26
1 يازدا قار، ئورما ۋاقتىدا يامغۇر قاملاشمىغاندەك، ئەخمەققە ئىززەت قاملاشماس.
2 قۇشقاچ ئۇچۇپ كەتكەندەك،
قارلىغاچ ئۇچۇپ يۈرگەندەك،
سەۋەبسىز قارغىشمۇ كىشىگە تەگمەس.
3 ئاتقا قامچا، ئېشەككە يۈگەن ياراشقاندەك،
ئەخمەقلەرنىڭ دۈمبىسىگە تاياق يارىشار.
4 ئەخمەقنىڭ ئەخمىقانە گېپىگە جاۋاب بەرمىگىن،
بولمىسا ئۇنىڭغا ئوخشاپ قالىسەن.
5 ئەخمەقنىڭ ئەخمەقانە گېپىگە جاۋاب بەرگىن،
بولمىسا ئۇ ئۆزىنى ئەقىللىق دەپ سانار.
6 كىمكى ئەخمەق ئارقىلىق خەۋەر ئەۋەتسە،
ئۆز پۇتلىرىنى كەسكەندەك،
زەھەر ئىچكەندەك بولار.
7 توكۇرنىڭ پۇتلىرى كارغا كەلمىگەندەك،
ئەخمەقنىڭ ئاغزىدىكى ماقال-تەمسىللەر كارغا كەلمەس.
8 ئەخمەققە ئىززەت-ھۆرمەت بىلدۈرۈش،
تاشنى سالغىغا باغلاپ قويغاندەك بولار.
9 ئەخمەقلەرنىڭ ئاغزىدىن چىققان ماقال-تەمسىل،
مەستنىڭ قولىغا سانجىلغان تىكەندەك بولار.
10 ئەخمەقنى ياكى ئۆتۈپ كېتىۋاتقاننى ياللىغان كىشى
ئوقنى قارىغۇلارچە ئاتقان ئوقياچىدەكتۇر.
11 ئىت ئۆز قۇسۇقىنى يەنە يېگەندەك،
ئەخمەق ئۆز ئەخمەقلىقىنى يەنە قىلار.
12 كۆردۈڭمۇ ئۆزىنى دانا سانىغان كىشىنى؟
ئۇنىڭغا ئۈمىد باغلىغاندىن
ئەخمەققە ئۈمىد باغلىغان ياخشى.
13 ھۇرۇن كىشى: «مانا، يولدا شىر بار،
كوچىلاردا يولۋاس بار» دەپ قويار.
14 ئىشىك ئۆز مۇجۇقىدا چۆرۈلگەندەك،
ھۇرۇن ئادەم ئۆز ئورنىدا ئېغىنىپ ياتار.
15 ھۇرۇن ئادەم قولىنى تەخسىگە سالار،
لېكىن ئاغزىغا كۆتۈرۈشكە ئېرىنەر.
16 ھۇرۇن كىشى ئۆزىنى داناراق سانار
ئەقىللىق جاۋاب بېرەلەيدىغان يەتتە كىشىدىن.
17 كېتىپ بېرىپ باشقىنىڭ جېدىلىگە ئارىلاشقان كىشى،
بىر ئىتنىڭ قۇلىقىنى تۇتقان كىشىگە ئوخشار.
18 چاقچاقنى باھانە قىلىپ ئۆز قوشنىسىنى ئالدىغان كىشى،
19 چۆرىسىگە ئوتلۇق ۋە ئەجەللىك ئوقلارنى ئېتىپ تۇرغان بىر ساراڭغا ئوخشار.
20 ئوتۇن بولمىسا، ئوت ئۆچەر،
گەپ توشۇغۇچى بولمىسا، جېدەل تۈگەر.
21 كۆمۈردىن چوغ، ئوتۇندىن ئوت پەيدا بولغاندەك،
بىر جېدەلچىدىن جېدەل پەيدا بولار.
22 چېقىمچىنىڭ سۆزى بىر تاتلىق لوقمىدەك
كۆڭۈلنىڭ ئىچىگە سىڭىپ كېتەر.
23 يامان كۆڭۈللۈك كىشىنىڭ ئوتلۇق لەۋلىرى
ساپال قاچىنى قاپلىغان كۈمۈشنىڭ داشقىلىغا ئوخشار.
24 ئاداۋەت ساقلايدىغان كىشىنىڭ گېپى سىلىق بولسىمۇ،
ئۇ كۆڭلىدە ھىيلە ساقلايدۇ.
25 ئۇ مۇلايىم گەپ قىلسىمۇ، ئۇنىڭغا ئىشەنمىگىن،
چۈنكى ئۇنىڭ كۆڭلىدە يەتتە قات ھاراملىق باردۇر.
26 ئۇ ئاداۋەتنى يوشۇرۇش ئۈچۈن ھىيلە ئىشلەتسىمۇ،
ئۇنىڭ يامانلىقى جامائەتتە ئاشكارا بولار.
27 بىر ئورا كولىغان كىشى ئۆزى ئۇنىڭغا چۈشەر،
تاش ئۇنى دومىلاتقان كىشىگە قايتىپ چۈشەر.
28 يالغانچى تىل ئۆزى زىيان كەلتۈرگەن كىشىلەرنى ئۆچ كۆرەر،
ياغلىما ئېغىز ھالاكەتكە سەۋەب بولار.