كۈيلەرنىڭ كۈيى
1
1 سۇلايمان يازغان «كۈيلەرنىڭ كۈيى». شۇلامىت قىزنىڭ بولغۇسى ئېرى پادىشاھقا بولغان سېغىنىشى
2 سۆيسۇن ئۇ مېنى لەۋلىرىنىڭ سۈيۈشلىرى بىلەن.
چۈنكى سېنىڭ مۇھەببىتىڭ شارابتىن ئەۋزەلدۇر.
3 خۇشپۇراقتۇر ئەتىرلىرىڭ،
ئىسمىڭ قۇيۇلغان خۇشبۇي ماي كەبى.
شۇڭا پاك قىزلار سۆيىدۇ سېنى.
4 مېنى ئۆزۈڭگە ئەگەشتۈر،
بىز يۈگۈرۈپ ساڭا ئەگىشەيلى.
پادىشاھ مېنى ئۆز ئوردا خانىلىرىغا ئېلىپ كىرگەي.
سەندىن خۇشال بولۇپ سۆيۈنەيلى،
مۇھەببىتىڭنى شارابتىن ئارتۇق داڭلايلى.
ئۇلار سېنى سۆيۈشكە ھەقلىق.
5 ئەي يېرۇسالېمنىڭ قىزلىرى، قارا بولساممۇ، چىرايلىقمەن،
خۇددى قېدارنىڭ چېدىرلىرىدەك، سۇلايماننىڭ پەردىلىرىدەك.
6 قارا بولغىنىمغا قارىمىغىن،
چۈنكى ئاپتاپ مېنى كۆيدۈردى.
ئانامنىڭ ئوغۇللىرى ماڭا ئاچچىقلىنىپ
مېنى ئۈزۈمزارلىق باققۇچىسى قىلدى.
لېكىن ئۆز ئۈزۈمزارلىقىمنى باقالمىدىم.
7 ئەي جېنىمنىڭ سۆيگىنى، ئېيتقىن ماڭا،
ئۆز پاداڭنى قەيەردە ئوتلىتىسەن؟
چۈش ۋاقتىدا ئۇنى قەيەردە راھەتلەندۈرىسەن؟
ئېيتمىساڭ ئىزدەپ يۈرىمەن يۈزىنى ئەتكەن ئايالدەك
دوستلىرىڭنىڭ پادىلىرى ئوتلىغان يەردە.
8 ئەي ئاياللارنىڭ ئەڭ گۈزىلى، ئەگەر بىلمىسەڭ،
پادىنىڭ ئىزلىرىدا يۈرۈپ،
پادىچىلارنىڭ چېدىرلىرىنىڭ يېنىدا
ئوغلاقلىرىڭنى ئوتلاتقىن.
يىگىت بىلەن قىزنىڭ ناخشا ئېيتىشىشى
9 ئەي سۆيگىنىم، ئوخشىتارمەن سېنى
فىرئەۋننىڭ جەڭ ئاتلىرى ئارىسىدىكى بايتالغا.
10 ھالقىلىرىڭ بىلەن زىننەتلەنگەن مەڭزىلىرىڭ،
مارجانلار بىلەن زىننەتلەنگەن بوينۇڭ
نەقەدەر گۆزەلدۇر.
11 كۈمۈش كۆزلىرى بار
ئالتۇن زەنجىرلەر ياساپ بېرەيلى ساڭا.
12 پادىشاھ زىياپىتىدە ئولتۇرغىنىدا
مېنىڭ سۇمبۇلۇم خۇش پۇرىقىنى چاچىدۇ.
13 مېنىڭ سۆيۈملۈكۈم ماڭا
قوينۇمدا قويۇلغان مۇرمەككىنىڭ تۈگۈنچىسىدەكتۇر.
14 مېنىڭ سۆيۈملۈكۈم ماڭا
ئەن-گەدىنىڭ ئۈزۈمزارلىقلىرىدىكى
بىر خېنە گۈل دەستىسى كەبىدۇر.
15 ئەي سۆيگىنىم، نەقەدەر چىرايلىقسەن،
نەقەدەر گۈزەلدۇرسەن.
كۆزلىرىڭ كەپتەرلەرنىڭكىدەك.
16 ئەي سۆيۈملۈكۈم، نەقەدەر كېلىشكەنسەن، جەلىپكارسەن.
يېشىللىقتۇر ئورنىمىز.
17 ئۆيىمىزنىڭ لىملىرى كېدىر دەرىخىدىن،
تام-تورۇسىمىز قارىغاي دەرىخىدىندۇر.