‏1 ھەر نەرسىنىڭ ئۆز پەيتى بار ۋە ئاسماننىڭ ئاستىدىكى ھەر ئىشنىڭ ئۆز ۋاقتى بار.

‏2 تۇغۇلۇشنىڭ ۋاقتى بار، ئۆلۈشنىڭمۇ ۋاقتى بار.

كۆچەت تىكىشنىڭ ۋاقتى بار، كۆچەت يۇلۇشنىڭمۇ ۋاقتى بار.

‏3 ئۆلتۈرۈشنىڭ ۋاقتى بار، ساقايتىشنىڭمۇ ۋاقتى بار.

بۇزۇشنىڭ ۋاقتى بار، قۇرۇشنىڭمۇ ۋاقتى بار.

‏4 يىغلاشنىڭ ۋاقتى بار، كۈلۈشنىڭمۇ ۋاقتى بار.

ماتەم تۇتۇشنىڭ ۋاقتى بار، ئۇسسۇل ئويناشنىڭمۇ ۋاقتى بار.

‏5 تاش ئېتىشنىڭ ۋاقتى بار، تاش يىغىشنىڭمۇ ۋاقتى بار.

قۇچاقلاشنىڭ ۋاقتى بار، قۇچاقلاشتىن ئۆزىنى تارتىشنىڭمۇ ۋاقتى بار.

‏6 ئىزدەشنىڭ ۋاقتى بار، يىتتۈرۈشنىڭمۇ ۋاقتى بار.

ساقلاشنىڭ ۋاقتى بار، تاشلاشنىڭمۇ ۋاقتى بار.

‏7 يىرتىشنىڭ ۋاقتى بار، تىكىشنىڭمۇ ۋاقتى بار.

سۈكۈتنىڭمۇ ۋاقتى بار، سۆزلەشنىڭمۇ ۋاقتى بار.

‏8 سۆيۈشنىڭ ۋاقتى بار، نەپرەتلىنىشنىڭمۇ ۋاقتى بار.

ئۇرۇشنىڭ ۋاقتى بار، تىنچلىقنىڭمۇ ۋاقتى بار.

‏9 ئەمگەكچى سەرپ قىلغان ئەمگىكىدىن نېمە پايدا ئالىدۇ؟ ‏10 خۇدا ئادەم بالىلىرىغا جاپا تارتسۇن دەپ بەرگەن ئىشلارنى كۆردۈم. ‏11 ئۇ ھەر نەرسىنى ئۆز زامانىدا گۈزەل ياراتتى. شۇنداقلا ئۇ ئادەملەرنىڭ كۆڭۈللىرىگە ئەبەدىيلىكنى سالدى، شۇنداقتىمۇ ھېچ كىشى خۇدانىڭ دەسلەپتىن تارتىپ ئاخىرغىچە قىلغان ئىشلىرىنىڭ تېگىگە يېتەلمەيدۇ. ‏12 ئادەملەر ئۈچۈن ھاياتىدا خۇشال بولۇشتىن، ياخشى ئىشلارنى قىلىشتىن ياخشى نەرسە يوق دەپ بىلىپ يەتتىم. ‏13 شۇنداقلا بىر كىشى يەپ-ئىچىپ، بارلىق ئەمگىكىدىن ھۇزۇرلىنىپ ياشىسا، بۇ خۇدانىڭ سوۋغىسىدۇر.

‏14 خۇدانىڭ قىلغانلىرىنىڭ ھەممىسىنى مەڭگۈلۈك دەپ بىلدىم. ئۇنىڭغا ھېچبىر نەرسە قوشۇلۇپ قالمايدۇ، شۇنداقلا ئۇنىڭدىن ھېچبىر نەرسە ئېلىنمايدۇ. خۇدا ئادەملەرنىڭ ئۇنىڭدىن قورقۇشى ئۈچۈن شۇنداق قىلدى. ‏15 بار نەرسە ئىلگىرىمۇ بار ئىدى. كەلگۈسىدە بولىدىغان ئىش ئىلگىرىمۇ بولغاندۇر. خۇدا ئۆتۈپ كەتكەننى يەنە كەلتۈرىدۇ.

‏16 مەن قۇياش ئاستىدا شۇنىمۇ كۆردۈم: ئادالەتنىڭ ۋە ھەققانىيلىقنىڭ يېرىنى يامانلىق ئېلىپتۇ. ‏17 مەن ئۆز كۆڭلۈمدە: «خۇدا ھەققانىينىمۇ، گۇناھكارنىمۇ سوراققا تارتىدۇ، چۈنكى ھەر ئىش ۋە ھەر ئەمەلنىڭ بېكىتىلگەن ۋاقتى باردۇر» دېدىم. ‏18 مەن ئادەم بالىلىرى توغرىسىدا كۆڭلۈمدە: «ئۇلار ئۆزىنىڭ ھايۋاندىن پەرقسىز ئىكەنلىكىنى بىلسۇن دەپ خۇدا ئۇلارنى سىناپ كۆرىدۇ» دېدىم. ^■   ‏19 چۈنكى ئادەم بالىلىرى ۋە ھايۋانلارنىڭ تەقدىرى ئوخشاش، ھايۋانلار ئۆلگەندەك ئادەم بالىلىرىمۇ ئۆلىدۇ، ھەممىسىنىڭ ئوخشاش جېنى باردۇر. ئادەمنىڭ ھايۋاندىن ئارتۇقچىلىقى يوق، چۈنكى ھەممىسى بىھۇدىلىكتۇر. ‏20 ئۇلارنىڭ ھەممىسى بىر جايغا بارىدۇ، ھەممىسى توپىدىن يارالغان، ھەممىسى يەنە توپىغا قايتىدۇ. ‏21 ئادەم بالىلىرىنىڭ روھى يۇقىرىغا چىقامدۇ، ھايۋاننىڭ روھى يەرنىڭ تېگىگە چۈشەمدۇ؟ كىم بىلىدۇ؟ ‏22 بۇنىڭدىن بىلدىمكى، ئادەمگە ئۆز ئەمگىكىدىن ھۇزۇرلىنىشتىن ياخشىراقى يوقتۇر، ئۇنىڭ نېسىۋىسى شۇدۇر. چۈنكى كىم ئۇنى ئېلىپ كېلىپ، ئۇنىڭدىن كېيىن بولىدىغان ئىشلارنى ئۇنىڭغا كۆرسىتەلەيدۇ؟