يىگىت ۋە قىزنىڭ خۇسۇسىيەتلىرى
2
1 مەن شارون ئېگىزلىكتىكى بىر زەپىران گۈلىمەن، ۋادىنىڭ نىلۇپەرىمەن.
2 مېنىڭ سۆيگىنىم قىزلارنىڭ ئارىسىدا
تىكەنلەرنىڭ ئارىسىدىكى بىر نىلۇپەر كەبىدۇر.
3 مېنىڭ سۆيۈملۈكۈم ئوغۇللارنىڭ ئارىسىدا
ئورمان دەرەخلىرىنىڭ ئارىسىدىكى بىر ئالما دەرىخى كەبى.
ئۇنىڭ سايىسىدا ھۇزۇرلىنىپ ئولتۇرىمەن،
ئۇنىڭ مېۋىسى شېرىن تېتىدۇ.
4 ئۇ مېنى ئۆز زىياپەتخانىسىغا باشلاپ كىردى.
ئۇنىڭ ئۈستۈمدە تىكىلگەن تۇغى مۇھەببەتتۇر.
5 كىشمىش توقاچلىرى بىلەن مېنى قۇۋۋەتلەڭلار،
ئالما بىلەن مېنى ياشارتىڭلار،
چۈنكى سۆيگۈ ئىشقىنىڭ دەردىنى تارتىمەن.
6 ئۇنىڭ سول قولى بېشىمنىڭ ئاستىدا،
ئوڭ قولى مېنى قۇچاقلايدۇ.
7 ئەي يېرۇسالېمنىڭ قىزلىرى،
مەن دالادىكى كېيىك ۋە ماراللار گۇۋاھچىلىققا تارتىپ،
سىلەرگە: «سۆيگۈنى، ۋاقتى-سائىتى كەلمىگۈچە
ئويغاتماڭلار ۋە قوزغىماڭلار» دەپ جېكىلەيمەن.
قىزنىڭ سۆيۈملۈك يىگىتىنىڭ كېلىشى توغرىسىدا ئويلىنىشى
8 مانا، سۆيۈملۈكۈمنىڭ ئاۋازى!
مانا، ئۇ تاغلارنىڭ ئۈستىدىن ئاتلاپ،
دۆڭلەردىن سەكرەپ كېلىۋاتىدۇ!
9 مېنىڭ سۆيۈملۈكۈم كېيىكتەك ياكى ياش بۇغىدەك.
مانا، ئۇ تېمىمىزنىڭ كەينىدە تۇرىدۇ.
ئۇ دېرىزىلەردىن قاراپ، پەنجىرىلەردىن ماراپ تۇرىدۇ.
10 مېنىڭ سۆيۈملۈكۈم ماڭا سۆز قىلىپ مۇنداق دېدى:
«ئورنۇڭدىن تۇر، ئەي مېنىڭ سۆيگىنىم، ئەي گۈزىلىم،
مەن بىلەن كەل.
11 مانا، قىش ئۆتۈپ كەتتى،
يامغۇر ۋاقتى ئاخىرلاشتى.
12 يەردە گۈللەر كۆرۈندى،
قۇشلارنىڭ سايراش ۋاقتى يېتىپ كەلدى،
يۇرتىمىزدا پاختەكنىڭ ئاۋازى ئاڭلاندى.
13 ئەنجۈر دەرىخىنىڭ مېۋىسى پىشتى،
ئۈزۈم تاللىرى چېچەكلەپ، پۇرىقىنى چاچتى.
ئەي مېنىڭ سۆيگىنىم، ئەي مېنىڭ گۈزىلىم،
ئورنۇڭدىن تۇرۇپ، مەن بىلەن كەل.
14 ئەي قورام تاش كاۋاكلىرىدا،
قورام تاش دالدىلىرىدا تۇرىدىغان كەپتىرىم،
جامالىڭنى ماڭا كۆرسەتكىن،
ئاۋازىڭنى ماڭا ئاڭلاتقىن.
چۈنكى ئاۋازىڭ شېرىن ۋە جامالىڭ گۈزەلدۇر.
15 بىز ئۈچۈن تۈلكىلەرنى تۇتۇڭلار،
ئۈزۈمزارلىقلارنى بۇزىدىغان كىچىك تۈلكىلەرنى تۇتۇڭلار،
چۈنكى ئۈزۈم تاللىرىمىز چېچەك چىقاردى».
16 سۆيۈملۈكۈمدۇر مېنىڭكىدۇر ۋە مەن ئۇنىڭكىدۇرمەن،
ئۇ پادىسىنى نىلۇپەرلەرنىڭ ئارىسىدا ئوتلىتىدۇ.
17 ئەي سۆيۈملۈكۈم، تاڭ شامىلى چىققۇچە،
سايىلار غايىب بولغۇچە بۇرۇلۇپ،
بىر كېيىك كەبى، بىر جەرەن كەبى،
تاغ-داۋانلاردىن سەكرەپ ئاشقايسەن. ■