20
1 شاراب مەسخىرە قىلغۇچى، ھاراق غوۋغا-جېدەلچىدۇر. شۇلارغا بېرىلىپ ئازغان كىشى ئەقىلسىزدۇر.
2 پادىشاھنىڭ غەزىپى بىر شىرنىڭ ھۆركىرىشىگە ئوخشار،
ئۇنىڭ ئاچچىقىنى كەلتۈرگەن كىشى ئۆز جېنىغا يامانلىق كەلتۈرەر.
3 جېدەلدىن نېرى تۇرغان كىشى ئۆزىگە ئىززەت كەلتۈرەر،
لېكىن ھەربىر ئەخمەق جېدەل قىلىشقا تەييار تۇرار.
4 ھۇرۇن كىشى كۈز ۋاقتىدا قوش ھەيدىمەس،
ئورما ۋاقتىدا ھوسۇل ئىزدەپ ھېچنېمە تاپالماس.
5 ئىنساننىڭ كۆڭلىدىكى ئوي-پىكىر چوڭقۇر سۇلاردەكتۇر،
لېكىن ئەقىل-پاراسەتلىك كىشى ئۇلارنى چىقىرالايدۇ.
6 كۆپچىلىك ئۆزىنى سادىق دەپ ماختار،
لېكىن ئىشەنچلىك كىشىنى كىم تاپالار؟
7 ھەققانىي ئادەم ئۆز يولىدا توغرا ماڭار،
ئۇنىڭ ئەۋلادى بەخت-سائادەتلىك بولار.
8 پادىشاھ ئادالەت تەختىدە ئولتۇرۇپ ھۆكۈم چىقىرار،
كۆزلىرى بىلەن ھەممە يامانلىقنى سۈرۈۋېتەر.
9 «كۆڭلۈمنى پاك قىلدىم،
گۇناھلىرىمدىن ئايرىلدىم» دەپ كىم دېيەلەر؟
10 ئىككى خىل تارازا تېشى ياكى ئىككى خىل تارازا ئىشلىتىش،
ئىككىلىسى پەرۋەردىگارغا يىرگىنچلىكتۇر. ■
11 بىر بالىنىڭ ئىشى پاك ۋە توغرا ياكى ئۇنداق ئەمەسلىكى
ئۇنىڭ ھەرىكەتلىرىدىن بىلىنەر.
12 ئاڭلايدىغان قۇلاقنى، كۆرىدىغان كۆزنى،
پەرۋەردىگار ياراتتى ھەر ئىككىسىنى.
13 كەمبەغەل بولماسلىقىڭ ئۈچۈن
ئۇيقۇغا ئامراق بولمىغىن.
كۆزلىرىڭنى ئوچۇق تۇتقىن،
شۇندا تويغۇدەك نان يەيسەن.
14 خېرىدار «ناچار ئىكەن، ناچار ئىكەن» دەپ قويار،
لېكىن ئېلىپ كەتكەندىن كېيىن سودىسىدىن ماختىنار.
15 ئالتۇن ۋە مەرۋايىت كۆپتۇر،
لېكىن ئىلىم-ھېكمەت بىلەن سۆزلەيدىغان لەۋلەر
كەم تېپىلىدىغان گۆھەردۇر.
16 ياتقا كېپىل بولغان كىشىدىن تونىنى ئېلىۋېلىڭلار،
يات ئايالغا كېپىل بولغىنى ئۈچۈن ئۇنى كېپىللىككە ئېلىڭلار.
17 ئالداپ تاپقان نان ئىنسانغا تاتلىق تېتار،
كېيىن ئۇنىڭ ئاغزى شېغىلغا تولار.
18 مەسلىھەت بىلەن قىلغان ئىش ياخشى بولار،
بۇنىڭ ئۈچۈن ياخشى مەسلىھەت بىلەن جەڭ قىلىڭلار.
19 گەپ توشۇغۇچى سىرنى ئاشكارىلار،
شۇڭا ئاغزىنى ياپمىغان كىشىلەر بىلەن ئارىلاشماڭلار.
20 كىمكى ئاتا-ئانىسىنى قارغىسا،
ئۇنىڭ چىرىغى قاپقاراڭغۇلۇقتا ئۆچۈرۈلەر.
21 ئالدىراپ ئېلىۋالغان مىراس،
ئاخىرىدا بەرىكەتلىك بولماس.
22 «يامانلىققا يامانلىق قايتۇرىمەن» دېمىگىن،
پەرۋەردىگارغا ئۈمىد باغلىغىن، ئۇ سېنى قۇتقۇزار.
23 ئىككى خىل تارازا تېشى پەرۋەردىگارغا يىرگىنچلىكتۇر،
يالغان تارازا بىلەن ئۆلچەش ياماندۇر. ■
24 ئادەمنىڭ يۈرۈش-تۇرۇشى پەرۋەردىگار تەرىپىدىندۇر،
ئىنسان ئۆز يولىنى قانداقمۇ بىلەلىسۇن؟
25 ئالدىراپ «خۇداغا ئاتالغان» دەپ ۋەدە بېرىپ، كېيىن ئويلاش،
ئادەمگە قىلتاق بولار.
26 دانا پادىشاھ يامانلارنى سورۇۋېتەر،
ئۇلارنىڭ ئۈستىگە خامان چاقلىرىنى سۆرىۋېتەر.
27 ئىنساننىڭ روھى پەرۋەردىگارنىڭ چىرىغىدۇر،
ئۇ ئۇنىڭ يۈرىكىنىڭ تەگلىرىنى تەكشۈرۈپ كۆرىدۇ.
28 مېھىر-شەپكەت ۋە ھەقىقەت پادىشاھنى ساقلار،
مېھىر-شەپقەت بىلەن ئۇنىڭ تەختى مۇستەھكەم بولار.
29 ياشلارنىڭ ئىززىتى ئۇلارنىڭ كۈچىدۇر،
قېرىلارنىڭ زىننىتى ئۇلارنىڭ ئاق چاچلىرىدۇر.
30 قامچىنىڭ ئىزلىرى يامانلىقنى چىقىرار،
تاياق ئىچ كۆڭۈلنى پاك قىلار.