23
1 ئەمىر بىلەن داستىخاندا ئولتۇرساڭ، ئالدىڭدا كىم ئولتۇرغىنىنى ئېسىڭدا ساقلىغىن.
2 نەپسىڭ يامان بولسا،
گېلىڭغا بىر پىچاقنى قويغىن.
3 ئۇنىڭ لەززەتلىك تاماقلىرىنى ئارزۇ قىلمىغىن،
ئۇلار ئالدامچى تاماقلاردۇر.
4 باي بولىمەن دەپ مۇشەققەت تارتمىغىن،
بۇنداق ئويلىرىڭنى تاشلىغىن.
5 بايلىققا كۆز تىكسەڭ، ئۇ يوق بولار.
ئۇ ئۆزىگە قانات ياساپ، بۈركۈتتەك ئاسمانغا ئۇچۇپ كېتەر.
6 قىزغانچۇق ئادەمنىڭ نېنىنى يېمىگىن،
ئۇنىڭ لەززەتلىك تاماقلىرىنى ئارزۇ قىلمىغىن.
7 چۈنكى ئۇنىڭ كۆڭلى قىزغانچۇق بولغاندەك،
ئەمەللىرىمۇ شۇنداق بولار.
ئۇ ساڭا: «يەپ-ئىچكىن» دېسىمۇ،
كۆڭلىنى سېنىڭدىن يىراق تۇتار.
8 يېگەن تامىقىڭنى قۇسۇۋېتىسەن،
ئېيتقان شېرىن سۆزلىرىڭ بىكار بولار.
9 ئەخمەقنىڭ قۇلىقىغا سۆزلىمىگىن،
چۈنكى ئۇ ئەقىلانە سۆزلىرىڭنى كۆزگە ئىلماس.
10 قەدىمدە بېكىتىلگەن پاسىل تاشلىرىنى يۆتكەپ،
يېتىملارنىڭ ئېتىزلىرىغا كىرىۋالمىغىن.
11 چۈنكى ئۇلارنىڭ قۇتۇلدۇرغۇچىسى كۈچلۈكتۇر،
ئۇ ئۇلارنىڭ تەرىپىنى ئېلىپ ئۈستۈڭدىن دەۋا قىلىدۇ.
12 نەسىھەتكە كۆڭۈل قويغىن،
ھېكمەتلىك سۆزلەرگە قۇلاق سالغىن.
13 بالىدىن تەربىيە تايىقىنى ئايىمىغىن،
چۈنكى ئۇنى تاياق بىلەن ئۇرساڭ، ئۇ ئۆلۈپ قالماس.
14 سەن ئۇنى تاياق بىلەن ئۇرساڭ،
ئۇنىڭ جېنىنى دوزاختىن قۇتقۇزۇۋالىسەن.
15 ئەي ئوغلۇم، سېنىڭ كۆڭلۈڭ دانا بولسا،
مېنىڭ كۆڭلۈم خۇش بولار.
16 سېنىڭ لەۋلىرىڭ توغرا سۆزلىسە،
مېنىڭ ئىچىم شادلىنار.
17 كۆڭلۈڭدە گۇناھكارلارغا ھەسەت قىلمىغىن،
لېكىن ھەمىشە پەرۋەردىگاردىن قورقۇپ تۇرغىن.
18 شۇنداق قىلساڭ، ئىستىقبالىڭ بار،
ئارزۇ-ئۈمىدىڭ ئۈزۈلۈپ قالماس.
19 ئەي ئوغلۇم، سۆزۈمگە قۇلاق سېلىپ دانا بولغىن،
كۆڭلۈڭنى توغرا يولغا باشلىغىن.
20 شارابخورلارغا قوشۇلمىغىن،
گۆشخورلار بىلەن ئارىلاشمىغىن.
21 چۈنكى شارابخور ۋە گۆشخورلار كەمبەغەل بولۇپ قالار،
غەپلەت ئۇيقۇسى ئۇلارغا يىرتىق چاپان كىيدۈرەر.
22 سېنى تاپقان ئاتاڭنىڭ سۆزىنى ئاڭلىغىن،
ئاناڭ قېرىغاندا ئۇنى كەمسىتمىگىن.
23 ھەقىقەتنى سېتىۋالغىن، ئۇنى ھەرگىز ساتمىغىن،
ھېكمەت، ئەدەپ ۋە ئەقىل-پاراسەتنىمۇ ئىزدىگىن.
24 ھەققانىينىڭ ئاتىسى زور خۇشاللىق تاپار،
دانانىڭ ئاتىسى ئۇنىڭدىن شادلىنار.
25 ئاتا-ئاناڭنىڭ كۆڭلى خۇش قىلغىن،
تۇغقان ئاناڭنى شادلاندۇرغىن.
26 ئەي ئوغلۇم، ماڭا كۆڭلۈڭنى بەرگىن،
مېنىڭ يوللىرىمغا كۆزلىرىڭ تىكىلىپ تۇرسۇن.
27 چۈنكى پاھىشە ئايال چوڭقۇر ئورىدەكتۇر،
يات ئايال تار قۇدۇقتەكتۇر.
28 ئۇ بىر بۇلاڭچىدەك مۆكۈنۈپ تۇرار،
ئادەملەرنىڭ ئارىسىدا ۋاپاسىزلارنىڭ سانىنى ئاشۇرار.
29 كىم ئازابتا؟ كىم غەمدە؟
كىم جېدەل ئىچىدە؟
كىم نالە قىلار؟ كىم بىكار زەخىملىنار؟
كىمنىڭ كۆزلىرى قىزىرىپ كېتەر؟
30 ئۇزۇن ۋاقىتقىچە شاراب ئىچىپ ئولتۇرغانلار،
ئىلەشتۈرگەن شەرەبنى ئىزدەپ يۈرگەنلەر!
31 قارىمىغىن شارابنىڭ قىزىللىقىغا،
قەدەھتە يالتىراپ تۇرۇشىغا،
گېلىڭدىن سىلىق ئۆتۈشىگە.
32 ئاخىرى ئۇ يىلاندەك سېنى چېقىۋالار،
ساڭا زەھەرلىك نەشتىرىنى سانجار.
33 كۆزلىرىڭگە غەلىتە نەرسىلەر كۆرۈنەر،
كۆڭلۈڭدىن ناتوغرا سۆزلەر چىقار.
34 دېڭىزنىڭ ئوتتۇرىسىدا ياتقاندەك،
كېمىنىڭ موما ياغىچى ئۈستىدە ئۇخلاۋاتقاندەك بولىسەن.
35 «ئۇلار مېنى ئۇردى، لېكىن ئاغرىمىدى،
مېنى دۇمبىلىدى، لېكىن تۇيمىدىم.
ئويغىنىپ، ئەس-ھوشۇمغا كېلىپ،
يەنە ئۇنى ئىزدىسەم» دەيسەن.