24
1 يامان ئادەملەرگە ھەسەت قىلمىغىن، ئۇلار بىلەن ئارىلاشمىغىن.
2 چۈنكى ئۇلارنىڭ كۆڭۈللىرى زۇلۇم قىلىشنى ئويلار،
لەۋلىرى يامانلىقنى سۆزلەر.
3 ھېكمەت بىلەن ئۆي سېلىنار،
ئەقىل-پاراسەت بىلەن ئۆي ساقلىنار.
4 ئىلىم-ھېكمەت ئۆينىڭ خانىلىرىنى تولدۇرار
ئۇلارنى ھەر خىل قىممەتلىك ئېسىل ماللار بىلەن توشتۇرار.
5 دانا كىشى كۈچلۈك بولار،
بىلىملىك كىشى قۇدرەت تاپار.
6 ياخشى مەسلىھەت بىلەن جەڭ قىلالايسەن،
ياخشى مەسلىھەتچىلەر كۆپ بولسا نۇسرەت تاپىسەن.
7 ئەخمەق كىشىگە ھېكمەت يىراقتۇر،
دەرۋازىنىڭ ئالدىدا ئۇ ئاغزىنى ئاچالماس.
8 يامانلىقنى قەستلەپ يۈرىدىغان كىشى
سۇيىقەستچى دەپ ئاتىلار.
9 ھاماقەتلىكتىن بولغان نىيەت گۇناھتۇر،
مەسخىرە قىلغۇچى ئادەملەرگە يىرگىنچلىكتۇر.
10 ئەگەر سەن ئېغىر كۈندە بوشىشىپ كەتسەڭ،
كۈچسىز بولۇپ قالىسەن.
11 ئۆلۈمگە سۆرەلگەنلەرنى قۇتقۇزۇۋالغىن،
ئۆلتۈرۈلۈش ئالدىدا تۇرغانلارنى قۇتۇلدۇرغىن.
12 «بۇنى بىلمىدۇق» دېسەڭ،
كۆڭۈللەرنى تەكشۈرگۈچى بۇنى كۆرمەسمۇ؟
جېنىڭغا قارىغۇچى بۇنى بىلمەسمۇ؟
ئۇ ھەركىمنىڭ ئەمەلىگە قاراپ، ياندۇرماسمۇ؟
13 ئەي ئوغلۇم، ھەسەل يېگىن، ئۇ ياخشىدۇر،
ھەرە كۆنىكىدىن ئاققان ھەسەل گېلىڭگە شېرىندۇر.
14 ھېكمەتنى جېنىڭ ئۈچۈن ھەسەلدەك قەدىرلىگىن،
ئۇنى تاپساڭ، سائادەتلىك بولىسەن ۋە ئۈمىدىڭ ئۈزۈلمەس.
15 ئەي يامانلىق قىلغۇچى، ھەققانىينىڭ ماكانىنى ماراپ،
ئۇنىڭ ئۆيىنى ۋەيران قىلمىغىن.
16 چۈنكى ھەققانىي كىشى يەتتە قېتىم يىقىلسىمۇ، يەنە قوپار،
لېكىن يامانلار بالاغا چۈشۈپ يىقىلىپ قالار.
17 دۈشمىنىڭ يىقىلسا، خۇشال بولمىغىن،
ئۇ پۇتلاشسا، شادلانمىغىن.
18 بولمىسا پەرۋەردىگار بۇنى كۆرۈپ خاپا بولار
ۋە دۈشمىنىڭدىن غەزىپىنى توختىتار.
19 رەزىللەردىن قىزغانمىغىن،
يامانلارغا ھەسەت قىلمىغىن.
20 چۈنكى رەزىللەرنىڭ ئىستىقبالى يوقتۇر،
يامانلارنىڭ چىرىغى ئۆچۈرۈلەر.
21 ئەي ئوغلۇم، پەرۋەردىگار ۋە پادىشاھتىن قورققىن،
توپىلاڭخورلار بىلەن ئارىلاشمىغىن.
22 چۈنكى ئۇلارغا تۇيۇقسىز بالايىئاپەت كېلەر،
ئۇلارنىڭ يىللىرىنىڭ ئاخىرى قانداق بولىدىغىنىنى كىم بىلەر؟
23 بۇلارمۇ دانالارنىڭ سۆزلىرىدۇر:
ھۆكۈم چىقارغاندا بىرىگە يان بېسىش ناتوغرىدۇر.
24 كىمكى گۇناھكارغا: «سەن ئادىلسەن» دېسە،
خەلق ئۇنىڭغا لەنەت ئوقۇيدۇ،
ئەللەر ئۇنىڭدىن نەپرەتلىنىدۇ.
25 لېكىن ئۇلارنى ئاشكىرىلىغانلار ياخشى كۆرۈنىدۇ،
ئۇلارغا چوڭ بەرىكەت بېرىلىدۇ.
26 دۇرۇس جاۋاب بەرگۈچى
گوياكى كىشىنىڭ لەۋلىرىگە سۆيگۈچىدۇر.
27 سىرتتىكى ئىشلىرىڭنى تەييارلاپ،
ئېتىزلىقتىكى ئىشلىرىڭنى تۈگەتكەندىن كېيىن،
ئۆز ئۆيۈڭنى ياسىغىن.
28 قوشناڭغا قارشى سەۋەبسىز گۇۋاھلىق قىلمىغىن،
لەۋلىرىڭ بىلەن ئالدىمىغىن.
29 «ئۇ ماڭا قىلغاندەك ئۇنىڭغا قىلىمەن،
ئۇنىڭ ئەمەلىگە يارىشا ياندۇرىمەن» دېمىگىن.
30 مەن ھۇرۇن ئادەمنىڭ ئېتىزلىقىدىن
ئەقىلسىز كىشىنىڭ ئۈزۈمزارلىقىدىن ئۆتكىنىمدە،
31 مانا، ئۇلارنىڭ ھەممە يەرلىرى تىكەنلەر بىلەن بېسىلىپ كەتكەنىدى،
چاققاق بىلەن قاپلانغانىدى،
ئۇنىڭ تاش تاملىرى ئۆرۈلۈپ كەتكەنىدى.
32 مەن شۇنى كۆرۈپ ئويلىنىپ قالدىم،
ئۇنىڭغا نەزەر سېلىپ ساۋاق ئالدىم.
33 تېخى ئازغىنە ئۇخلاپ، كىچىككىنا مۈگدەپ،
ئازراق ئارام ئېلىش ئۈچۈن قول قوشتۇرۇپ ياتساڭ،
34 نامراتلىق بىر بۇلاڭچىدەك ئۈستۈڭگە كېلەر،
موھتاجلىق بىر قاراقچىدەك سېنى باسار.