22
1 ياخشى نام چوڭ بايلىقتىن ئەۋزەلدۇر، ئىلتىپاتقا ئېرىشىش ئالتۇن-كۈمۈشتىن ئوبداندۇر.
2 باي بىلەن كەمبەغەل بىر-بىرى بىلەن ئۇچرىشار،
ھەر ئىككىلىسىنى ياراتقان پەرۋەردىگاردۇر.
3 پەملىك كىشى خەتەرنى كۆرۈپ يوشۇرۇنۇۋالار،
لېكىن نادانلار كېتىۋېرىپ زىيان-زەخمەت تارتار.
4 كەمتەرلىك بىلەن پەرۋەردىگاردىن قورقۇش
دۆلەت، ئىززەت ۋە ھاياتلىققا ئېرىشتۈرەر.
5 تىكەنلەر ۋە تۇزاقلار ھىيلىگەرنىڭ يولىدا ياتار،
ئۆز جېنىنى قەدىرلەپ ساقلىغان كىشى ئۇلاردىن يىراق تۇرار.
6 باشتىلا بالىغا توغرا يولدا مېڭىشنى ئۆگەتسەڭ،
ئۇ قېرى بولغاندىمۇ شۇ يولدىن چىقماس.
7 باي كەمبەغەلنىڭ ئۈستىدىن ھۆكۈمرانلىق قىلار،
قەرز ئالغۇچى بەرگۈچىنىڭ قۇلى بولار.
8 يامانلىق تېرىغان ھالاكەت ئورار،
ئۇنىڭ غەزەپ تايىقى يوق بولار.
9 مېھرىبان كىشى بەرىكەت تاپار،
چۈنكى ئۇ ئۆز نېنىدىن نامراتلارغا بېرەر.
10 مەسخىرە قىلغۇچىنى قوغلىۋېتىڭلار،
شۇنىڭ بىلەن ئۇرۇش-جېدەل ۋە ھاقارەت توختىتىلار.
11 قەلبىنىڭ پاكلىقىنى سۆيگەن،
ۋە لەۋلىرىدىن مېھرىبان سۆزلەر چىققان كىشى
پادىشاھقا دوست بولار.
12 پەرۋەردىگارنىڭ كۆزلىرى ئىلىم-ھېكمەتنى قوغدار،
خىيانەت قىلغۇچىلارنىڭ سۆزلىرىنى ئۇ يوققا چىقىرار.
13 ھۇرۇن كىشى مۇنداق دەيدۇ:
«تاشقىرىدا شىر بار. كوچىغا چىقسام ئۆلتۈرۈلىمەن».
14 بۇزۇق خوتۇننىڭ ئاغزى بىر چوڭقۇر ئورىدەكتۇر.
پەرۋەردىگارنىڭ غەزىپىنى كەلتۈرگەن كىشى ئۇنىڭغا چۈشىدۇ.
15 ئەخمەقلىق بالىنىڭ كۆڭلىگە چاپلاشقان بولسىمۇ،
تەربىيە تايىقى ئۇنى بۇنىڭدىن نېرى قىلار.
16 ئۆز پايدىسى ئۈچۈن بىچارىنى ئەزگۈچى
ۋە بايغا سوۋغات بەرگۈچى،
ئىككىلىسى گاداي بولۇپ قالار.
دانالارنىڭ ھېكمەتلىرى
17 قۇلاقلىرىڭنى ئېچىپ، دانالارنىڭ سۆزلىرىنى ئاڭلىغىن،
ئىلىم-ھېكمىتىمگە كۆڭۈل قويغىن.
18 چۈنكى ئۇلارنى قەلبىڭدە ساقلاپ،
لەۋلىرىڭدە تەييار تۇتساڭ،
ساڭا ياخشى بولار.
19 پەرۋەردىگارغا تايىنىشىڭ ئۈچۈن،
بۈگۈن بۇلارنى ساڭا ئۆگىتىمەن.
20 نەسىھەت ۋە بىلىمگە تولغان ئەسىل ھېكمەتلىك سۆزلەر
ساڭا يېزىپ بەرمىدىممۇ؟
21 ساڭا ھەقىقەتنىڭ سۆزلىرىنىڭ ئىشەنچلىك ئىكەنلىكىنى ئۆگىتىپ،
ئۆزۈڭنى ئەۋەتكۈچىگە توغرا جاۋاب بېرەلىشىڭ ئۈچۈن بۇنى يازدىم.
22 بىچارىنى بىچارە بولغىنى ئۈچۈن ئەزمىگىن
ۋە كەمبەغەلنى دەرۋازىدا دەسسىمىگىن.
23 چۈنكى پەرۋەردىگار ئۇلارنىڭ دەۋاسىنى سورار،
ئۇلارنى بۇلىۋالغانلارنىڭ جېنىنى ئالار.
24 تېرىككەك ئادەم بىلەن دوست بولمىغىن،
ئاسان ئاچچىقلىنىدىغان كىشى بىلەن ئارىلاشمىغىن.
25 بولمىسا ئۇلارنىڭ يوللىرىنى ئۆگىنىپ،
ئۆز جېنىڭغا قىلتاق سالىسەن.
26 بولمىغىن نە قوللاشقۇچىلارنىڭ بىرى،
نە قەرز ئۈچۈن كېپىل بولغانلارنىڭ بىرى.
27 ئەگەر قەرزنى قايتۇرغۇدەك سەندە بىر نەرسە بولمىسا،
ئۇلار ياتقان ئورنۇڭنى ئاستىڭدىن تارتىۋالىدۇ.
28 بۇرۇن ئاتا-بوۋىلىرىڭ بېكىتكەن پاسىل تاشلىرىنى يۆتكىمىگىن.
29 ئۆز ئىشىغا ماھىر كىشىنى كۆردۈڭمۇ؟
ئۇ پادىشاھلارنىڭ خىزمىتىدە بولار،
ئاددىي خەلقنىڭ خىزمىتىنى قىلماس.