28
1 يامانلار ھېچكىم قوغلىمىسىمۇ قاچار، ئەمما ھەققانىيلار شىردەك باتۇر بولار.
2 يۇرتتا گۇناھ كۆپەيسە، ئۇنىڭ ھۆكۈمدارلىرى كۆپ بولار،
لېكىن ئەقىل-پاراسەتلىك ۋە بىلىملىك ھۆكۈمدار بولسا،
نىزام مۇقىم تۇرار.
3 بىچارىلەرگە زۇلۇم قىلغان بىر كەمبەغەل،
ئاشلىقنى ئېقىتىپ كېتىدىغان يامغۇرغا ئوخشار.
4 تەۋرات قانۇنىدىن چەتنىگەنلەر يامانلارنى ياخشى دەپ ماختار،
ئەمما تەۋرات قانۇنىغا ئەمەل قىلغانلار ئۇلارغا قارشى كۈرىشەر. ■
5 رەزىللەر ئادالەتنى چۈشەنمەس،
لېكىن پەرۋەردىگارنى ئىزدىگەنلەر ھەممىنى چۈشىنەر.
6 توغرا يولدا ماڭغان كەمبەغەل كىشى،
ئەگرى يولدا ماڭغان بايدىن ياخشى.
7 دانا ئوغۇل تەۋرات قانۇنىغا ئەمەل قىلار،
ئىسراپ قىلغۇچىلارغا ھەمراھ بولغان ئوغۇل ئاتىسىنى شەرمەندە قىلار.
8 ئۆسۈم ۋە جازانىخورلۇق بىلەن بايلىقلىرىنى كۆپەيتكەن كىشى
بۇلارنى بىچارىلەرگە رەھىم قىلغۇچى ئۈچۈن يىغقان بولىدۇ.
9 كىمكى تەۋرات قانۇنىنى ئاڭلىمايمەن دەپ قۇلىقىنى يېپىۋالسا،
ھەتتا ئۇنىڭ دۇئاسىمۇ يىرگىنچلىك بولار.
10 كىمكى دۇرۇسلارنى يامان يولغا باشلىسا،
ئۆز كولىغان ئورىسىغا ئۆزى چۈشەر،
لېكىن كامىل بولغانلار ياخشىلىققا مىراسخور بولار.
11 باي كىشى ئۆزىنى دانا سانار،
لېكىن ئەقىل-پاراسەتلىك كەمبەغەل ئۇنىڭ قانداقلىقىنى بىلەر.
12 ھەققانىيلار نۇسرەت تاپسا، چوڭ تەنتەنە بولار،
لېكىن يامانلار غەلىبە قازانسا، ئادەملەر ئۆزىنى يوشۇرار.
13 ئۆز گۇناھلىرىنى يوشۇرغان كىشى روناق تاپماس،
لېكىن ئۆز گۇناھلىرىنى ئىقرار قىلىپ،
توۋا قىلغان كىشىگە رەھىم-شەپقەت قىلىنار.
14 ھەمىشە خۇدادىن قورققان كىشى نەقەدەر بەختلىكتۇر!
لېكىن ئۆزىنىڭ جاھىللىقىدا چىڭ تۇرغان كىشى بالا-قازاغا ئۇچرار.
15 كەمبەغەل خەلقنى باشقۇرغان يامان ھۆكۈمدار
بىر ھۇۋلايدىغان شىرغا ۋە ئوۋ ئىزدەيدىغان ئېيىققا ئوخشار.
16 ئەقىلسىز ھۆكۈمدار خەلققە كۆپ زۇلۇم سالار،
ئەمما ھارام بايلىقنى يامان كۆرگۈچىنىڭ ئۆمرى ئۇزۇن بولار.
17 قان تۆككەن كىشى قىينىلىپ ئۆلگۈچە قېچىپ يۈرەر،
ھېچكىم ئۇنى توسمىسۇن.
18 توغرا يولدا ماڭغان كىشى نىجات تاپار،
لېكىن ئەگرى يوللاردا ماڭغان كىشى ئۇنىڭ بىرىدە يىقىلار.
19 ئۆز ئېتىزلىقىدا ئىشلىگەن كىشى تويغۇدەك نان يەر،
لېكىن بىكار يۈرگەنلەرگە ئەگەشكەن كىشى موھتاجلىقتا قالار.
20 ئىشەنچلىك كىشى بەرىكەتكە تولغان بولار،
باي بولۇشقا ئالدىرىغان كىشى جازاسىز قالماس.
21 بىرىگە يان بېسىش ياخشى ئەمەستۇر،
مۇنداق كىشى بىر پارچە نان ئۈچۈن گۇناھ ئۆتكۈزىدۇ.
22 ئاچكۆز كىشى باي بولۇشقا ئالدىرىدۇ،
ئۇ كەمبەغەللىكنىڭ ئۆز بېشىغا كېلىشىنى ئويلىمايدۇ.
23 باشقىلارغا نەسىھەت بەرگۈچى
خۇشامەتچىگە قارىغاندا ئاخىردا چوڭ ئىلتىپاتقا ئېرىشەر.
24 ئۆز ئاتا-ئانىسىنى بۇلاپ: «بۇ گۇناھ ئەمەس» دېگەن كىشى
بۇلاڭچىلار بىلەن بىر قاتاردا بولار.
25 تەكەببۇر كىشى جېدەل پەيدا قىلار،
ئەمما پەرۋەردىگارغا تايانغان كىشى راۋاج تاپار.
26 ئۆز ئەقلىگە ئىشەنگەن كىشى ئەخمەق بولار،
ھېكمەت بىلەن ماڭغان كىشى ئامان قالار.
27 نامراتلارغا بەرگەن كىشى موھتاجلىقتا قالماس،
لېكىن ئۇلاردىن كۆزلىرىنى يۇمغان كىشى كۆپ لەنەتكە ئۇچرار.
28 يامانلار غەلىبە قازانسا، ئادەملەر ئۆزىنى يوشۇرار،
لېكىن يامانلار ھالاك بولسا، ھەققانىيلار كۆپىيەر.