلىرى يامان كۆرەر،
دوستلىرىمۇ ئۇنىڭدىن يىراقلىشار.
ئۇ ئۇلارنى قوغلاپ يالۋۇرسىمۇ،
ئۇلار ئۇنى رەت قىلىدۇ.
8 دانالىق تېپىشقا كۆڭۈل قويغان كىشى ئۆز جېنىنى سۆيەر،
ئەقىل-ئىدراكنى ساقلىغان كىشى سائادەتلىك بولار.
9 يالغان گۇۋاھچى جازاسىز قالماس،
كۆپ يالغان سۆزلىگۈچى ھالاك بولار.
10 ھەشەمەتلىك تۇرمۇش كەچۈرۈش ئەخمەققە ياراشماس،
ئەمىرلەرنىڭ ئۈستىدىن ھۆكۈم سۈرۈش قۇلغا ياراشماس.
11 ئەقىل-ئىدراكلىق ئادەم ئاچچىقىنى باسار،
ئۇ باشقىلارغا كەچۈرۈمچان بولۇپ ئىززەت تاپار.
12 پادىشاھنىڭ غەزىپى شىرنىڭ ھۆركىرىشىدەكتۇر،
ئۇنىڭ ئىلتىپاتى بولسا ئوت-چۆپكە چۈشكەن شەبنەمدەكتۇر.
13 ئەخمەق ئوغۇل ئاتىسى ئۈچۈن بالا-قازادەكتۇر،
جېدەلچى خوتۇن ئۆگزىدىن تېمىپ تۇرغان يامغۇردەكتۇر.
14 ئۆي بىلەن مال-مۈلۈك ئاتا-بوۋىلاردىن قالغان مىراستۇر،
ئەقىل-ئىدراكلىق ئايال پەرۋەردىگارنىڭ ئىلتىپاتىدىندۇر.
15 ھۇرۇنلۇق ئادەمنى غەپلەت ئۇيقۇسىغا سالار،
بىپەرۋا ئادەم ئاچ قالار.
16 ئەمرگە ئەمەل قىلغان كىشى ئۆز جېنىنى ساقلار،
يوللىرىدىن ئاگاھ بولمىغان كىشى ھالاك بولار.
17 كەمبەغەلگە رەھىم قىلغان كىشى،
پەرۋەردىگارغا قەرز بەرگەندەك بولار.
ئۇنىڭ قىلغان ياخشىلىقىنى پەرۋەردىگار قايتۇرار.
18 ئۈمىد تېخى بار چاغدا ئوغلۇڭغا تاياق بەرگىن،
ئۇنىڭ ئۆلۈشىگە سەۋەب بولمىغىن.
19 ئاچچىقى يامان كىشى جازا تارتار.
سەن ئۇنى قۇتقۇزساڭ،
يەنە قايتا-قايتا شۇنداق قىلماق لازىم بولار.
20 نەسىھەتنى ئاڭلىغىن ۋە ئەدەپنى قوبۇل قىلغىن،
شۇنداق قىلساڭ ئاخىرىدا دانا بولىسەن.
21 ئىنسان كۆڭلىدە كۆپ پىكىر قىلار،
لېكىن پەقەت پەرۋەردىگارنىڭ خالىغىنى ئەمەلگە ئاشار.
22 كىشىنىڭ يېقىملىق بولۇشى ئۇنىڭ مېھرىبانلىقىدىندۇر.
كەمبەغەل ئادەم يالغانچىدىن ياخشىدۇر.
23 پەرۋەردىگاردىن قورقۇش كىشىنى ھاياتلىققا ئېلىپ بارار،
ئۇ كىشى توق ياشاپ، بالا-قازادىن ساقلىنار.
24 ھۇرۇن كىشى قولىنى قاچىغا سالغىنى بىلەن،
غىزانى ئاغزىغا سېلىشتىن ئېرىنەر.
25 زاڭلىق قىلغۇچىنى ئۇرساڭ، ساددا كىشى ئىبرەت ئالار،
ئەقىل-پاراسەتلىك كىشىگە نەسىھەت قىلساڭ، ئۇ ئىلىم-ھېكمەتكە ئىگە بولار.
26 ئاتىسىغا يامانلىق قىلغان، ئانىسىنى ئۆيدىن ھەيدەپ چىقارغان ئوغۇل،
ئۇلارغا رەسۋالىق ۋە شەرمەندىلىك كەلتۈرىدىغان ئوغۇلدۇر.
27 ئەي ئوغلۇم، نەسىھەت ئاڭلاشنى خالىمىساڭ،
ئىلىم-ھېكمەتتىن يىراقلىشىپ كېتىسەن.
28 يارىماس گۇۋاھچى ئادالەتنى مەسخىرە قىلار،
يامانلارنىڭ ئاغزى رەزىللىكنى يۇتۇۋالار.
29 مەسخىرە قىلغۇچىلار ئۈچۈن جازا تەيياردۇر،
ئەخمەقلەرنىڭ دۈمبىسىگە تاياق تەيياردۇر.