27
1 ئەتىكى كۈن ئۈچۈن ماختانمىغىن، چۈنكى ئۇ كۈننىڭ نېمە ئېلىپ كېلىشىنى بىلمەيسەن.
2 ئۆز ئاغزىڭ ئەمەس، باشقا كىشى سېنى ماختىسۇن،
ئۆز لەۋلىرىڭ ئەمەس، ياتلار سېنى ماختىسۇن.
3 تاش ئېغىر، قۇممۇ ئېغىر،
لېكىن ئەخمەقنىڭ ئاچچىقى بۇ ئىككىسىدىن ئېغىردۇر.
4 غەزەپ رەھىمسىزدۇر، قەھر كەلكۈندەكتۇر،
لېكىن ھەسەت ئالدىدا كىممۇ تۇرالار؟
5 يوشۇرۇن مۇھەببەتتىن،
ئوچۇق تەنقىد ياخشىدۇر.
6 دوستنىڭ قولىدىن يېگەن زەخىملەر ۋاپادارلىقتىندۇر،
لېكىن دۈشمەننىڭ سۆيۈشلىرى يالغاندۇر.
7 توق كىشى ھەرە كۆنىكىدىن ئاققان ھەسەلنىمۇ رەت قىلار،
لېكىن ئاچ كىشىگە ئاچچىق نەرسىلەرمۇ تاتلىق بولار.
8 ئۆز ماكانىدىن ئايرىلىپ كەتكەن كىشى،
ئۇۋىسىدىن ئايرىلىپ كەتكەن قۇشقا ئوخشار.
9 خۇشبۇي ماي ۋە ئەتىردىن كۆڭۈل خۇش بولغاندەك،
دوستنىڭ چىن كۆڭلىدىن بەرگەن سەمىمىي مەسلىھەتىدىن
كۆڭۈل خۇش بولار.
10 دوستۇڭنى ۋە ئاتاڭنىڭ دوستىنى تاشلىمىغىن.
مۇسىبەت كۈنۈڭدە قېرىندىشىڭنىڭ ئۆيىگە بارمىغىن.
يېقىندىكى قوشنا، نېرى تۇرغان قېرىنداشتىن ياخشىدۇر.
11 ئەي ئوغلۇم، دانا بولساڭ، كۆڭلۈمنى خۇش قىلىسەن.
شۇندا مېنى ئەيىبلىگەنلەرگە جاۋاب قايتۇرالايمەن.
12 زېرەك كىشى خەتەرنى كۆرۈپ يوشۇرۇنۇۋالار،
نادان كىشى مېڭىۋېرىپ زىيان-زەخمەت تارتار.
13 ياتقا كېپىل بولغان كىشىدىن تونىنى ئېلىۋېلىڭلار،
يات ئايالغا كېپىل بولغىنى ئۈچۈن ئۇنى كېپىللىككە ئېلىڭلار.
14 بىر كىشى سەھەر تۇرۇپ دوستىغا ئۈنلۈك ئاۋازدا بەخت تىلىسە،
شۇنىڭ ئۆزى دوستىغا قارغىشتەك ئاڭلىنار.
15 يامغۇر كۈنىدە ئۆگزىدىن تېمىپ تۇرغان تامچە
ۋە ئۇرۇشقاق خوتۇن بىر-بىرىگە ئوخشار.
16 ئۇنى توسۇشنى خالىغان كىشى شامالنى توسقاندەك،
ئوڭ قولى بىلەن ياغنى توختاتقاندەك بولار.
17 تۆمۈر تۆمۈرنى بىلەپ ئۆتكۈرلەشتۈرەر،
دوستلار بىر-بىرىنى ئۆتكۈرلەشتۈرەر.
18 ئەنجۈر دەرىخىنى پەرۋىش قىلغان كىشى ئۇنىڭ مېۋىسىنى يەر،
ئۆز خوجايىنىغا ياخشى خىزمەت قىلغان كىشى ئىززەتكە ئېرىشەر.
19 سۇدا ئادەمنىڭ يۈزىنىڭ ئەكسى كۆرۈنگەندەك،
ئىنساننىڭ كۆڭلىدە ئىنسان ئۆزىنىڭ ئەكسى كۆرۈنەر.
20 گۆر ۋە ئۆلۈكلەر دىيارى تويمىغاندەك،
ئادەمنىڭ كۆزلىرى تويماس.
21 كۈمۈش ساپال قازاندا، ئالتۇن خۇمداندا تاۋلىنار،
ئادەم شۆھرەت تاپقىنىدا سىنىلار.
22 ئەگەر سەن ئەخمەقنى ھاۋانچىغا سېلىپ،
بۇغداي بىلەن بىرگە سوقساڭمۇ،
ئەخمەقلىقى ئۇنىڭدىن ھەرگىز كەتمەس.
23 سەن ئۆز قويلىرىڭدىن ئوبدان خەۋەر ئېلىپ،
پادىلىرىڭغا كۆڭۈل قويۇپ قارىغىن.
24 چۈنكى دۆلەت ھەمىشە تۇرمايدۇ.
بىر تاجمۇ نەسىلدىن نەسىلگە قالامدۇ؟
25 قۇرۇق ئوتلار ئورۇلغاندىن كېيىن يۇمران ئوت-چۆپ ئۈنۈپ چىققاندا
ۋە تاغلاردىكى ياۋا ئوتلار يىغىلىپ بولغاندا،
26 قوزىلار كىيىمىڭ ئۈچۈن بولار،
تېكىلەر زېمىن سېتىپ ئېلىشىڭ ئۈچۈن يارار
27 ۋە ئۆچكىلەرنىڭ سۈتى ئۆزۈڭ، ئائىلەڭ
ۋە دېدەكلىرىڭنىڭ تىرىكچىلىكى ئۈچۈن يېتەر.