29
1 كىمكى قايتا-قايتا نەسىھەت ئاڭلاپ تۇرۇپ، بوينى قاتتىقلىق قىلسا، تۇيۇقسىز سۇندۇرۇلۇپ داۋاسىز قالار.
2 ھەققانىيلار كۆپەيسە، خەلق خۇشال بولار،
لېكىن يامانلار ھۆكۈم سۈرسە، خەلق ئاھ ئۇرار.
3 ھېكمەتنى دوست تۇتقان كىشى ئاتىسىنى خۇش قىلار،
لېكىن پاھىشىلەر بىلەن ئارىلاشقان كىشى مال-مۈلكىنى يوقىتار.
4 پادىشاھ ئادالەت بىلەن ئۆز يۇرتىنى ساقلار،
لېكىن ئۇ پارىخور بولسا، ئۇنى ۋەيران قىلار.
5 ئۆز قوشنىسىغا خۇشامەت قىلغان كىشى،
پۇتىغا قاپقان قۇرار.
6 يامان ئادەم ئۆز گۇناھلىرىدا چىرمىشار،
ھەققانىي كىشى ناخشا ئېيتىپ شادلىنار.
7 ھەققانىي ئادەم كەمبەغەللەرنىڭ دەۋاسىغا كۆڭۈل بۆلەر،
لېكىن يامان كىشىنىڭ كارى بولماس.
8 مەسخىرىۋاز كىشىلەر شەھەردە قالايمىقانچىلىق پەيدا قىلار،
لېكىن دانا كىشىلەر غەزەپنى باسار.
9 دانا كىشى ئەخمەق بىلەن دەۋالاشقىنىدا،
ئەخمەق تىنچلانماي كۈلۈپ-ھۈرپىيىپ تۇرار.
10 قانخورلار بىگۇناھ كىشىنى يامان كۆرەر،
لېكىن دۇرۇس كىشى ئۇنىڭ جېنىنى قۇتقۇزۇشنى خالار.
11 ئەخمەق كىشى ھەممە ئاچچىقىنى ئاشكارىلار،
لېكىن دانا كىشى ئۆزىنى تۇتۇۋالار.
12 ئەگەر بىر ھۆكۈمدار يالغان گەپكە قۇلاق سالسا،
ئۇنىڭ ھەممە خىزمەتكارلىرى يامان بولار.
13 كەمبەغەل بىلەن زالىم بىر-بىرى بىلەن ئۇچرىشار،
ھەر ئىككىلىسىنىڭ كۆزلىرىگە نۇر بەرگۈچى پەرۋەردىگاردۇر.
14 بىچارىلەرگە ئادىللىق بىلەن ھۆكۈم قىلغان پادىشاھنىڭ تەختى
مەڭگۈگە مەزمۇت تۇرار.
15 تاياق ۋە نەسىھەت ھېكمەت تاپقۇزار،
لېكىن ئۆز خاھىشىغا قويۇپ بېرىلگەن بالا ئانىسىنى شەرمەندە قىلار.
16 يامانلار كۆپىيىپ ئۇلغايغاندا گۇناھ كۆپىيەر،
لېكىن ھەققانىيلار ئۇلارنىڭ يىقىلغىنىنى كۆرەر.
17 ئوغلۇڭنى تەربىيىلەپ تۈزەتسەڭ،
ئۇ ساڭا ئارام بېرىپ، جېنىڭنى سۆيۈندۈرەر.
18 ئىلاھى ۋەھىي بولمىسا خەلق تىزگىنسىز بولار،
ئەمما تەۋرات قانۇنىغا ئەمەل قىلغۇچى بەخت تاپار.
19 سۆز بىلەنلا قۇلغا نەسىھەت بەرگىلى بولماس،
چۈنكى ئۇ نەسىھەتنى ئۇقسىمۇ، ئۇنىڭغا پەرۋا قىلماس.
20 گەپ قىلىشقا ئالدىراڭغۇ كىشىنى كۆردۈڭمۇ؟
ئۇنىڭدىن ئۈمىد كۈتكەندىن ئەخمەقتىن ئۈمىد كۈتكەن ياخشى.
21 كىمكى قۇلىنى كىچىكىدىن ئەركىلىتىپ باقسا،
ئاخىرى قۇلى ئۇنىڭغا قارشى چىقار.
22 تېرىككەك ئادەم جېدەل پەيدا قىلار،
ئاسان ئاچچىقلىنىدىغان كىشى پات-پات گۇناھقا چۈشەر.
23 ئادەمنىڭ تەكەببۇرلۇقى ئۇنى پەس قىلار،
لېكىن كەمتەر كۆڭۈللۈك كىشى ئىززەت تاپار.
24 ئوغرى بىلەن شېرىك بولغان كىشى ئۆز جېنىغا دۈشمەن بولار،
ئۇ لەنەتنى ئاڭلاپ تۇرۇپ، ئەھۋالنىڭ راستىنى ئېيتماس.
25 ئادەملەردىن قورقۇپ يۈرۈش كىشىگە تۇزاق بولار،
لېكىن پەرۋەردىگارغا تايانغان ئادەم ئامان قالار.
26 كۆپ كىشىلەر ھۆكۈمدارنىڭ ئىلتىپاتىنى ئىزدەر،
لېكىن ھەر كىشىنىڭ ھەققى پەرۋەردىگاردىن كېلەر.
27 ھەققانىيلار زالىم كىشىدىن يىرگىنەر،
يامانلار دۇرۇس يولدا ماڭغان كىشىدىن يىرگىنەر.