ئايرىلىش توغرىسىدا بىر چۈش
3
1 مەن كېچىدە ياتقىنىمدا ئورنۇمدا، جېنىمنىڭ سۆيگىنىنى ئىزدىدىم،
ئىزدىدىم ئۇنى، بىراق ئۇنى تاپالمىدىم.
2 مەن: «شەھەرنى ئايلىنىپ، كوچا ۋە مەيدانلاردا يۈرۈپ،
جېنىمنىڭ سۆيگىنىنى ئىزدەي» دېدىم.
ئۇنى ئىزدىدىم، بىراق ئۇنى تاپالمىدىم.
3 شەھەر ئىچىدە ئايلىنىپ يۈرگەن قاراۋۇللار ئۇچراپ قالدى ماڭا.
«جېنىمنىڭ سۆيگىنىنى كۆردۈڭلارمۇ؟» دەپ سورىدىم ئۇلاردىن.
4 ئۇلاردىن ئۆتۈپلا جېنىمنىڭ سۆيگىنىنى تاپتىم.
مەن ئۇنى تۇتۇپ، ئانامنىڭ ئۆيىگە باشلاپ،
مېنى تۇغقان ئانامنىڭ ھۇجرىسىغا كىرگۈزمىگۈچە
قويۇپ بەرمىدىم.
5 ئەي يېرۇسالېمنىڭ قىزلىرى،
دالادىكى كېيىك ۋە ماراللار گۇۋاھچىلىققا تارتىپ
سىلەرگە: «سۆيگۈنى، ۋاقتى-سائىتى كەلمىگۈچە
ئويغاتماڭلار ۋە قوزغىماڭلار» دەپ جېكىلەيمەن.
سۇلەيمان پادىشاھنىڭ شۇلامىت قىزنى ئېلىپ كېلىشى
6 كىم بىر تۈتۈن تۈۋرىكىدەك باياۋاندىن كېلىۋاتقان؟
بۇ مۇرمەككى ۋە مەستىكى بىلەن پۇرىتىلغان،
سودىگەرلەرنىڭ خىلمۇخىل دورا-دەرمەكلىرىنى ئېلىپ كېلىۋاتقان؟
7 مانا، سۇلايماننىڭ تەختىراۋانى،
ئىسرائىلنىڭ باتۇرلىرىنىڭ ئارىسىدىن تاللانغان
ئاتمىش پالۋان بار ئەتراپىدا.
8 ھەممىسى قىلىچ تۇتقان، جەڭگە ماھىردۇر،
كېچىنىڭ خەتىرىگە قارشى ھەممىسى قىلىچىنى يېنىغا ئاسقاندۇر.
9 سۇلايمان پادىشاھ لىۋان ياغىچىدىن
ئۆزىگە بىر سايىۋەنلىك تەختىراۋان ياساتتى.
10 ئۇنىڭ تىرەكلىرى كۈمۈشتىن،
يۆلەنچۈكى ئالتۇندىن ياسالغان،
ئولتۇرىدىغان جايى سۆسۈن رەخت بىلەن يېپىلغان.
ئۇنىڭ ئىچىنى يېرۇسالېمنىڭ قىزلىرى
مۇھەببەت بىلەن زىننەتلىگەن.
11 ئەي سىئوننىڭ قىزلىرى، چىقىڭلار،
توي كۈنىدە، كۆڭلىنىڭ شادلىق كۈنىدە،
ئانىسى كىيدۈرگەن تاجىنى كىيگەن
سۇلايمان پادىشاھنى كۆرۈڭلار.